އައްޑޫ ހިތަދޫ ބޯޓެއް ކަމަށްވާ އާގަލަ ބޯޓުން ގެއްލުނު އިންޑިޔާ މީހާ ހޯދުމަށް ކުރަމުންދިޔަ މަސައްކަތް ހުއްޓާލައިފި ކަމަށް އެމްއެންޑީއެފް އިން ބުނެފިއެވެ.

އާގަލަ ބޯޓުން ގެއްލުނު މީހާ ގެއްލުނީ އައްޑޫ އިން ފުރައިގެން މާލެ އަށް ދަތުރު ކުރަމުން ދަނިކޮށް މ ތުވަރު ކައިރިއަށް އަޑިއަށް ގޮސްގެނެވެ. ބޯޓު އަޑިއަށް ދިޔައީ އެ ބޯޓުގައި އަލިފާން ރޯވެގެނެވެ.

ބޯޓު އައްޑޫއިން ފުރައިގެން އައީ 15 މީހަކާއި އެކުއެވެ. ބޯޓުގައި އަލިފާން ރޯވުމުން ބޯޓުގައި ތިބި 15 ފަޅުވެރިންވެސް ފުއްމާލިކަމަށް ބޯޓުގެ ފަޅުވެރިން ވަނީ ބުނެފައެވެ. އެމްއެންޑީއެފް ކޯސްޓުގާޑުން ސަލާމަތް ކޮށްފައިވަނީ 14 މީހުންނެވެ.

ބޯޓުން ގެއްލުނު އިންޑިޔާ މީހާ ހޯދުމަށް އެމްއެންޑީއެފް ކޯސްޓްގާޑުން ސަރޗް އޮޕަރޭޝަން 72 ގަޑިއިރަށް ކުރިއަށް ގެންގޮސްފައިވެއެވެ. މި އޮޕަރޭޝަނުގައި ކަނޑާއި ވައިގެ މަގުން ޖުމްލަ 2164ސކމ ގެ ސަރަހައްދެއް ބެލިފައިވާ ކަމަށް އެމްއެންޑީއެފް އިން ވިދާޅުވިއެވެ.

ބޯޓުގައި ރޯވިއިރު، ބޯޓުގައި ތިބީ ފަސް ދިވެހިންނާއި އިންޑިއާގެ ފަސް މީހަކާއި އަދި ބަންގްލަދޭޝްގެ ފަސް މީހެކެވެ..

އަލިފާނުގެ ހާދިސާގައި އާގަލަ ބޯޓަށް ލިބުނު ގެއްލުންތަކުގެ ސަބަބުން އެ އުނޅަދުވަނީ އަޑިއަށް ގޮސްފައެވެ.