ސަޢޫދީޢަރަބިއްޔާ އާއި އިރާނުން ދެޤައުމުގެ ދެމެދުގައި ހީނަރުވެފައިވާ ގުޅުން ބަދަހި ކުރުމަށް އެއްބަސް ވެއްޖެއެވެ.
ހުކުރުދުވަހު ބެއިޖިން ގައި ބޭއްވުނު މަޝްވަރާ ތަކަށްފަހު ދެ ޤައުމުން ނިންމައިފައިވަނީ ދެމަސް ދުވަސް ތެރޭގައި ދެޤައުމުގައި އެމްބަސީ ހުޅުވައި ދެ ޤައުމުގެ ޑިޕްލޮމޮޓިކް ގުޅުންތައް އަލުން ފެށެމަށެވެ. "ފައިދާހުރި މަޝްވަރާ ތަކަކަށްފަހު ދެޤައުމުގެ ފޮރިން މިނިސްޓްރީ އިން ގުޅުން ބަދަހި ކުރުމާއި މެދު އިތުރު މަޝްވަރާ ތައް ކުރުމަށް ބައްދަލު ކުރާނެ" އިރާންގެ ޤައުމީ ޓީވީ އިން ބުނެފައިވެއެވެ.
ސަޢޫދީގެ ޤައުމީ މީޑިއާއިން ވެސް ވަނީ ދެޤައުމުން އަލުން ގުޅުންތައް ރަނގަޅުކުރަން މަޝްވަރާކޮށް އެއްބަސް ވެވުނު ކަން ޔަޤީންކޮށްދީފައެވެ. އެގޮތުން ސަޢޫދީޢަރަބިއްޔާ އާއި އިރާނުންވެސް އެއްގައުމުން އަނެއް ޤައުމުގެ އެތެރޭގެ ސިޔާސަތު ތަކާއި ނުބެހުމަށާއި، އެއްޤައުމުން އަނެއް ޤައުމުގެ އިސްތިޤްލާލަށް ނުފޫޒު ނުފޯރުވުމަށް އެއްބަސްވެފައިވެއެވެ.
އަދި 2001 ވަނަ އަހަރު އެކުލައިލެވުނު ސެކިޔުރިޓީ ކޯޕަރޭޝަން އެއްބަސްވުމަށް ޢަމަލު ކުރުމަށް ވެސް ދެ ޤައުމުން އެއްބަސް ވެފައިވެއެވެ.
ދެ ޤައުމުގެ ދެމެދުގައި ހުރި ސާފުނުވެ ހުރި ކަންކަން ސާފުކޮށް ހެދުމާއި ކުރިމަގުގައި ރިޔާދާއި ތެހެރާން އާއި ދެމެދު ގާއިމް ކުރެވޭނެ ގުޅުންތަކުގެ ސަބަބުން ގަލްފް ސަރަހައްދުގައި ހިމެނޭ ފާރިސީ ޤައުމުތަކާއި އިސްލާމީ އެހެން ޤައުމުތަކަށް ހެޔޮ ރަނގަޅު އަސަރުތަކެއް ކުރާނެ ކަމަށް ސަޢޫދީ އިން ބުނެފައިވެއެވެ.
ސަޢުދީ އާއި އިރާން އާއި ދެމެދު އޮތް ޑިޕްލޮމެޓިކް ގުޅުންތައް ކެނޑިގެން ދިޔައީ 2016 ވަނަ އަހަރު އިރާންގައި ކުރި މުޒާހަރާއެއްގައި މުޒާހަރާގެ ބައިވެރިން ސަޢޫދީގެ އެމްބަސީއަށް ވެދެ ދިން ގެއްލުންތަކެއްގެ ސަބަބުންނެވެ.
އިރާންއަކީ ޝީޢާ މުސްލިމުންގެ އާބާދީ ބޮޑު ޤައުމެކެވެ. އެއާއި ޚިލާފަށް ސަޢޫދީ އަކީ ސުންނީ މުސްލިމުންގެ އާބާދީ ބޮޑު ޤައުމެކެވެ. ޝީޢީން ނާއި ސުންނީގެ ދެމެދުގައި އަބަދުވެސް ޚިޔާލު ތަފާތުވުންތަކާއި އަރައިރުންތައް ބޮޑެވެ.
Advertisement
This content is created and paid for by advertisers and does not involve Voice Journalists
