މަސައްކަތްތެރިންނަށް ރޯދަ އިނާޔަތް ބޮޑުކޮށްދިނުމަށް މަޖިލީހަށް ހުށައެޅި ކުއްލި މައްސަލަ ބޭރުކޮށްލައިފި އެވެ. 

އެ މައްސަލަ މަޖިލީހަށް ހުށައަޅުއްވާފައިވަނީ މަޖިލީހުގެ ނައިފަރު ދާއިރާގެ މެމްބަރު އަހުމަދު ޝިޔާމެވެ. 

އެ މައްސަލައިގައި މެމްބަރު ވިދާޅުވީ ރާއްޖޭގެ ބާޒާރުގައި ތަކެތީގެ އަގު އިންތިހާއަށް ބޮޑުވެ ރައްޔިތުން އަތްނުފޯރާފަށަށް ކާބޯތަކެތީގެ އަގުތައް އުފުލިފައިވާތީ، އެތައް ދިވެހި ރައްޔިތުންނެތް ވަރަށް ނިކަމެތި ހާލުގައި އުޅެމުންދާ ކަމަށެވެ.

Advertisement

ރޯދަމަހަކީ ކެއިން ބުއިމަށް އެހެން މަސްތަކަށްވުރެ އިތުރަށް ޚަރަދުތަކެއް ހިނގާނެ މަހެއްކަން އެ މައްސަލައިގައި ފާހަގަކުރައްވާފައި ވެއެވެ. 

އެހެންކަމުން ރޯދަ މަހުގެ އިނާޔަތް ބޮޑުކޮށްދިނުމަށާއި، ވަޒީފާއާ ބެހޭ ގާނޫނު އަލުން މުރާޖައާކޮށް، ފަންނުތަކުގެ މަސައްކަތްތެރިންނާއި މަސްވެރިންނާއި ދަނޑުވެރިންފަދަ ސިނާއަތްތަކުގެ މަސައްކަތްތެރިންނަށް ވެސް ރޯދައިގެ އިނާޔަތް ލިބޭނެ ހަމަހަމަ އުސޫލެއް ޤާއިމްކޮށް އެ ހުރިހާ ފަރާތްތަކަށް އިނާޔަތް ދިނުމަށް މެންބަރުގެ މައްސަލައިގައި ވަނީ ސަރުކާރަށް ގޮވާލާފައެެވެ.

މި މައްސަލައަށް މަޖިލީހުގައި ބަހުސް ކުރަން 15 މެމްބަރަކު ވޯޓުދެއްވިއިރު، 27 މެމްބަރަކު ވަނީ މި މައްސަލަ މަޖިލީހުން ބޭރުކުރުމަށް ވޯޓުދެއްވާފައެވެ.

ރޯދަ މަހުގެ އިނާޔަތް ބޮޑުކޮށްދިނުމަށް އެދި މައްސަލައެއް ހުށަހަޅާފައިވާއިރު، ވަޒީފާ އަދާކުރާ މުސްލިމު ކޮންމެ މުވައްޒަފަކަށް ރޯދަމަސް ފެށުމުގެ ކުރިން ރޯދަ އެލަވަންސްގެ ގޮތުގައި މިހާރު ވަޒީފާއާ ބެހޭ ގާނޫނުން ލާޒިމްކޮށްފައިވަނީ މަދުވެގެން 3،000 ރުފިޔާއެވެ.

ރޯދަމަސް ފެށެން ގާތްގަނޑަކަށް ހަފްތާއަކަށް ވެފައިވާއިރު އަދިވެސް ސަރުކާރުގެ ބައެއް މުއައްސަސާތަކުގެ މުވައްޒަފުންނަށް ރޯދަ އެލެވެންސް ލިބިފައެއް ނުވެއެވެ. އަދި ބައެއް އަމިއްލަ ކުންފުނިތަކުންވެސް ރޯދައެލެވެންސް ނުދޭކަމަށް މަސައްކަތްތެރިން ދަނީ ބުނަމުންނެވެ.