މާލެ ސިޓީގެ މިއަހަރުގެ ސްޓެރެޓެޖިކް ޕްލޭން ގެ ދަށުން ޑިޖިޓަލް މާލެ ސިޓީ ގެ އަމާޒަށް ވާސިލް ވުމަށް ލެޑް ސްކްރީން ހިމެނޭ ޑިޖިޓަލް ސްމާޓް ސްޓްރީޓް ލައިޓް އިފްތިތާހުކޮށްފިއެވެ.
މި މަޝްރޫޢު ފެށުމަށް ބޭއްވުނު ރަސްމިއްޔާތައް ފަހު "ވޮއިސް" އަށް މައުލޫމާތު ދެއްވަމުން މާލޭ މޭޔަރ ޑރ މުހައްމަދު މުޢިއްޒު ވިދާޅުވީ މިއަދު ފެށިގެން މިދިޔައީ ވަރަށް މުހިންމު މަޝްރޫޢެއް ކަމަށެވެ.
ޑރ. މުޢިއްޒު ވިދާޅުވީ ޗައިނާ ސަފީރާއި ބައްދަލުވި ފަހަރަކު މާލެ ސިޓީ ކައުންސިލްގެ މި އަމާޒަށް ވާސިލް ވުމަށް ޗައިނާގެ އެހީއަށް އެދެވުނު ކަމަށެވެ. އެއެދުމުގެ ދަށުން ޔުނާން ޕްރޮވިންސާއި މާލެ ސިޓީ އާއި އޮންނަ ގާތް ގުޅުމުގެ ދަށުން ޔުނާން ޕްރޮވިންސާއި މާލެ ސިޓީ އާއި ދެމެދު ވާހަކަ ދެކެވި އެ ޕްރޮވިންސްގެ ބަޖެޓް ތަންދޭ މިންވަރުން 10 ޕޯލް ހަދިޔާ ކޮށްފައި ވާކަމަށެވެ.
"މިއީ ސީދާ އެމްބަސީގެ ހަދިޔާއެއް ނޫން، އެމްބަސީގެ ހަދިޔާއަކަށް ދެއްވީ މިހާރު މާލޭގައި މިހާރު ބަދަލު ކުރެވިފައިހުރި ސްޓްރީޓް ލައިޓް ތައް، މީ ޔުނާން ޕްރޮވިންސުން އަޅުގަނޑުމެނަށް ދިން ހަދިޔާއެއް، ދެން މިވަގުތު އެބޭފުޅުންގެ ބަޖެޓްގެ ތެރެއިން ދެވެން އޮތީ 10 ޕޯލް، އެހެންވީމަ ޕައިލެޓް ޕްރޮޖެކްޓެއްގެ ގޮތުގައި"
މޭޔަރ މުޢިއްޒު ވިދާޅުވިއެވެ.
މާލެ ސިޓީ ކައުންސިލުން ހަރުކުރި މި ޕޯލްތައް ހަރުކޮށްފައިވަނީ ބޮޑުތަކުރުފާނު މަގުގައެވެ. މި މަޝްރޫޢޫ ފައްޓަވާފައިވަނީ ޗައިނާ އެމްބަސީގެ ކުރިމަތީގައެވެ.
މި ހަފްލާގައި ޗައިނާއިން ރާއްޖެއަށް ކަނޑައާޅުއްވާފައިވާ ސަފީރު ހާރ އެކްސިލެންސީ ވެންގް ލިޒިންއާއި ޔުނާން ޕްރޮވިންސްގެ ވަފުދުގެ ވެރިޔާ މިސްޓަރ މާ ޒުއޮޒިން ބައިވެރިވެޑައިގެންނެވިއެވެ.
މާލެ ސިޓީގައި ހަރުކުރެވުނު ސްމާޓް ސްޓްރީޓް ލައިޓް
ޑރ. މުޢިއްޒު ވިދާޅުވީ މިވަގުތައް ލިބުނު 10 ޕޯލް ބޮޑުތަކުރުފާނު މަގުގައި ހަރުކުރި ނަމަވެސް ކުރިއަށް އޮތް ތަނުގައި މާލޭގެ އެތެރޭގައި މިފަދަ ޕޯލްތައް ހަރުކުރެވޭނެ ކަމަށެވެ.
މޭޔަރު މުޢިއްޒު އިތުރަށް ވިދާޅުވީ އެ ޕޯލްގައި ވައިފައި ރައުޓަރެއް ހުންނަ ކަމަށާއި، ސިޓީ ކައުންސިލުން ހިލޭ ވައިފައި ދޫކުރާނެ ކަމަށެވެ. އަދި ސްމާޓް ސްކްރީނުން ރައްޔިތުންނަށް ދޭން ބޭނުންވާ މެސެޖްތައް ދެވޭނެ ކަމަށާއި، ވިޔަފާރީގެ އުސޫލުން އިސްތިހާރު ކުރުމަށްވެސް އެ ސްކްރީން ތައް ބޭނުންކުރެވޭނެ ކަމަށެވެ. އަދި އެކަމަށް އުސޫލެއް ކަނޑަ ނާޅާ ކަމަށާއި އެކަމަށް އުސޫލެއް ކަނޑައަޅައި އިއުލާނު ކުރުމަކީ ގެންގުޅޭ ޕްލޭނެއް ކަމަށް މުޢިއްޒު ވިދާޅުވިއެވެ.
މީގެ އިތުރުން ޕޯލްގައި ސްޕީކަރެއް ހުންނަ ކަމަށާއި ކައުންސިލްގެ އެންގުންތައް އެންގުމަށް ސްޕީކަރު ބޭނުންކުރެވޭނެ ކަމަށް މުޢިއްޒު ވިދާޅުވިއެވެ. އަދި ޕޯލްގައި މޫސުން ދެނެގަންނަ ސިސްޓަމެއްވެސް ހުންނަ ކަމަށް މޭޔަރު ވިދާޅުވިއެވެ.
މުޢިއްޒު ވިދާޅުވީ ޕޯލްގައި ހުންނަ ކެމެރާއިން ތައް މޮނިޓަރ ކުރާނީ ސިޓީ ކައުންސިލްގެ ސީސީޓީވީ މޮނިޓަރިންގް ސްޓޭޝަނުން ކަމަށެވެ. އަދި ފުލުހުން އެދިލައްވާ ކޮންމެ ފަހަރަކު އެ ފުޓޭޖްތައް ލިބޭނެ ކަން މުޢިއްޒު ފާހަގަ ކުރެއްވިއެވެ.
Advertisement
This content is created and paid for by advertisers and does not involve Voice Journalists
