ވިއްސާރަވެ ފެންބޮޑުވުމުގެ ސަބަބުން ތުރްކިޔޭ އިން 13 މީހަކު މަރުވެއްޖެއެވެ.

ފެބްރުއަރީ 6 ވަނަ ދުވަހު އައި ބިންހެލުންތަކުގައި ގެއްލުންވި ދެ ޕްރޮވިންސަކަށް ވަރަށްބޯކޮށް ވާރޭ ވެހި ވަނީ ފެންބޮޑުވެފައި ކަމަށް އަލްޖަޒީރާގައި ރިޕޯޓު ކޮށްފައިވެއެވެ.

އެދެ ޕްރޮވިންސްގައި ފެން ބޮޑުވެ 13 މީހުން މަރުވެ، ބިންހެލުންތަކުގައި ގެދޮރު ގެއްލުނު އެތައްހާސް ބަޔަކަށް އިތުރު ތަކްލީފުތަކަކާއި މިވަނީ ކުރިމަތިލާންޖެހިފައެވެ.

Advertisement

ބުދަދުވަހު ތުރްކިޔޭގެ ސަންލިރުފާ އަށް ބޯކޮށް ވާރޭވެހި ފެންބޮޑުވުމުގެ ސަބަބުން އެ ޕްރޮވިންސުން 11 މީހަކު މަރުވެފައި ވާއިރު އެޕރޮވިންސް ކައިރީގައި އޮންނަ އަދިޔަމަން ޕްރޮވިންސުން ވަނީ ދެމީހަކު މަރުވެފައެވެ. އަދިޔަމަން އިން މަރުވި މީހުންގެ ތެރެއިން އެކަކީ 1 އަހަރުގެ ކުޑަކުއްޖެކެވެ.

އަދިޔަމަން އިން މަރުވި ދެމީހުން މަރުވީ، ބިންހެލުމުގައި ގެދޮރު ގެއްލުނު މީހުން ދިރިއުޅުމަށް ސަރުކާރުން ބަހައްޓައިދިން ކޮންޓެއިނަރު ގެއެއްގެ މަތީގައި ސަލާމަތް ވުމަށް އަރައިތިއްބައި ކަމަށް އަލްޖަޒީރާގައި ބުނެފައިވެއެވެ. އަދި ބައެއްމީހުން ވީއެއްނުވީއެއް ނޭނގި ގެއްލިފައިވާކަމަށް ވެސް އަލްޖަޒީރާގައި ބުނެފައިވެއެވެ.

މީހުން ސަލާމަތް ކުރުމަށް މަސައްކަތް ކުރި ބަޔަކަށް ވަނީ ސީރިޔާގެ 5 މީހެއްގެ މަރުވެފައިވާ ހަށިގަނޑުފެނިފައެވެ.

އެތައް ބަޔަކު ވަނީ ފެންބޮޑުވެފައިވާ ސަރަހައްދުތަކުން ރައްކާތެރި ސަރަހައްދުތަކަށް ބަދަލުކޮށްފައެވެ.