ކެއަރ ސޮސައިޓީގެ 24 ވަނަ އަހަރީ ޖަލްސާ މިއަދު ބާއްވައިފިއެވެ.

މިޖަލްސާގައި ފާއިތުވީ އަހަރުގެ އަހަރީ ރިޕޯޓާއި އޮޑިޓް ރިޕޯޓު ހުށައަޅައިފައިވެއެވެ. އަދި ޖަމިއްޔާގެ ހުސްވެފައިވާ މަޤާމުގަތަކަށް މެމްބަރުން ވަނީ ހޮވައިފައެވެ. އަދި މީގެ އިތުރުން ކެއަރ ސޮސައިޓީގެ ހިންގާ ޤަވާއިދު އިސްލާހުކޮށް ފާސްކޮށްފައިވެއެވެ.

އަދި ފާއިތުވިއަހަރު ޖަމިއްޔާއަށް އެކި ގޮތްގޮތުން އަގުހުރި ޚިދްމަތްތައް ކޮށްދެއްވި ފަރާތްތަކުގެ އަގުވަޒަން ކޮށް އެފަރާތްތަކަށް ހަނދާނީ ސެޓްފިކެޓް ދިނުންވެސް މިޖަލްސާގައި ކުރިއަށް ދިޔައެވެ.

ޖަލްސާގައި ވާހަކަދައްކަވަމުން ކެއަރ ސޮސައިޓީ ބޯޑުގެ ރައީސް އިސްމާއިލް އަދުހަމް ވިދާޅުވީ ކެއާ ސޮސައިޓީގެ ޚިދްމަތްތައް މައިގަނޑު 3 ދާއިރާއަކަށް ބަހައިލެވިފައި ވާކަމަށެވެ. ފުރަތަމަ ކަމަކީ ކުދިންގެ ޅަފަތުގައި އާރލީ އައިޑެންޓިފިކޭޝަން އަދި އާރލީ އިންޓަވެންޝަން ފޯރުކޮށްދިނުން ކަމަށެވެ. އަދި މިއީ ކެއާ ސޮސައިޓީއިން އެންމެ މުހިންމުކަމެއް ދޭ ޕްރޮގްރާމް ކަމަށް އޭނާ ވިދާޅުވިއެވެ. އަދި ދުނިޔޭގެ އެހެން ޤައުމުތަކުގައިވެސް އެންމެ އިސްކަމެއް ދެނީ މި ޕްރޮގްރާމަށް ކަމަށް އޭނާ ވިދާޅުވިއެވެ.

ދެވަނަ ކަމެއްގެ ގޮތުގައި އަދުހަމް ފާހަގަ ކުރެއްވީ ސްކޫލް ނިންމާ ކުދިންނަށް އާމްދަނީ ހޯދޭނެ ގޮތެއް ނުވަތަ ވަޒީފާއަށް ނެރުމަށް ހިންގޭ ޕްރޮގްރާމް ކަމަށެވެ. އަދި ތިންވަނަ ކަމަކީ ތެރަޕީ އަދި ރިހެބިލިޓޭޝަން ޕްރޮގްރާމް ކަމަށް އަދުހަމް ވިދާޅުވިއެވެ.

މިއަހަރަކީ ކެއާ ސޮސައިޓީއަށް 25 އަހަރު ފުރޭ އަހަރަށް ވާޓީ އެކަން ކުލަގަދަކޮށް ފާހަގަ ކުރުމަށް ޚާއްސަ ހަރަކާތްތަކެއް ކުރިއަސް ގެންދިޔުމަށް ރާވާފައިވާ ކަމަށް އަދުހަމް ވިދާޅުވިއެވެ.

އެގޮތުން ކުރިއަށް ގެންދިޔުމަށް ރާވާފައިވާ ފުރަތަމަ ކަމަކީ ކެއާ ސޮސައިޓީގެ އައު މިސްރާބު އެކުލަވާލާ ސްޓްރެޖެޓިކް ޕްލޭން އިސްލާހު ކުރުން ކަމަށާއި، މިކަމަށްޓަކައި ސްޓޭކްހޯލްޑަ ފޯރަމެއް މިއަހަރު ތެރޭގައި ބާއްވާނެ ކަމަށާއި އަދި 25 އަހަރުގެ ދިގު ދަތުރު ޢާންމުންނާއި ހިއްސާކުރުމުގެ ގޮތުން ޕްރޮގްރާމްތަކެއް ހިންގޭނެ ކަމަށާއި، އަދި މީގެ އިތުރުން މިއަހަރު ފަހު ކޮޅު ވަރަށް ޚާއްސަ ޖަލްސާއެއް ބޭއްވުމަށް ހަމަޖެހިފައި ވާކަމަށް އޭނާ ވިދާޅުވިއެވެ.

