މި ފެށޭ އޭޕްރީލް މަހުން ފެށިގެން ގޭދޮރުމަތިން ކުނި ނުނަގާނެ ކަމަށް ވޭސްޓް މެނޭޖްމަންޓް ކޯޕަރޭޝަން އިން ބުނެފިއެވެ.

އެކޯޕަރޭޝަނުން މިއަދު ބޭއްވި ނޫސްވެރިންގެ ބައްދަލު ވުމެއްގައި ވެމްކޯގެ މެނޭޖިންގ ޑިރެކްޓަރ ޔޫސުފް ސިރާޖު ވިދާޅުވީ އަންނަ މަހުން ފެށިގެން ކުނި ނަގަމުން ދާނީ އިމާރާތުގެ އެންމެ ތިރިން ކަމަށާއި، ގޭދޮރުމަތިން ކުނި ނެގުމުގެ ޚިދްމަތް ދެން ނުދޭނެކަމަށެވެ.

އަންނަ މަހުން ފެށިގެން ވެމްކޯއިން ދެމުންގެންދާ ޚިދްމަތްތަކުގެ ފީ ދެން ނަގާނީ ސްޓެލްކޯގެ ބިލާއި އެއްކޮށްލައިގެން ކަމަށް ވެމްކޯ އިން ވަނީ ބުނެފައެވެ. އަދި އެކަމަށް ކަނޑައަޅާނެ އަގުތަކެއް ނިންމިފައި ނުވިޔަސް އެކަމާއި މެދު ސްޓެލްކޯ އާއި އެކު މަޝްވަރާ ކުރެވެމުންދާ ކަމަށް ވެމްކޯއިން ވަނީ ބުނެފައެވެ.

Advertisement

ނޫސްވެރިންގެ ބައްދަލުވުމުގައި ވެމްކޯގެ މެނޭޖިން ޑިރެކްޓަރ ސިރާޖް ވިދާޅުވީ ވެމްކޯއަށް ލިބެންޖެހޭ އާމްދަނީގެ ބޮޑު ބައެއް ނުލިބިވާކަމަށެވެ. އެހެންނަމަވެސް މި ގެނައި ބަދަލާއެކު ބިލަށް ފައިސާ ހޯދުމުގައި މިހާރު ދިމާވަމުންދާ ދަތިތައް ހައްލުވާނެ ކަމަށް ސިރާޖް ވިދާޅުވިއެވެ. ސިރާޖް ވިދާޅުވީ އަންނަ މަހުން ފެށިގެން ސްޓެލްކޯ ބިލުގެ ތެރޭގައި ކުނި ބިލު ހިމަނާއިރު ސްޓެލްކޯގައި ރަޖިސްޓްރީކޮށްފައިވާ 50،000 އަށް ވުރެ ގިނަ ގޭބިސީއަށް ކުނި ބިލް ފޮނުވާނެކަމަށެވެ. މިހާރު ވެމްކޯގައި ރަޖިސްޓްރީކޮށްފައިވަނީ 24،000 ގޭބީސީއެކެވެ. ސިރާޖު ވިދާޅުވީ މިކަމާ ގުޅޭގޮތުން ޝަކުވާ ހުށަހެޅުމުގެ ފުރުސަތު ކަސްޓަމަރުންނަށް ހުޅުވާލާނެ ކަމަށެވެ.

ވެމްކޯއިން ވަނީ ދާދި ފަހުން އެކުންފުނިން ކުނި އުކައިދޭ އަގުތަކަށްވެސް ބަދަލުތަކެއް ގެނެސްފައެވެ.