ޕާކިސްޠާނުގެ ކުރީގެ ބޮޑުވަޒީރު ޢިމްރާން ޚާން ހައްޔަރުކުރުމަށް އެޤައުމުގެ ކޯޓުން ނެރުނު އަމުރު އެޤައުމުގެ އެހެން ކޯޓަކުން ބާތިލްކޮށްފި ކަމަށް ޢިމްރާންގެ ލޯޔަރު ފައިސަލް ފަރީދު ޗައުދަރީ ބުނެފިއެވެ.

ފައިސަލް ފަރީދް އަލްޖަޒީރާ އަށް ބުނެފައިވަނީ އިސްލާމްއާބާދުގެ ކޯޓުގައި ހިނގަމުންދިޔަ ރިޝްވަތުހިފުމުގެ މައްސަލައިގެ އަޑުއެހުން ނިންމާލައި ޢިމްރާން ޚާން އަށް ކޯޓުން އިރުޝާދުދިނީ މާޗް 30 ވަނަ ދުވަހު އޮންނަ އަޑު އެހުމަށް ހާޒިރުވުމަށެވެ.

ޢިމްރާން ހައްޔަރުކުރުމަށް ނެރުނު އަމުރު ބާތިލް ކޮށްފައިވަނީ ކޯޓަށް އައުމަށް އޭނާއަށް އެންގި ވަގުތަށް ކޯޓަށް ހާޒިރު ވުމުންނެވެ. ޢިމްރާން ޚާންއަށް ކޯޓަށް ހާޒިރުވުމަށް އެންގި ވަގުތައް ކޯޓައް ނުވަދެވޭނެ ގޮތް ހެދުމަށް ޕާކިސްޠާން ޕޮލިހުން މަސައްކަތް ކުރިކަމަށް ޢިމްރާންގެ ވަކީލުންގެ ޓީމުން ވަނީ ބުނެފައެވެ.

Advertisement

ހޮނިހިރު ދުވަހު ޢިމްރާން ޚާން އިސްލާމްއާބާދުގެ ކޯޓަށް ހާޒިރުވާން ދަތުރުފެށި ވަގުތު ޕާކިސްޠާން ފުލުހުން ވަނީ ލާހޯރުގައި ހުންނަ ޢިމްރާން ޚާންގެ ގެއަށް ގަދަކަމުން ވަދެގަނެފައެވެ. ޢިމްރާން ޚާން ބުނެފައިވަނީ އޭރު އޭނާގެ އަނބިމީހާ ހުރީ ގޭގައި އެކަނި ކަމަށެވެ.

ޢިމްރާން ޚާންގެ ސަޕޯޓަރުން ޕޮލިހުން އެގެއަށް ވަނުމަށް ކުރި މަސައްކަތަށް ހުރަސް އަޅަން މަސައްކަތް ކުރުމުން ސަޕޯޓަރުންގެ ތެރެއިން 60 މީހުން ވަނީ ހައްޔަރުކޮށްފައެވެ.

ޕަންޖާބް ޕޮލިސްގެ އިންސްޕެކްޓަރ ޖެނެރަލް އުސްމާން އަންވަރު މީޑިއާގައި ބުނެފައިވަނީ  ޢިމްރާން ގެ ގޭގައި ހިންގި ސާޗް ވޮރެންޓުގައި ހަތިޔާރު ހޯދިފައިވާ ކަމަށެވެ. ކްލަޝްނިކޮވް ރައިފަލް އަކާއި ގިނަ ޢަދަދެއްގެ ބުލެޓް ހޯދިފައިވާ ކަމަށްވެސް އޭނާ ބުނެފައިވެއެވެ.

އަންވަރު މީޑިއާގައި އިތުރަށް ބުނެފައިވަނީ ޕީޓީއައި ގެ ސަޕޯޓަރުން ޕޮލިހުންގެ ގަޔަށް ބަޑިޖަހައިފައިވާކަމަށެވެ.