ބޭންކް އޮފް މޯލްޑިވްސް (ބީއެމްއެލް)ގެ މުވައްޒަފުން އިސްނަގައިގެން މިއަދު ކުރިއަށް ގެންދިޔަ މާލެ ސާފުކުރުމުގެ ޕްރޮގްރާމުގެ މާލޭގެ 12 ސަރަހައްދެއް ސާފުކޮށް 8 ޓަނަށްވުރެ ގިނަ ކުނި ނަގައިފިއެވެ.

މިއަދު ހެނދުނު 6:30 އިން ފެށިގެން 9:00 އަށް ކުރިއަށް ގެންދިޔަ މި މަސައްކަތުގެ ތެރެއިން މާލޭގެ އާޓިފިޝަލް ބީޗް، ކާނިވާ ސަރަހައްދު، އިންޑަސްޓްރިއަލް ޒޯން، ރަސްފަންނު، މާކެޓް ސަރަހައްދު ހިމެނޭހެން އެހެންވެސް އާންމު ތަންތަނާއި މޫދު ސާފުކޮށްފައިވެއެވެ.  

ބީއެމްއެލް އިން މާލެ ސާފު ކުރުން-- ފޮޓޯ/ ބީއެމްއެލް 

އަދި މީގެ އިތުރުން ލޯކަލް މާރުކޭޓުގައި ކުލަވެސް ލާފައި ވެއެވެ.

މާލޭ ސިޓީ ކައުންސިލާއި ޑައިވް ޑެސްކް އާ ގުޅިގެން ކުރިއަށް ގެންދިޔަ މި ހަރަކާތްތަކުގައި ބޭންކުގެ 200 އެއްހާ މުވައްޒަފުން ވަނީ ބައިވެރިވެފައެވެ.

ބީއެމްއެލް އިން ހާމަކޮށްފައިވާ ގޮތުން މިއީ ކޮންމެ އަހަރަކު މާޗް މަހުގެ 20 ވަނަ ދުވަހު ފާހަގަ ކުރެވޭ އިންޓަރނޭޝަނަލް ޑޭ އޮފް ހެޕިނަސް އާއި ގުޅިގެން ބާއްވާ ހަރަކާތެކެވެ.

މި ދުވަހާއި ގުޅުވައިގެން މާލެގެ އިތުރުން ށ ފުނަދޫ، ނ ހޮޅުދޫ، ކ މާފުށި، ދ ކުޑަހުވަދޫ، ލ ފޮނަދޫ އަދި ގދ ތިނަދޫގައިވެސް ސާފުކުރުމުގެ ޕްރޮގްރާމެއް ވަނީ ކުރިއަށް ގެންގޮސްފަ އެވެ. 

އިންޓަނޭޝަނަލް ޑޭ އޮފް ހެޕިނަސްއާ ގުޅިގެން މިދިޔަ އަހަރުވެސް ބީއެމްއެލްގެ މުވައްޒަފުން އިސްނަގައިގެން މާލެ ސުވިމިން ޓްރެކް އަދި ހުޅުމާލެ ފޭސް 2 ބީޗް ސަރަހައްދު ސާފުކުރުމުގެ އިވެންޓެއް ވަނީ ކުރިއަށް ގެންގޮސްފައެވެ.