ޢިރާޤުގެ ކުރީގެ ރައީސް ޞައްދާމް ހުސެއިން ދަންޖައްސައި މަރައިލުމަށް ފަހު އެއްލާލިކަމަށް ޢިރާޤުގެ ކުރީގެ ބޮޑުވަޒީރު މުޞްޠަފާ އަލް ޚާޒިމީ ބުނެފިއެވެ.

އަޝްރަޤް އަލް އަވްސަޠް ކިޔާ ޢަރަބި ޗެނަލް އެއްގައި ވާހަކަ ދައްކަމުން ޢިރާޤުގެ ކުރީގެ ބޮޑުވަޒީރު އަލް ޚާޒިމީ ބުނެފައިވަނީ ދަންޖައްސައި މަރައިލުމަށް ފަހު ޞައްދާމުގެ ހަށިގަނޑު އެއްލައިލައިފައި އޮތީ އޭރު އޭނާ ބަޣްދާދުގައި ދިރިއުޅެމުންދިޔަ ގެޔާއި އޭރުގެ ބޮޑު ވަޒީރު ނޫރީ އަލް މާލިކީގެ ގެޔާއި ދޭތެރޭގައި އޮތް ތަނަކަށް ކަމަށެވެ. އަދި އެއީ ބަޣްދާދުގެ ގްރީން ޒޯން ކަންވެސް އަލް ޚާޒިމީ ފާހަގަކޮށްފައިވެއެވެ.

ޞައްދާމް ހުސެއިނާއި ބައްދަލުވީ ކިތައް ފަހަރުތޯ ސުވާލު ކުރެވުމުން ޖަވާބު ދިނުމުގެ ތެރޭގައި ދެކެވުނު މިވާހަކަ ތަކުގައި އަލް ޚާޒިމީ އިތުރަށް ބުނީ އެންމެ ފުރަތަމަ ޞައްދާމް އާއި ބައްދަލުވީ ޞައްދާމުގެ މައްޗަށް މަރުގެ ޙުކުމް އިއްވުމަށް ބޭއްވުނު ޝަރީޢަތުގެ މަޖިލީހުން ކަމަށެވެ.

"އެއީ މުޅި ޢިރާޤުގެ ތަރީޚުގައި އިރާޤު ދުށް އުނދަގޫ އަދި ވަރަށް ތަފާތު ދުވަހެއް" އަލް ޚާޒިމީގެ ވާހަކައިގައި ބުނެފައިވެއެވެ.

ދެން އެއަށް ފަހު ޞައްދާމް ފެނުނީ ޞައްދާމްއަށް މަރުގެ އަދަބު ދެވުމަށް ފަހުގައި ކަމަށް އޭނާ ބުނެފައިވެއެވެ.

"އަހަންނަށް ފެނުނު ގާޑުންގެ ގްރޫޕަކުން ޞައްދާމުގެ ހަށިގަނޑު ވަށައިލައިގެން ތިބިތަން، އަހަރެން އަމުރުކުރިން އެއްވެސް ގެއްލުމެއް ހަށިގަނޑަށް ނުދީ ދުރަށް ދިއުމަށް، މަރުވެފައިވާ ހަށިގަނޑަށް އިޚްތިރާމް ކުރުމުގެ ގޮތުން އެއްވެސް ގެއްލުމެއް ނުދިނުމަށް ބުނިން" އަލް ޚާޒިމީ ގެ ވާހަކައިގައި ވެއެވެ.

"...ޞައްދާމުގެ ހަށިގަނޑު އޮތީ މާލިކީގެ ގެކައިރީގައި، މާލިކީ ގެ އަމުރަށް ފަހުން ހަށިގަނޑު ހަވާލު ކުރެވުނީ ޞައްދާމުގެ ޤަބީލާ ކަމުގައިވާ އަލް ނަދާ ޤަބީލާގެ ޝެއިޚަކާ، ގްރީން ޒޯން އިން ހަށިގަނޑު ހަވާލުކުރެވުނީ" އަލް ޚާޒިމީ ބުނެފައިވެއެވެ.

