އިޒްރާއިލުން ސީރިޔާގެ ހަލަބް އެއަރޕޯޓަށް ދިން ހަމަލާއަށް ފަހު އެ އެއަރޕޯޓު ހުޅުވައިފިއެވެ.

މިދިޔަ އަންގާރަދުވަހު ހަލަބް އެއަޕޯޓަށް ވައިގެ މަގުން ދިން ހަމަލާތަކުގެ ސަބަބުން ރަންވޭއަށް ލިބިނު ގެއްލުން ތަކުގެ ސަބަބުން އެހީގެ ތަކެތި ހިފައިގެން ހަލަބް އެއަރޕޯޓަށް ދިޔް ބޯޓުތައް ވަނީ އަނބުރާ ގޮސް ލަޓާކިއާ އަދި ދަމަސްކުސް އެއަރޕޯޓަށް ޖައްސައިފައެވެ. އަދި މީގެ އިތުރުން އެ އެއަރޕޯޓަށް ޖައްސަން އައި ހުރިހާ ފްލައިޓް ތަކެއްވެސް ވަނީ އަނބުރާ ގޮސް އެހެން ތަންތަނަށް ޖައްސައިފައެވެ.

ސިރިޔާގެ ޓްރާންސްޕޯޓް މިނިސްޓްރީގެ އޮފިޝަލަކު މީޑިއާ އަށް މައުލޫމާތު ދެމުން ބުނެފައިވަނީ ހުކުރުދުވަހުގެ 8 ކުން ފަށައިގެން އެއަރޕޯޓް ހުޅުވާލި ކަމަށާއި ހަލާކުވެފައި ހުރި ހުރިހާ ތަނެއް މަރާމާތު ކުރެވިފައިވާކަމަށެވެ.

ސީރިޔާގައި ހަރަކާތްތެރިވާ އިންސާނީ ހައްޤުތަކަށް ގޮވާލާ ޖަމާޢަތަކުން ބުނެފައިވަނީ އިޒްރާއިލްގެ ހަމަލާތަކުގައި ތިން މީހަކު މަރުވެފައި ވާކަމަށެވެ.

މިފަދަ ހާލަތެއްގައި ހާލުގައި ޖެހިފައި ތިބި މީހުންނަށް ބޭނުންވާ އެހީގެ ތަކެތި ފޯރުކޮށްދިނުމަށް ބޭނުކުރެވެމުންދާ ދޮރެއް ބަންދުވުމުކީ ވަރަށް ކަންބޮޑުވާ ކަމެއް ކަމަށް ސީރިޔާ އަށް ކަނޑައަޅުއްވައިފައި ހުރި ޔޫއެން ގެ ކޯޑިނޭޓަރ އަލް މުސްޠަފާ ބެންލަމްލިހް ވަނީ ވިދާޅުވެފައެވެ.

އަންގާރަ ދުވަހު އިޒްރާއިލުން ދިން މި ހަމަލާއަކީ ސީރިޔާ އާއި ތުރްކިޔޭ އަށް އައި ބިންހެލުން ތަކުގެ ފަހުން ސީރިޔާ އަށް އިޒްރާއިލުން ދިން  ދެވަނަ ހަމަލާއެވެ.

ފެބްރުއަރީ 19 ވަނަ ދުވަހު އިޒްރާއިލުން ވަނީ ސީރިޔާގެ ދަމަސްކަސް ގެ އެއަރޕޯޓަށް ވެސް ހަމަލާދީފައެވެ. މި ހަމަލާތަކުގެ ސަބަބުން 15 މީހަކު ވަނީ ނިޔާވެފައެވެ.

ފާއިތުވި އަހަރުތަކުގައި އިޒްރާއިލުން ވަނީ ސީރިޔާގެ ހަލަބް އަދި ދަމަސްކަސް ގެ އެއަރޕޯޓަށް ދޭތެރެދޭތެރެއިން ހަމަލާދީފައިވެއެވެ.