އަވައްޓެރި ޕާކިސްޠާނުގެ އިންތިޚާބު ގާތްވަމުންދާ ވަރަކަށް ކުރީގެ ބޮޑުވަޒީރު އަދި މިހާރުގެ އިދިކޮޅު ލީޑަރ ޢިމްރާން ޚާން އަށާއި އޭނާގެ ޕާޓީއަށް ފިއްތުންތައް ކުރިމަތިކުރަމުންދާވަރު ވަނީ ބޮޑުވެފައެވެ.

ޕާކިސްޠާނުގެ ކުރީގެ ބޮޑުވަޒީރު ޢިމްރާން ޚާން ހައްޔަރުކުރުމަށް އިސްލާމްއާބާދުގެ ކޯޓުން ނެރެފައިވާ އަމުރު ގާއިމްކުރުމަށް ކަމަށްބުނެ ޕާކިސްޠާނު ފުލުހުންވަނީ ޢިމްރާން ޚާން ހައްޔަރުކުރުމަށް އޭނާ ދިރިއުޅޭ ގޭ ދޮށަށް ގޮސްފައެވެ.

ޢިމްރާން ޚާން ހައްޔަރުކުރުމަށް ފުލުހުން ދިޔުމުން ޢިމްރާން ޚާންގެ ޕާޓީ ޕާކިސްޠާން ތަހްރީކޭ-އެ އިންސާފް ޕާޓީ ގެ ސަޕޯޓަރުންނާއި ދެމެދުގައި ވަނީ ކުރިމަތިލުން ތަކެއް ހިނގައިފައެވެ.

Advertisement

އެގޮތުން ފުލުހުން ވަނީ ޢިމްރާން ޚާންގެ ގޭދޮށަށް އެއްވެ ފުލުހުންނާއި ދެކޮޅަށް އަޑުއުފުލި ޕީޓީއައިގެ ސަޕޯޓަރުންގެ ގަޔަށް ކަރުނަ ގޭސް ޖަހައިފައެވެ. އަދި ބާރު ޕްރެޝަރުގައި ފެންޖަހައިފައި ވެއެވެ. މަންޒަރު ދުށް ނޫސްވެރިން ރިޕޯޓް ކޮށްފައިވަނީ ޕީޓީއައިގެ ސަޕޯޓަރުން ފުލުހުންނާއި ދިމާއަށް އޮއްގާ އުކައި ހަމަލާދީފައިވާކަމަށެވެ.

މިކަމާއި ގުޅިގެން ޢިމްރާން ޚާން ކޮށްފައިވާ ޓްވީޓުގައި ބުނެފައިވަނީ "ޕޮލިހުން އައީ އަހަރެން ހައްޔަރު ކުރަން، އެމީހުންނަށް ހީވަނީ ޢިމްރާން ޚާން ޖަލަށް ގޮސްފިނަމަ މި ޤައުމު އެމީހުންކުރާ ކަންކަން ނުބަލައި ލޯމަރާފާނެއޭ، އެމީހުންގެ އެވިސްނުން ގޯސްކަން ސާބިތު ކޮށްދޭންވާނެ، އަހުރެން ހައްޔަރު ކުރިއަސް ހަޤީޤީ މިނިވަންކަން ހޯދުމަށް މަސައްކަތްކުރަން ވާނެ" މިހެނެވެ.

"އަހަންނަށް ކަމެއް ވެއްޖެނަމަ، އެމީހުން އަހަރެން ޖަލަށްލައިފިނަމަ، ނޫނީ އަހުރެން މަރައިލައިފިނަމަ، އަހަންނާއި ނުލައިވެސް ހައްޤަށްޓަކައި މިނިވަންކަމަށް ޓަކައި މަސައްކަތް ކުރެވޭނެ ކަން ސާބިތުކޮށްދޭންވާނެ" ޢިމްރާން ޚާން ބުނެފައިވެއެވެ.

މީގެ ދުވަސްކޮޅެއް ކުރިންވެސް ޕާކިސްޠާނު ފުލުހުން ހައްޔަރުކުރުމުގެ އަމުރު ހަވާލުކުރުމަށް ކަމަށް ބުނެ ޢިމްރާން ޚާން ގެ ގެއަށް ވަނީ ވަދެފައެވެ. އަދި އޭނާ ހައްޔަރުކުރުމަށް އެފަހަރު ކުރި މަސައްކަތް ނާކާމިޔާބުވީ އެވަގުތު އޭނާ ގޭގައި ނެތުމުންނެވެ.

ޢިމްރާން ޚާންގެ މައްޗަށް ކޮށްފައިވާ އެއް ތުހުމަތަކީ މިދިޔަ އަހަރު އޭނާ ދިން ސްޕީޗެއްގައި އަންހެން ފަނޑިޔާރަކަށް ބިރުދެއްކިކަމުގެ ތުހުމަތެވެ. މީގެ އިތުރުން ނާޖާއިޒު ގޮތުގައި ބޭރުގެ ފަރާތްތަކުން ހަދިޔާ ލިބިގަތްކަމުގެ ތުހުމަތުތައްވެސް އޭނާގެ މައްޗަށް ވަނީ ކޮށްފައެވެ.

އޭޕްރީލް 30 ގައި އެޤައުމުގައި ބޭއްވުމަށް ހަމަޖެހިފައިވާ ޕާލިމެންޓް އިންތިޚާބު އިންސާފުވެރި ވެދާނެ ކަމާއި މެދު ސުވާލު އުފައްދައި  އޭނާ ވަނީ ޢާންމު އިންތިޚާބެއް ބޭއްވުމަށް ގޮވައިލައިފައެވެ. އަދި އޭނާ އާއި މެދު ކުރެވިފައިވާ ތުހުމަތުތަކަކީ ދޮގެއް ކަމަށް ވެސް އޭނާ ބުނެފައެވެ.

މިހާރު ޕާކިސްޠާނުގެ ބޮޑު ވަޒީރުކަން ކުރަމުންދާ ޝެހެބާޒް ޝަރީފް ވަނީ ޢާންމު އިންތިޚާބެއް ބޭއްވުމާއި ދެކޮޅު ހަދައިފައެވެ.