ރިޔާސީ އިންތިޚާބުގައި ޖުމްހޫރީ ޕާޓީ (ޖޭޕީ)ގެ ލީޑަރު އަދި މާމިގިލީ ދާއިރާގެ މެންބަރު ޤާސިމް އިބްރާހީމް ވާދަކުރެއްވުމަކީ ގޮންޖެހުމެއް ނޫން ކަމަށް ރައީސް އޮފީހުގެ ތަރުޖަމާނު މިއުވާން މުހައްމަދު ވިދާޅުވުމާއި ގުޅިގެން ޖޭޕީގެ ޑެޕިއުޓީ ލީޑަރު އަހުމަދު ސައުދު ރައްދު ދެއްވައިފިއެވެ. 

ރައީސް އޮފީހުގައި އިއްޔެ ބޭއްވި ނޫސްވެރިންގެ ބައްދަލުވުމުގައި، ނޫސްވެރިއެއްގެ ސުވާލަކާ ގުޅިގެން މިއުވާން ވިދާޅުވީ، މި ސަރުކާރު ކޯލިޝަންގައި ވެސް ހިމެނޭ ޖޭޕީން ކެންޑިޑޭޓެއް ނެރެފި ނަމަ ދެން ކުރިއަށްދާނެ ގޮތަކާ މެދު ގާސިމް އަދި ޖޭޕީއާއެކު ވެސް ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު މަޝްވަރާކުރައްވާނެ ކަމަށެވެ.

އަދި އިންތިޚާބު ގައި ގާސިމް ވާދަކުރެއްވުމަކީ ގޮންޖެހުމެއް ނޫން ކަމަށްވެސް އޭނާ ވިދާޅުވި އެވެ. 

Advertisement

"ރައީސަށް ޗެލެންޖެއް ނޫން އެއީ [ގާސިމް ކުރިމަތިލެއްވުމަކީ]. ރައީސަށް މިހާރު އެ އޮތް ކޯލިޝަނާއެކު، ރައީސާއެކު ކުރިއަށް ވަޑައިގަންނަވަން ބޭނުންފުޅުވާ ބޭފުޅުންނާއެކު އިންތިހާބު ކާމިޔާބުކުރެއްވޭނެ ކަމުގެ ޔަގީންކަން އެބައޮތް." އޭނާ ވިދާޅުވި އެވެ. 

މިއުވާން އަށް ރައްދު ދެއްވައި ސައުދު ކުރެއްވި ޓްވީޓެއްގައި ވަނީ، އޯވާ ކޮންފިޑެންސް އަކީ އިންސާނާ ހަލާކު ކޮށްލާ ކަމެއް ކަމަށް ވިދާޅުވެފައެވެ. 

"ޖޭޕީގެ ލީޑަރު ވިދާޅުވަނީ ކަމެއް ކާމިޔާބު ކުރެވޭނީ ވީހާވެސް ގިނަ ބަޔަކާއި އެކު ކަމަށް." ސައުދު ވިދާޅުވި އެވެ. 

މިއާއެކު ސައުދު ވަނީ އެންމެހާ ފަރާތްތަކަށް ޖޭޕީ އާއި ގުޅުމަށް ދައުވަތު އަރުއްވާފައެވެ. 

ރައީސަށް ދެ ވަނަ ދައުރެއް ދިނުމަށް ކޯލިޝަން ހެދުމަށް ޖޭޕީ ހިމެނޭހެން ޕާޓީތަކަށް ދައުވަތު ދީފައިވަނިކޮށް އެ ޕާޓީން މިދިޔަ އަންގާރަ ދުވަހު ބޭއްވި ކައުންސިލް ބައްދަލުވުމުގައި ވަނީ އަންނަ ސެޕްޓެމްބަރު މަހު ބާއްވާ އިންތިހާބުގައި ވާދަކުރަން ނިންމައިފަ އެވެ. އެއާއެކު، އެ ޕާޓީގެ ރިޔާސީ ޕްރައިމަރީއަށް ވެސް އިއްޔެ ހުޅުވާލައި، މި މަހުގެ 30 ގެ ކުރިން ހުށަހަޅަން ވަނީ މުއްދަތު ދީފަ އެވެ.