ފެބްރުއަރީ 6 ވަނަ ދުވަހު ތުރްކިޔޭ އާއި ސީރިޔާ އަށް އައި ބިންހެލުންތަކުގައި އެތައް ބަޔަކު ވަނީ މަރުވެގެން ގޮއްސައެވެ.

ކިތަންމެ ކުއްޖެއް ވަނީ ޔަތީމު ވެފައެވެ. އެތައް މަންމަޔަކު ދަރިން ނެތި ގެއްލުމުގެ ހިތާމައިގައި އެބަތިއްބެވެ. އެއްބައި އާއިލާތައް އެކުއެކީ މަރުވެގެން ގޮސްފައި ވެއެވެ.

އެތައް މައިންބަފައިންނެއް ދަރިން ވަކިވުމުގެ ހިތާމައިގައި ތިބި އިރު ކާރިސާ އަސް 34 ދުވަސް ފަހުން ތުރްކިޔޭގެ ދެމަފިރިއަކަށް އެދެމީހުންގެ ދަރިފުޅު ވަނީ ހަވާލުކުރެވިފައެވެ.

ބިންހެލުން އައިރު އެކުއްޖާގެ އުމުރަކީ 6 ދުވަހެވެ. ބިންހެލުމާއި އެކު އެއާއިލާ ދިރިއުޅެމުންދިޔަ އިމާރާތް ވެއްޓި ދެމަފިރިންނާއި ދަރިފުޅު އިމާރާތުގެ ދަށުވިއެވެ. ވެއްޓުނު އިމާރާތުގެ ގައުތަކުގެ ދަށުން ތުއްތު ކުއްޖާ ނަގައިގެން ގެންގޮސް ފަރުވާ ދިނުމަށް ހަޓޭޔާގެ ހޮސްޕިޓަލްގެ އައިސީޔޫގައި އެޑްމިޓް ކުރެވުނެވެ.

އަދި އެ ދެމަފިރިން ގައު ތަކުގެ ދަށުން ސަލާމަތްކުރެވި ނެރެވުމަށް ފަހު އެމީހުން އެމީހުންގެ ދަރިފުޅު ހޯދުމަށް މަސައްކަތް ފެށީއެވެ. ސަރުކާރުގެ އެކި އޮތޯރިޓީތަކަށް ލިޔުންތައް ހުށައަޅައި ހެދިއެވެ.

ބިންހެލުން އައި ސަރައްހައްދުތަކުން ސަލާމަތްކުރެވުނު ތުއްތު ކުދިން އިތުރު ފަރުވާ ދިނުމަށާއި ރައްކާތެރިކަމަށް ޓަކައި ތުރްކިޔޭގެ ވެރިކަން ކުރާ އަންކާރާ އަށް ބަދަލުކުރެވުނެވެ.

"އަހަރެން އެންމެ ވަގުތުކޮޅަކަށްވެސް އުންމީދު ކަނޑައެއްނުލަން" ތުއްތު ކުއްޖާގެ ބައްޕަ މީޑިއާ އަށް ބުނެފައިވެއެވެ.

ތުރްކިޔޭ ގެ ސަރުކާރުން އެކުއްޖާ އެކުއްޖާގެ އާއިލާ އާއި ހަވާލުކޮށްފައިވަނީ އެ ޤައުމުގެ މިނިސްޓްރީ އޮފް ފެމިލީ، ލޭބަރ އެންޑް ސޯޝަލް ސާވިސަސް އިން ޑީއެންއޭ ޓެސްޓު ހަދައި އެކުއްޖާގެ ޑީއެންއޭ އާއި އެދެމަފިރިންގެ ޑީއެންއޭ ދިމާވާކަން ޔަޤީން ކުރުމަށް ފަހުގައެވެ.