އަލް ޚާޒިމީ ބުނީ ޞައްދާމްގެ ހަށިގަނޑު ވަޅު ލެވުނީ ތިކްރީތުގައި ކަމަށެވެ.

ނަމަވެސް އައިސިސްގެ ބާރުގެ ދަށަށް 2012ގައި ތިކްރީތް ދިޔުމަށްފަހު އެމީހުން ޞައްދާމުގެ ޤަބުރު ކޮނެ އެ އެހެން ތަނަކަށް ބަދަލު ކުރިއެވެ. އަދި އެއީ ކޮންތަނެއްކަން މިވީހާ ތަނަށް އައިސިސް ނޫން ބަޔަކަށް އެނގިފައެއް ނުވެއެވެ.

އަލް ޚާޒިމީ ޢިރާޤުގެ ބޮޑުވަޒީރުކަން ކުރެއްވީ 2012ގެ މެއި އިން 2012 ގެ އޮކްޓޯބަރ އާއި ހަމަށެވެ. ޚާޒިމީ އޭގެ ކުރިން ކޮށްފައިވަނީ ޢިރާޤުގެ ނޭޝާނަލް އިންޓެލިޖެންސް ސާވިސަސް ގެ ޑިރެކްޓަރުކަމެވެ. އަދި އޭރުވެސް އަލް ޚާޒިމީ އަކީ ޞައްދާމުގެ ސިޔާސަތުތަކާއި ދެކޮޅު ހެދި މީހެކެވެ.

ޞައްދާމް ޢިރާޤުގައި ކުރަމުންދިޔަ ވެރިކަން ވެއްޓުނީ 2003 ވަނަ އަހަރު އެމެރިކާއާއި ދުނިޔޭގެ އެހެންވެސް ބައެއް ޤައުމުތައް ގުޅިގެން ޢިރާޤަށް އަރައިގަތުމާއި ގުޅިގެނެވެ. އެމެރިކާއިން އޭރު ބުނީ ޞައްދާމް ހުސެއިނަކީ އަލްޤައިދާ އާއި ގުޅުން އޮންނަ މީހެއް ކަމަށާއި، އަދި ޢިރާޤުގައި ފަނާކުރުވަނިވި ހަތިޔާރު އުފައްދައި ގެންގުޅޭ ކަމަށެވެ. މި ތުހުމަތު ތަކާއި އެކު ޢިރާޤަށް އަރައި އެޤައުމުގެ އެތައްބަޔަކު ޝަހީދު ވެގެން ދިޔައިރުވެސް އެމެރިކާއަކަށް އެކަން ސާބިތުކޮށްދެވިފައެއް ނުވެއެވެ.

އިންސާނިއްޔަތާއި ޚިލާފު ޢަމަލުތައް ހިންގި ކަމުގެ ދައުވާ އާއި އެކު ޞައްދާމުގެ މައްޗަށް މަރުގެ ޙުކުމް އިއްވުނީ 2006 ވަނަ އަހަރުގެ ޑިސެމްބަރު މަހުގެ 30 ވަނަ ދުވަހުއެވެ. އެދުވަހަކީ މުސްލިމުންގެ އަޟްހާ ޢީދު ދުވަހާއި ވެސް ބައްދަލު ކުރި ދުވަހެވެ.

ޞައްދާމް ހުސެއިންގެ މައްޗަށް މަރުގެ ޙުކުމް ޤާއިމް ކުރުމަށް ލިޔެވުނު ލިޔެވުމުގައި ސޮއި ކޮށްފައިވަނީ ކުރީގެ ބޮޑު ވަޒީރު ނޫރީ އަލް މާލިކީއެވެ. 2006 ގެ މެއި މަހުން 2014 ގެ ސެޕްޓެމްބަރަށް ޢިރާޤުގެ ބޮޑު ވަޒީރު ކަން ކުރި މާލިކީ އެ ލިޔުމުގައި ސޮއި ކުރި ނަމަވެސް އޭރުގެ ޢިރާޤުގެ ރައީސް ޖަލާލް ޠަލަބާނީ ދެކޮޅެވެ.