ހައުސިން ޑިވެލޮޕްމެންޓް ކޯޕަރޭޝަން (އެޗްޑީސީ)ގެ ބެލުމުގެ ދަށުގައިވާ މާލެއަތޮޅު ގުޅިފަޅު އަދި ތިލަފުށި ފަޅު ތެރެއަށް ދޫކޮށްލާފައިވާ އުޅަނދުތަކާއި ތަކެތި ނަގާނެ އުސޫލެއް އެކުލަވާލައި އެއަށް އަމަލުކުރަން ފަށައިފިއެވެ.

ގުޅިފަޅު އަދި ތިލަފުށި ފަޅު ތެރެއަށް ހުސްކުރުމާއި ގުޅިގެން އެޗްޑީސީން އިއްޔެ ނެރުނު އިއުލާނެއްގައި ބުނީ އެ ސަރަހައްދުގައި އެޗްޑީސީގެ ހުއްދަ އާއި ނުލައި ބަހައްޓާފައިވާ ތަކެތީގެ ސަބަބުން އެ ސަރަހައްދުގައި ހިންގުމަށް ރާވާފައިވާ މަޝްރޫއުތަށް ހިންގުމުގައި ދަތިތަކާއި ކުރިމަތިލާން ޖެހޭ ކަމަށެވެ. 

އަދި ގުޅިފަޅު އަދި ތިލަފުށި ފަޅު ތެރެއަށް ދޫކޮށްލާފައިވާ އުޅަނދުތަކާއި ތަކެތި ނެގުމަށް އެކޯޕަރޭޝަނުން ތަކުރާރުކޮށް އާންމުކޮށް އިއުލާން ކުރުމުން ވެސް ބައެއް ފަރާތްތަކުން އެގޮތަށް އަމަލުކޮށްފައި ނުވާ ކަމަށާ އެހެންކަމުން އެކަމަށް ހައްލެއް ހޯދުމުގެ ގޮތުން އިއްޔެ "ކ. ތިލަފުށްޓާއި ކ، ގުޅިފަޅުގެ ފަޅުތެރެއަށް ދޫކޮށްލައިފައިވާ އުޅަނދުފަހަރާއި ތަކެއްޗާއި މެދު އަމަލު ކުރާނެ ގޮތުގެ އުސޫލު" ގެޒެޓް ކޮށްފައިވާ ކަމަށެވެ.

އަދި މީގެ އިތުރުން، އެ އުޅަނދުތައް ނުނެގުމުގެ ސަބަބުން އެސަރަހައްދު ބޭނުން ކުރާ ފަރާތްތަކަށް ދަތިވެ، އަދި އެސަރަހައްދުގެ ތިމާވެއްޓަށް ވެސް އެކަމުގެ ސަބަބުން ވަރަށް ބޮޑަށް ގެއްލުންވަމުން އަންނަ ކަންވެސް އެޗްޑީސީން ބުނެއެވެ.

އެހެން ކަމުން އެޗްޑީސީން އެ ނެރުނު އުސޫލުގައިވާ ގޮތުގެ މަތިން ފަޅުތެރެއަށް ދޫކޮށްލާފައިވާ އުޅަނދުތަކަކީ ކޮބައިކަން ކަނޑައަޅާ އެ އުޅަނދުތައް ނެގުމަށް ކުރަންޖެހޭ މަސައްކަތްތައް އެކޯޕަރޭޝަނުގެ ފަރާތުން ކުރަމުން ގެންދާނެ ކަމަށްވެސް އެޗްޑީސީގެ އިއުލާނުގައި ބުނެފައިވެއެވެ.