ގދ. ފަރެސްމާތޮޑާ އެއާޕޯޓަކީ، މުޅި ހުވަދު އަތޮޅަށްވެސް ދިރުން ގެނުވަދޭނެ އެއާޕޯޓެއް ކަމަށް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގް ކޮމްޕެނީ (އެމްޓީސީސީ) އިން ބުނެފިއެވެ.

އެމްޓީސީސީން ފަރެސްމާތޮޑާ ގައި ތަރައްގީކުރި އެއާޕޯޓް ރޭ ވަނީ ރަސްމީކޮށް ހުޅުވާފައެވެ. މި އެއާޕޯޓު ހުޅުއްވައި ދެއްވީ ރާއްޖޭގެ ރައީސުލްޖުމްހޫރިއްޔާ، އިބްރާހިމް މުހައްމަދު ޞާލިހްއެވެ. މިކަމަށް ހާއްސަ ކޮށް ރޭ ބޭއްވި ރަސްމިއްޔާތުގައި، ޕްލޭނިންގް މިނިސްޓަރު މުހައްމަދު އަސްލަމްއާއި، ޓްރާންސްޕޯޓު މިނިސްޓަރު އައިޝަތު ނަހުލާއާއި، ރީޖަނަލް އެއާޕޯޓްސް ކޮމްޕެނީ ލިމިޓެޑް ގެ މެނޭޖިން ޑިރެކްޓަރު މުހައްމަދު ރިޒްވީއާއި، ކައުންސިލް ރައީސް އަހުމަދު އިމްތިޔާޒާއި، އެމްޓީސީސީގެ ސީއީއޯ އާދަމް އާޒިމްގެ އިތުރުން ދައުލަތުގެ އިއްޒަތްތެރިން ބައިވެރިވެ ވަޑައިގެންނެވިއެވެ.

މި މަޝްރޫއު އާއި ގުޅިގެން އެމްޓީސީސީން މިއަދު ބުނީ، މި އެއާޕޯޓަކީ ހަތަރު ރަށުގައި ދިރިއުޅޭ 6000 އަށްވުރެ ގިނަ ރައްޔިތުންނަށް ދަތުރުފަތުރުގައި ދިމާވަމުންދާ ގޮންޖެހުންތައް ކުޑަކޮށްދޭނެ އެއާޕޯޓެއް ކަމަށެވެ. އަދި ވައިގެ ދަތުރުފަތުރު ކުރުމަށް ކާޑެއްދުއަށް ކުރަންޖެހޭ އަގުބޮޑު ދަތުރުތަކަށް އެއާޕޯޓް ގެ ސަބަބުން ނިމުމަކަށް އަންނާނެ ކަމަށާ އަދި އެ  ސަރަހައްދުގެ އިޖްތިމާއީ، އިގްތިސާދީ އަދި އިންސާނީ ތަރައްގީ ކުރިއަރާ ފުޅާވެގެންދާނެ ކަމަށްވެސް ބުނެފައިވެއެވެ.

އަދި މީގެ އިތުރުން ފަރެސްމާތޮޑާ އެއާޕޯޓަކީ އެ ސަރަހައްދުގެ ރައްޔިތުންގެ މޫނަށް ހިނިތުންވުން ގެނެސްދީ ގދ. އަތޮޅުގެ ދެކުނު ބިތުގައިވާ ރަށްތަކަށް ދިރުންގެނުވާ ވިޔަވަތި ހުވަދު އަތޮޅަކަށް ބަދަލުކޮށްލުމަށް މެދުވެރިވާނެ ދަންމަރެއް ކަމަށް ވެސް އެމްޓީސީސީން ބުނެއެވެ. 

1200 މީޓަރު ދިގު އަދި 30 މީޓަރު ފުޅާ ރަންވޭއާއެކު ހެދި މި އެއާޕޯޓުގައި ރޭގަނޑުވެސް މަތިންދާބޯޓު ޖެއްސޭ ގޮތަށް ލައިޓް ހަރުކޮށްފައި ވެއެވެ. އަދި ތިމާވެއްޓާ ރައްޓެހި ގޮތަށް ބަލައިގެން ފަރުމާކޮށްފައިވާ މި އެއާޕޯޓަކީ މީހުން ފުރުވަންދާ ފަރާތްތަކަށް، މަތިންދާބޯޓަށް މީހުން އަރާ މަންޒަރު ފެންނާނެ ތަފާތު އެއާޕޯޓެކެވެ. މި އެއާޕޯޓުގެ ފަސިންޖަ ޓާމިނަލް އަކީ ރަށްތަކުގެ މަލަމަތިން ފެންނަ އޮޑިހަރުގެ ދައްކުވައި ދޭގޮތަށް ފަރުމާ ކޮށްފައިވާ އެއާޕޯޓެކެވެ.