އެމީހަކު ނިސްބަތްވާ ސިޔާސީ ޕާޓީގެ އެތެރެ ގަޑުބަޑު ކުރާ މީހަކަށް، އެ ޕާޓީގެ އިސް މަގާމެއްގައި ހުރެވިގެން ނުވާނެކަމަށް މަޖިލީހުގެ އެމްޑީޕީގެ ޕާލިމަންޓްރީ ގްރޫޕްގެ މަރަދޫ ދާއިރާގެ މެމްބަރު އިބްރާހިމް ޝަރީފް ވިދާޅުވެއްޖެއެވެ.

ޝަރީފު މިފަދައިން ވިދާޅުވެފައިވަނީ ކުރެއްވި ޓްވީޓެއްގަ އެވެ. އޭނާގެ އެ ޓްވީޓަކީ އެމްޑީޕީގެ ރައީސް މުހައްމަދު ނަޝީދުގެ މަސައްކަތްޕުޅަށް ނުސީދާގޮތުން އަމާޒުކުރެއްވި ރައްދެއްކަމަށް ބެލެވެއެވެ. 

އެމްޑީޕީގެ ރިޔާސީ ޓިކެޓު ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހަށް ލިބިވަޑައިގަތުމާއެކު، ނަޝީދާއި އޭނާއަށް ތާއީދު ކުރައްވާ މެމްބަރުން ގެންދަވަނީ އެމްޑީޕީގެ ތެރެއިން "ފިކުރެއްގެ ދިރުން" ނަމުގައި ގޮތްޕެއް އުފައްދާ އެ ގޮތްޕަށް މެމްބަރުން އިތުރު ކުރުމުގެ މަސައްކަތް ކުރަމުންނެވެ. 

Advertisement

އެއާއެކު އެމްޑީޕީގެ ދެ ރައީސުންނަށް ތާއީދުކުރައްވާ މެމްބަރުންގެ މެދުގައި ބަދަލު ކުރަމުންދިޔަ ބަހުގެ ހަމަލާތައްވެސް ވަނީ ހޫނުވެގެން ގޮސްފަ އެވެ. 

އެގޮތުން ނަޝީދަށް ގިނަ ފާޑުކިޔުންތަކެއް މީގެ ކުރިންވެސް އަމާޒުކުރައްވާފައިވާ ޝަރީފު ވިދާޅުވީ ދުނިޔޭގެ އެއްވެސް ތަނެއްފައި އެންޓި-ޕާޓީ ހަރަކާތް ހިންގާ މީހަކަށް އެ ޕާޓީއެއްގައި ނުހުރެވޭނެ ކަމަށެވެ. 

އެހެން ނަމަވެސް ރާއްޖޭގައި މިހާރު ކަންކަން ހިނގަމުންދަނީ އެ މަގަށްކަމަށް އޭނާ ވިދާޅުވި އެވެ.

އެމްޑީޕީ އިސްވެ އޮވެ ހިންގާ ސަރުކާރަށް ކުޑަމީސްވާ ގޮތަށް، އަދި ސަރުކާރުން ކުރާ ކަންކަމަށް ފާޑުކިޔައި، ސަރުކާރު ބަދުނާމުވާ ގޮތަށް ނަޝީދާއި އޭނާގެ ވަފާތެރިން ވާހަކަދައްކަަވަމުންދާކަން ފާހަގަކުރައްވާ ނަޝީދާއި މެދު ފިޔަވަޅު އެޅުމަށް މީގެ ކުރިންވެސް ޝަރީފު ވަނީ ގޮވާލައްވާފަ އެވެ.