އަވައްޓެރި ބަންގްލަދޭޝްގައި ހައިވޭއެއް މަތިން ދުއްވާފައިދިޔަ ބަހެއް ވެއްޓި އެކްސިޑެންޓެއް ހިގައިފިއެވެ.

މި ހާދިސާގައި 19 މީހަކު މަރުވެ 25 މީހަކު ޒަހަމްވެފައިވާކަމަށް އަލްޖަޒީރާގައި ބުނެފައިވެއެވެ.

ހައިވޭމަތިން ދުއްވާފައިދިޔަ ބަސް ހައިވޭގެ ފެންސުގައި ޖެހި ބަސްވަނީ ފެންސު ހަލާކުވެ ހައިވޭގެ ބޭރަށް ވެއްޓިފައެވެ. ބަންގްލަދޭޝްގެ ޕޮލިހުންބުނެފައިވީ ލަފާކުރެވޭގޮތުން ބަސް ދުއްވާފައި ދިޔަދިއުމުގައި ޑްރައިވަރަށް ކޮންޓްރޯލް ގެއްލުނީކަމަށެވެ.

Advertisement

"މަރުވި މީހުންގެ ޢަދަދު 19 އަށް ވަނި އަރައިފައި، އަނިޔާވި މީހުންގެ ތެރެއިން  12 މީހުންގެ ހާލަތު ވަރަށް ގޯސް، އިތުރު ފަރުވާއަށް އެމީހުން ޑާކާ މެޑިކަލް ކޮލެޖް ހޮސްޕިޓަލަށް ވަނީ ގެންދެވިފައި" ލޯކަލް ޕޮލިސް ޗީފް މަސްއޫދު އަލަމް މީޑިއާ އަށް ބުނެފައިވެއެވެ.

ބަންގްލަޑޭޝްގެ ޕޮލިހުން ލަފާ ކުރަނީ ހާދިސާގައި މަރުވާ މީހުންގެ ޢަދަދު މަތިވެދާނެ ކަމަށެވެ. ސަބަބެއް ކަމަށް ބުނެފައިވަނީ އަނިޔާވި މީހުންގެ ތެރެއިން ގިނަ މީހުންގެ ހާލަތު ސީރިއަސް ވުމެވެ.

ހާދިސާ ހިނގި ސިޓީ އަކީ ބަންގްލަދޭޝްގެ ވެރިކަންކުރާ ޑާކާ އާއި 50 މޭލު ދުރުގައި އޮންނަ ސިޓީ އެކެވެ.

ބަންގްލަދޭޝްގައި މަގުމަތީގެ މިފަދަ އެކްސިޑެންޓްތައް ހިނގުމަކީ އާންމުކަމެކެވެ. ހަލާކުވެފައިވާ މަގުތަކާއި ދުވަސްވެފައިވާ މަގުތައް މަރާމާތުނުކޮށް ހުރުމުގެ ސަބަބުންނާއި، ނުފަރިތަ ޑްރައިވަރުންގެ ސަބަބުން ނުރައްކާތެރި އެކްސިޑެންޓުތައް ވަރަށް ގިނައިން ބަންގްލަދޭޝްގައި ހިނގައެވެ.

މިދިޔަ އަހަރުގެ ޖުލައި މަހު މަގުމަތީގެ އެކްސިޑެންޓު ތަކުގައި ބަންގްލަދޭޝްއިން ގާތްގަނޑަކަށް 400 މީހުން ވަނީ މަރުވެފައެވެ. އަދި އެއަށްވުރެ ގިނަ މީހުން ވަނީ ޒަހަމްވެފައެވެ.

މިދިޔަ އަހަރުގެ އަޟްޙާ ޢީދު ތެރޭގައިވެސް އެކްސިޑެންޓު ތަކުގައި 300 އެއްހާ މީހުން ވަނީ މަރުވެފައެވެ.