އެއްފުރާޅެއްގެ ދަށުން ތަފާތު ޚިދްމަތްތައް ލިބޭނެ ގޮތަކަށް މަރުކަޒެއް ހެދުމުގެ ކޮންސެޕްޓް ކުރިއަށް ދާކަން އަދުހަމްގެ ވާހަކައިގައި ފާހަގަ ކުރެއްވިއެވެ.

"ކުދިންނަށް ބޭނުންވާ ތެރަޕީ، އިންޓަވެންޝަން އަދި ވޮކޭޝަނަލް ޕްރޮގްރާމްތައް ރޭވިފައި މިހުންނަނީ ވަކިވަކި ދާއިރާތަކުގައި، މިގޮތަށް ރޭވިފައި ހުރުމުން ބެލެނިވެރިންގެ މުޅިދުވަސް ހޭދަކުރަންޖެހެނީ  މިތަންތަނަށް ކުދިން ގެންގޮސް ގެނައުމުގައި، އިރާދަ ކުރެއްވިއްޔާ ކެއާ ސޮސައިޓީ އިން މަސައްކަތް ކުރަމުން މިގެންދަނީ ހެނދުނު ކުއްޖާ ގެނެސް އަޅުގަނޑުމެންނާއި ހަވާލުކުރުމަށް ފަހު މެންދުރު ފަހު ކުއްޖާ ގެއަށް ފޮނުވޭގޮތަށް ޚިދްމަތް ރޭވޭތޯ، މިހެން ރޭވިއްޖެނަމަ ކުއްޖާ އަށް ބޭނުންވާ ތެރަޕީ، ވޮކޭޝަނަލް ޕްރޮގްރާމް އަދި ޑޭ ކެއާގެ ޚިދްމަތް އެއް ފުރާޅެއްގެ ދަށުން ލިބިގެންދާނެ، މިއީ ބެލެނިވެރިންނަށޤ ލިބިގެންދާނެ ވަރަސް ބޮޑު ފަސޭހައެއް" އަދުހަމް ވިދާޅުވިއެވެ.  

ކެއާ ސޮސައިޓީގެ ޚިދްމަތްތައް މާލޭގެ އިތުރުން ރާއްޖޭގެ އުތުރާއި ދެކުނުގައި ފެށުމުގެ މަސައްކަތް ކުރަމުންދާ ކަމަށް އަދުހަމްގެ ވާހަކައިގައި ވިދާޅުވިއެވެ. އެގޮތުން މިއަހަރުތެރޭގައި ހދ ކުޅުދުއްފުށީގައި ކެއާ ސޮސައިޓީގެ ޚިދުމަތްތައް ފެށޭތޯ މަސައްކަތް ކުރަމުން ދާ ކަމަށް އޭނާ ވިދާޅުވިއެވެ. އަދި ހުޅުމާލެ ފޭސް 2ގައި ދިރިއުޅޭ ފަރާތްތަކަށް އެތަނުގެ ޚިދްމަތްތައް ބޭނުންވާކަން ފާހަގަ ކުރެވިފައި ވާކަމަށާއި، އެހެންކަމުން އެޗްޑީސީ އާއި ގުޅިގެން ފޭސް2 ގައި ކެއާ ސޮސައިޓީގެ ޚިދްމަތްދޭނެ ތަނެއް ތައްޔާރު ކުރެވެމުން ދާކަމަށާއި، އުންމީދަކީ އޮގަސްޓު ކުރީ ކޮޅުގައި އެތަނުގެ ޚިދްމަތް ފެށުންކަމަށް ވެސް އޭނާ ވިދާޅުވިއެވެ.

އަދި އެތަނުން ކުދިންގެ އިންޓަވެންޝަން ތެރަޕީ އަދި ވޮކޭޝަނަލް އެޑިޔުކޭޝަން ޚިދްމަތް ދެވޭނެކަމަށް އަދުހަމް ވިދާޅުވިއެވެ.