ޕާކިސްޠާނުގެ ކުރީގެ ބޮޑުވަޒީރު ޢިމްރާން ޚާން ޝަރީޢަތުގެ މަޖިލިހަށް ހާޒިރުވުމަށް ކޯޓަށް ދިޔަ ވަގުތު ޕާކިސްޠާން ފުލުހުން ގަދަކަމުން ޢިމްރާންގެ ގެއަށް ވަދެގަނެއްޖެއެވެ.

އިސްލާމްއާބާދުގައި ހުންނަ ކޯޓަށް ހާޒިރުވުމަށް ޢިމްރާން ޚާން ދަތުރުފެށުމާއި އެކު ޕާކިސްޠާން ފުލުހުން ވަނީ ހެވީލޯޑް ވެހިކަލްތައް ބޭނުންކޮށްގެން އެގެއަށް ވަދެވޭނެ މަގުފަހިކޮށް އެގެއަށް ވަދެފައެވެ.

ޕާކިސްޠާން ތަހްރީކޭ-އެ އިންސާފް ޕާޓީގެ ޗީފް ޢިމްރާން ޚާން ވަނީ ފުލުހުންގެ މި ޢަމަލު ހަރުކަށި ޢިބާރާތުން ކުށްވެރިކޮށްފައެވެ. އަދި ޢިމްރާން ބުނެފައިވަނީ ފުލުހުން މިކަންކޮށްފައިވަނީ އެނާގެ އަންހެނުން އެކަނި ގޭގައި ހުރި ވަގުތެއްގައި ކަމަށެވެ.

"ޕަންޖާބު ޕޮލިހުން ވަނީ އަހަރެންގެ ގެއަށް ހަމަލާދީފަ، ބުޝްރާ ބޭޣަމް ހުރީ ގޭގައި އެކަނި، މިއީ އެމީހުން ކޮން ޤާނޫނެއްގެ ދަށުން ކުރާ ކަމެއްތޯ؟، މިއީ ލަންޑަން ޕްލޭންގެ ބައެއް، އެއީ އެ ޕްލޭނެއްގެ ދަށުން ފިނޑި ނަވާޒް ޝަރީފް އަށް އަނބުރާ ބާރު ދިނުމަށް ކުރި ޕްލޭން މިއީ" ޢިމްރާން ޚާންގެ ޓްވީޓުގައި ވެއެވެ.

ލާހޯރުން ލިބިފައިވާ ފުޓޭޖްތަކުން ދައްކާގޮތުން ފުލުހުން ޢިމްރާން ގެ ގެއަށް ވަންނަން މަސައްކަތް ކުރުމުން ޢިމްރާންގެ ސަޕޯޓަރުން އެކަމަށް ހުރަސްއަޅައެވެ. އަދި ސަޕޯޓަރުންގެ ހުރަސްއެޅުން ތަކާއި އެކު ފުލުހުން ހެވީލޯޑް ވެހިކަލެއްގައި އައިސް ޢިމްރާންގެ ގޭގެ ގޭޓު ފުނޑާލައެވެ.

ޢިމްރާން ޚާން ކޯޓަށް ހާޒިރުވެފައިމިވަނީ ޕީޓީއައިގެ ސަޕޯޓަރުންނާއި ފުލުހުންނާއި ދެމެދުއެތައް ހަމަނުޖެހުމަށް ހިންގުމައްފަހުއެވެ.

އަދި މިއަދު އިސްލާމްއާބާދުގެ ކޯޓަށް ޢިމްރާންޚާން ހާޒިރުކުރެވުމާއި އެކުވެސް ވަނީ ކުރިމަތިލުންތައް ހިނގައިފައެވެ. ޢިމްރާން ޚާން ކޯޓާއި ހަމައަށް ގެންގޮސްފައިވަނީ ވަރަށް ވަރުގަދަ ސެކިޔުރިޓީއާއި އެކުއެވެ.

އިސްލާމްއާބާދުގެ ޕޮލިސް ޗީފް ޓީވީ ގައި ބުނެފައިވަނީ ޕީޓީއައިގެ މެމްބަރުން ސަލާމަތީ ފިޔަވަޅު ނާޅައި ތިބި ފުލުހުންނަށް އޮށްގައު އުކައި ހަމަލާދީފައިވާކަމަށެވެ. އަދި އެމީހުންގެ ގަޔަށް ކަރުނަ ގޭސް ޖަހައިފައިވަނީ އެކަމުގެ ޖަވާބެއްގެ ގޮތުން ކަމަށެވެ.