މޯލްޑިވްސް ހައްޖު ކޯޕަރޭޝަން ލިމިޓެޑަށް ހައްޖަށް ގެންދަން ލިބޭ ކޯޓާގެ ތެރެއިން، ބޮޑެތި ބަލިތަކަށް ފަރުވާ ހޯދަމުންދާ މީހުންނަށް ވަކި އަދަދެއް ހާއްސަ ކުުރުމަށް ނިންމާ އެ ޖާގަތަކަށް ހުޅުވާލައިފި އެވެ.

ހައްޖު ކޯޕަރޭޝަނުން ބުނި ގޮތުގައި މި އަހަރު ޙައްޖު ކޯޕަރޭޝަނަށް ލިބޭ ކޯޓާގެ ތެރެއިން ފަސް ޕަސެންޓް ހާއްސަ ކުރާނީ ފުރާނައަށް ނުރައްކާވާފަދަ ބޮޑެތި ބަލިތައް ތަހަންމަލު ކުރަމުންދާ މީހުންނަށެވެ.

ނަމަވެސް އެއީ ހައްޖަށް ދިއުމަށް ފައިސާ ދައްކާ ހައްޖު ޖާގަ ލިސްޓަށް އަރާފައިވާ މީހުންނަށް ވާން ޖެހޭނެ ކަމަށާއި އަދި ފަރުލު ހައްޖު އަދާކޮށްފައިނުވާ މީހަކަށްވެސް ވާން ޖެހޭނެކަމަށް އެ ކޯޕަރޭޝަނުން ވަނީ ބުނެފަ އެވެ.

އެ ކޯޕަރޭޝަނުން ވަނީ މާޗް ނުވަވަނަ ދުވަހުގެ ނިޔަލަށް ކުންފުނީގެ ހައްޖު ޖާގަ ލިސްޓްގައި ހިމެނިފައިވާ، ފުރާނައަށް ނުރައްކާވާފަދަ ބޮޑެތި ބަލިތައް ތަހައްމަލް ކުރަމުންދާ މީހުންގެ ތެރެއިން ފަރުލު ހައްޖު އަދާކޮށްފައިނުވާ މީހުން ޖާގައަށް އެދި ހުށަހެޅުމަށް ހުޅުވާލާފައެވެ. އަދި ހުށަހެޅުންތައް ބަލައިގަނެވޭނެ އެންމެ ފަހު ތާރީހަކީ މި މަހުގެ 21 ވަނަ ދުވަސްކަމަށް ވަނީ ކަނޑައަޅާފަ އެވެ.

މި އަހަރަށް މިހާރު ރާއްޖެއަށް ވަނީ 1000 ކޯޓާ ދީފަ އެވެ. އެހެން ނަމަވެސް އަދި އިތުރު ކޯޓާ ލިބޭނެކަމަށް އުންމީދުކުރައްވާކަމަށް އިސްލާމިކް މިނިސްޓަރު ވަނީ ވިދާޅުވެފަ އެވެ. އަދި ވިދާޅުވީ މީގެ ކުރީން ވެސް ކޯޓާތައް ދޫކޮށް ނިމުމުން ސައުދީ ސަރުކާރުން އިތުރު ކޯޓާ ދޭ ކަމަށެވެ.

ރާއްޖެއަށް ދޫކުރާ ކޯޓާއި 50 އިންސައްތަ ދެނީ ހައްޖު ކޯޕަރޭޝަނަށެވެ. ބާކީ އަމިއްލަ ގުރޫޕްތަކަކަށެވެ.

ސަރުކާރުން މިހާރު ވަނީ ރާއްޖެއަށް ދޭ ހައްޖު ކޯޓާ، 2500 އަށް އިތުރު ކޮށްދޭން ސައުދީ ސަރުކާރުގައި އެދިފައެވެ.