ދިވެހިރާއްޖޭގައި އިންޓްނެޓު އޮތީ އިމެއްނެތި އެމީހަކު ބޭނުންގޮތަކަށް ބޭނުން ކުރުމަށް ހުޅުވާލެވިފައިކަމަށް މަޖިލީހުގެ ކުޑަހުވަދޫ ދާއިރާގެ މެމްބަރު އަހުމަދު އާމިރު ވިދާޅުވެއްޖެ އެވެ.

ސައިބާ ކްރައިމްގެ އަމަލުތަކަށް އަދަބު ކަނޑައެޅުމަށް ޤާނޫނުލްޢުޤޫބާތަށް ހުށައެޅި އިސްލާހަށް މަޖިލީހުގައި ބަހުސްކުރަން ފައްޓަވަމުން އާމިރު ވަނީ އިމެއްނެތި އިންޓަނެޓު ބޭނުން ކުރެވޭގޮތަށް ރާއްޖޭގައި ހުޅުވާލާފައި އޮތް އޮތުމާއި ގުޅިގެން ކަންބޮޑުވުން ފާޅުކުރައްވާފަ އެވެ. 

އާމިރު ވިދާޅުވީ ސައިބާ ކްރިމްއާއި ގުޅުންހުރި އަމަލުތަކަށް އަބަދު ކަނޑައެޅުމުން އެކަނި، އެ ބިލު ހުށައެޅި މަޤްޞަދު ހާސިވުވާނެކަމަށް ޤަބޫލުފުޅު ނުކުރައްވާކަމަ ށެވެ. 

ދުނިޔޭގެ ތަހުޒީބުވަމުން އަންނަ ޤައުމުތަކުގައި ވެސް އިންޓަނެޓު ބޭނުންކުރުމަށް އިންތަކެއް ނުވަތަ ރެސްޓްރިކްޝަންތަކެއް ކަނޑައަޅާފައި އޮންނައިރު ރާއްޖޭގައި އެފަދަ އެއްވެސް ރެސްޓްރިކްޝަނެއް ނެތްކަން އާމިރު ފާހަގަކުރެއްވި އެވެ. އަދި ވިދާޅުވީ ސަބީލިއްލާހިޔައަށް އިންޓަނެޓު ބޭނުންކުރެވޭގޮތަށް ހުޅުވާލާފައި އޮތުމަކީ އޭގެ ބޭނުން ނަހަމަގޮތުގައި ހިފާ ފަރާތްތަކަށް އޮތް ބޮޑު ފުރުސަތެއް ކަމަށެވެ. 

އާމިރު ވިދާޅުވީ އެއްވެސް އިމެއްނެތި އިންޓަނެޓު ބޭނުން ކުރެވޭގޮތަށް އޮތް އޮތުމަކީ ވަރަށް ބޮޑު ނުރައްކަލެއް ކަމަށެވެ. އަދި އެކަމުގެ ސަބަބުން އަދުގެ ޖީލު ހަލާކުވަމުންދާ ކަމަށެވެ. 

އެކަންކަން ފާހަގަކުރައްވާ އާމިރުވަނީ ރާއްޖޭގައިވެސް އިންޓަނެޓު ބޭނުން ކުރުން ރެސްޓްރިކްޓު ކުރުމަށް ގޮވާލައްވާފަ އެވެ. އިންޓަނެޓުގެ ޒަރިއްޔާއިން ކުރާ ކުށްތައް މަދުކުރުމަށް އެފަދަ ރެސްޓްރިކްޝަން ތަކަކީ މުހިންމުކަމެއް ކަމަށް އާމިރު ވިދާޅުވި އެވެ. 

އަދި ދައުލަތުން އެކަމަށް ސަމާލުކަންދީ އިންޓަނެޓު ބޭނުންކުރުމުގައި ވެސް ވަކި ހައްދުތަކެއް ކަނޑައަޅާ، ކޮންމެވެސް ވަރެއްގެ ރެސްޓްރިކްޝަންތަކެއް ލުމަށް އާމިރު ވަނީ ގޮވާލައްވާފަ އެވެ.