ކުރީގެ ރައީސް އަބްދުالله ޔާމީން އަބްދުލްޤައްޔޫމުގެ ޒައާމަތުގައި ފަރެސްމާތޮޑާގައި އަޅުއްވަން ފެއްޓެވި އެއާޕޯޓަށް އެމްޑީޕީގެ ރައީސް މުޙައްމަދު ނަޝީދު ތަޢުރީފު ކުރައްވައިފި އެވެ. 

ރައްޔިތުންގެ މަޖިލީހުގެ ނަޝީދު ކުރެއްވި މެސެޖެއްގައި ވިދާޅުވެފައިވަނީ ރައީސް ޔާމީންގެ އެއާޕޯޓު ޑިޒައިން ވަރަށް ރީތި ކަމަށެވެ. އަދި އެއާޕޯޓު ފަރުމާކޮށްފައިވާ ގޮތުން ވެލާނާ އެއާޕޯޓުވެސް ސިފަކުރެވޭކަމަށް ނަޝީދު ވިދާޅުވި އެވެ. 

ދާދި ފަހުން ފަރެސްމާތޮޑާ އެއާޕޯޓު ރަސްމީކޮށް ހުޅުވާފައިވާއިރު އެ އެއާޕޯޓަކީ މި ސަރުކާރުގެ މަސައްކަތަކަށް ހަދާ، އެއާޕޯޓުގެ ކްރެޑިޓް ވަނީ މި ސަރުކާރުން ނަންގަވާފަ އެވެ. 

އެހެން ނަމަވެސް އެ އެއާޕޯޓަކީ ކުރީގެ ރައީސް އަބްދުالله ޔާމީން އަބްދުލްގައްޔޫމުގެ ޒައާމަތުގައި އަޅުއްވަން ފެއްޓެވި އެއާޕޯޓެކެވެ. އެއާޕޯޓު ނިންމަން އޮތް ތާރީހަށް ނުނިންމި ދިގުލައިގެން ދިޔައީ ސަރުކާރު ބަދަލުވުމާއެކު މަޝްރޫއުގެ ސްޕީޑަށް އައި ބަދަލާއި ގުޅިގެންނެވެ. 

ފަރެސްމާތޮޑާ އެއާޕޯޓު 

އެއާޕޯޓު ރަސްމީކޮށް ހުޅުވުމަށް ބޭއްވި ހަފްލާފައި ފަރެސްމާތޮޑާ ކައުންސިލުން ވަނީ އެފަދަ މަޝްރޫޢުއެއް އެރަށުގައި ފައްޓަވާދެއްވިކަމަށްޓަކައި ކުރީގެ ރައީސް އަބްދުالله ޔާމީން އަބްދުލްގައްޔޫމަށް ޝުކުރުއަދާކުރައްވާފަ އެވެ. އަދި އެ ދާއިރާގެ މެމްބަރުގެ މަސައްކަތްވެސް ފާހަގަކުރައްވާ މެމްބަރަށްވެސް ޝުކުރު ދަންނަވާފަ އެވެ.