ކުރީގެ ރައީސް އަދި އިދިކޮޅު ރިޔާސީ ކެންޑިޑޭޓް ރައީސް ޔާމީން އަބްދުލްގައްޔޫމް މިނިވަން ކުރުމަށް ގޮވާލައި އިދިކޮޅުން ސިލްސިލާކޮށް ކުރިއަށް ގެންދާ އިހްތިޖާޖު ހުއްޓުވޭނީ އެމަނިކުފާނަށް އިންސާފު ލިބިމުންކަމަށް އިދިކޮޅުގެ ހަރަކާތު ކޮމިޓީގެ ރައީސް އަދި ހޯރަފުށީ ދާއިރާގެ ކުރީގެ މެންބަރު މުހައްމަދު އިސްމާއިލް ވިދާޅުވެއްޖެއެވެ. 

ވ. އާރަށް މައްސަލާގައި ރައީސް ޔާމީންގެ މައްޗަށް ދައުލަތުން ކޮށްފައިވާ ދެ ދައުވާ ސާބިތުވުމާއި ގުޅިގެން އެމަނިކުފާނު 11 އަހަރަށް ޖަލަށް ލުމަށް ފާއިތުވި ޑިސެމްބަރު މަހު ހުކުން ކުރުމާއި ގުޅިގެން އިދިކޮޅުން އަންނަނީ ސިލްސިލާކޮށް ކޮންމެ ރެއަކު މާލޭގެ މަގުމަތީގައި މުޒާހަރާ ކުރަމުންނެވެ. 

އެގޮތުން ކުރިއަށް ގެންދާ މުޒާހަރާގެ ތެރެއިން އެތައް ބަޔަކު މިހާތަނަށް ހައްޔަރު ކޮށްފައިވާއިރު، ގިނަ ބަޔަކަށް އެކި އަނިޔާތައް ވަނީ ވެފައެވެ. 

Advertisement

އެކަމާއި ގުޅިގެން މުހައްމަދު އިސްމާއިލް ކުރެއްވި ޓްވީޓެއްގައި ވިދާޅުވީ، ރާއީސް ޔާމީން މިނިވަންކުރުމަށް ގޮވާލާ ގާނޫނީ  އިމުގެތެރެއިން ކުރިޔައްގެންދާ ސުލްހަވެރި އިހުތިޖާޖްތައް އެސްއޯ ފުލުހުން ފޮނުވާ ބިރުދައްކައިގެން ނުހުއްޓުވޭނެކަމަށެވެ.

"ހުއްޓޭނީ ރައީސް ޔާމީން ގެއައް ގެނެސް ރައީސް ޔާމީނައް  އިންސާފްލިބުން" މުހައްމަދު އިސްމާއިލް ވިދާޅުވި އެވެ. 

އިދިކޮޅު ކޯލިޝަނުން ކުރިއަށް ގެންދާ ސުލްހަވެރި އިހްތިޖާޖު ހުއްޓުވުމަށް ހާލަތާއި ނުބައްދަލު ބާރުގެ ބޭނުން ފުލުހުން ކުރަމުންދާތީ ޓްރާސްޕޭރެންސީން މޯލްޑިވްސް އިންވެސް ވަނީ ކަންބޮޑުވުން ފާޅުކޮށްފައެވެ. އަދި އެކަމަކީ ރާއްޖޭގެ ގާނޫނު އަސާސީން ރައްޔިތުންނަށް ކަށަވަރުކޮށްދީފައިވާ ޚިޔާލު ފާޅުކުރުމުގެ މިނިވަންކަމަށް ހުރަސްއެޅޭ ކަމެއް ކަމަށްވެސް އެ ޖަމިއްޔާ އިން ވަނީ ބުނެފައެވެ.