މިއަދު ހެނދުނު ހުޅުމާލޭ ޓްރެކް ދަނޑުގައި ފެށި 10 މައިލޯ އެސޯސިއޭޝަން ޗެމްޕިއަންޝިޕްގެ އެތްލެޓިކްސް މުބާރާތުގެ ހެނދުނު ދަންފަޅީގެ އިވެންޓްތައް ނިމުނުއިރު، ޑިސްކަސް އުކުމުން ޝަމްޢޫން އަދި ޖެވެލިންގ އުކުމުން ޝައިމް ވަނީ މުބާރާތުގެ ރެކޯޑް މުގުރާލާފަ އެވެ.

މިދިޔަ އަހަރުގެ ބޭއްވުނު 09 މައިލޯ އެސޯސިއޭޝަން ޗެމްޕިއަންޝިޕްގައި 29.22 މީޓަރަށް އުކައިގެން ޝަމްޢޫން ހެދި ރެކޯޑް މި މުބާރާތުގައި އައުކުރީ 29.78 މީޓަރަށް އުކައިގެންނެވެ.

ޑިސްކަސް އުކުމުން ޝަމްޢޫން އެއްވަނަ ހޯދި އިރު މި އިވެންޓުން ދެވަނަ ހޯދީ ގއ. ކަނޑުހުޅުދޫ ސްކޫލްގެ މުހައްމަދު ފައުޒާން ފައިސަލް (26.49 މީޓަރ) އެވެ. އަދި މި އިވެންޓުން ތިންވަނަ ލިބުނީ ނަސީރު ސްޕޯޓްސް ކްލަބްގެ އިބްރާހީމް މާޒިން (23.85) އަށެވެ.

އަންހެން ޖެވެލިންގ އުކުމުން ކުލަބު ރައިވެރިއާގެ އައިޝަތު ޝައިމް (26.13 މީޓަރަށް) އުކައިގެން މުބާރާތުގެ ރެކޯޑް މުގުރާލި އިރު، މި އިވެންޓުން ދެވަނަ ލިބުނީ ކަސްޓަމްސްގެ ލައުހާ ހުސެއިން (24.69 މީޓަރ) އަށެވެ. އަދި މި އިވެންޓުން ތިންވަނަ ލިބުނީ ޓްރެކް އެންޑް ފީލްޑްގެ އާނާ އިބްރާހީމް (22.90) އަށެވެ.

އަންހެން 4×400 ރިލޭއިން އެއްވަނަ ހޯދީ 4 މިނެޓު 24 ސިކުންތުން ރޭސް ނިންމި ކުލަބު ރައިވެރިއާއެވެ. މިއީ މި މުބާރާތުގެ އައު ރެކޯޑެކެވެ. މިއިވެންޓުން ދެވަަނަ ލިބުނީ 4 މިނެޓު 51 ސިކުންތުން ރޭސް ނިންމި ޓްރެކް އެންޑް ފީލްޑް އެސޯސިއޭޝަންއަށެވެ. އަދި މި އިވެންޓުން ތިންވަނަ ހޯދި ކޭވައި ސްޕޯޓްސް އެކަޑަމީ އިން ރޭސް ނިންމީ 5 މިނެޓު 39 ސިކުންތުންނެވެ.

މިއަދު ހެނދުނު ބޭއްވުނު އިތުރު އިވެންޓްތަކުގެ ނަތީޖާއަށް ބަލާއިރު ފިރިހެން 4×400 ރިލޭއިން އެއްވަނަ ހޯދީ 3 މިނެޓު 44 ސިކުންތުން ރޭސް ނިންމި ސާއިދު ސްޕޯޓްސް އެވެ. މި އިވެންޓުން ދެވަނަ ލިބުނީ 3 މިނެޓު 45 ސިކުންތުން ރޭސް ނިންމި ރައުހަތު ސްޕޯޓްސް އަށެވެ. އަދި މި އިވެންޓުން ތިންވަނަ ލިބުނު ޝަރީފް ސްޕޯޓްސް ރޭސް ނިންމީ 3 މިނެޓު 47 ސިކުންތުންނެވެ.

15 އަހަރުން ދަށުގެ ޓްރިޕްލް ޖަމްޕް އިން އެއްވަނަ ހޯދީ އަހުމަދު ޝައިމް ހަސަން (9.71 މީޓަރ) ހާފިޒް އަހުމަދު ސްކޫލް އެވެ. މި އިވެންޓުން ދެވަނަ ހޯދީ އަހުމަދު އަރުޝް (9.01 މީޓަރ) ހިތަދޫ ސްކޫލެވެ. އަދި މި އިވެންޓުން ތިންވަނަ ހޯދީ ޒާން ޒަރީރު އަލީ (8.82 މީޓަރ) ހާފިޒް އަހުމަދު ސްކޫލް އެވެ.

15 އަހަރުން ދަށުގެ އަންހެން ހައިޖަމްޕު އިވެންޓުން އެއްވަނަ އަދި ދެވަނަ ވެސް ހޯދީ ހާފިޒް އަހުމަދު ސްކޫލްގެ ދެ ދަރިވަރުންނެވެ. އެއްވަނަ އައިޝަތު ސާހީ ހޯދިއިރު ދެވަނަ ލިބުނީ ފާތިމަތު މިޝަލްއަށެވެ. މިދެ އެތްލީޓުން ވެސް ވަނީ 1.10 މީޓަރ މަތިން ފުންމާފައެވެ. މިއިވެންޓުން ތިންވަނަ ލިބުނީ ޓްރެކް އެންޑް ފީލްޑް އެސޯސިއޭޝަންގެ ޒޯޔާ ބިންތި އުސައިނަތް އަށެވެ. ޒޯޔާ ވެސް ވަނީ މި އިވެންޓުގައި 1.10 މީޓަރ މަތިން ފުންމާފައެވެ.