އަފްޣާނިސްޠާނުގެ ބަލްޚް ޕްރޮވިންސްގައި ދިން ބޮމުގެ ހަމަލާއެއްގައި ތިން މީހަކު ޝަހީދު ވެއްޖެއެވެ.
މި ހަމަލާގައި މަރުވި މީހުންގެ ތެރޭގައި ޠާލިބާނުންގެ ގަވަރުނަރެއް ވެސް ހިމެނެއެވެ.
"ބަލްޚް ޕްރޮވިންސްގެ ގަވަރުނަރު މުޙައްމަދް ދާވޫދު މުއްޒައްމިލް ހިމެނޭހެން ތިން މީހަކު މިއަދު ހެނދުނު ދިން މިހަމަލާގައި ޝަހީދުވެފައިވޭ" ފުލުންގެ ތަރުޖަމާނު އާސިފް ވަޒީރީ މީޑިއާ އަށް މައުލޫމާތު ދެމުން ބުނެފައިވެއެވެ.
ވަޒީރީ ބުނެފައިވަނީ ބޮން ގޮއްވާލައިފައިވަނީ ބަލްޚް ޕްރޮވިންސްގެ ވެރިކަންކުރާ ރަށް މަޒާރީ ޝަރީފްގައި ހުންނަ ގަވަރުނަރުގެ އޮފީހުގެ ދެވަނަ ފަންގިފިލާގައި ކަމަށެވެ.
"މިއީ ޖާނުން ފިދާވެގެން ދިން ހަމަލާއެއް ކަމަށް ބެލެވެނީ، ހަމަލާދިން މީހާ ގަވަރުނަރުގެ އޮފީހަށް ވަތް ގޮތުގެ އެއްވެސް މައުލޫމާތެއް އަދި އަހަރެމެންނަކަށް ލިބިފައެއް ނުވޭ" އާސިފް ވަޒީރީ ބުނެފައިވެއެވެ.
މި ހަމަލާގެ ޒިންމާ އެއްވެސް ޖަމާޢަތަކުން އަދި ނަގައިފައެއް ނުވެއެވެ. ގަވަރުނަރު މުއްޒައްމިލްގެ މަރުގެ ފަހަތުގައި ވަނީ އަފްޣާނިސްޠާނުގައި ހަރަކާތްތެރިވާ އިސްލާމިކް ސްޓޭޓްސް ކަމަށް ވަނީ ލަފާކޮށްފައެވެ.
މުއްޒައްމިލް އަކީ ފާޅުގައި އިސްލާމިކް ސްޓޭޓްސް އާއި ވަރަށް ބޮޑަށް ދެކޮޅު ފަރާތެއްކަން ވަނީ އެނގިފައެވެ. އަދި މި ހަމަލާ ދީފައިމިވަނީ އަފްޣާނިސްޠާނުގެ ކާބުލްގައި ސަރުކާރުގެ އިސްވެރިންނާއި އެކު ބޭއްވުނު މަޝްވަރާ ބައްދަލުވުމަކުން އެނބުރި އައިފަހުންނެވެ. މި ބައްދަލު ކުރުން ތަކުގައި އިސްލާމިކް ސްޓޭޓްސްގެ މައްސަލައާއި މެދު މަޝްވަރާ ކުރެވުނު ކަމަށް މީޑިއާ ތަކުގައ ބުނެފައިވެއެވެ.
"މުއްޒައްމިލް ޝަހީދުވެފައިވަނީ އިސްލާމްދީނުގެ ދުޝްމިނުންގެ ބޮމުގެ ހަމަލާއަކުން" ޠާލިބާނުންގެ ތަރުޖަމާނު ޒަބީހުއްﷲ މުޖާހިދު ކޮށްފައިވާ ޓްވީޓެއްގައި ބުނެފައިވެއެވެ.
ޠާލިބާނުން ވެރިކަމަށް އައި ފަހުން އަފްޣާނިސްޠާނުގައި ލޭއޮހުރުވުންތައް މަދުވި ނަމަވެސް އިސްލާމިކް ސްޓޭޓަސްގެ ހަނގުރާމަވެރިންގެ އުނދަގޫތަކާއި ދޭތެރެއަކުން ޠާލިބާނުން ކުރިމަތިލާން ޖެހެއެވެ.
Advertisement
This content is created and paid for by advertisers and does not involve Voice Journalists
