10 ވަނަ މައިލޯ އެސޯސިއޭޝަން ޗެމްޕިއަންޝިޕް އެތްލެޓިކްސް މުބާރާތުގެ ފިރިހެން ޗެމްޕިއަންކަން ދިވެހި ސިފައިންގެ ކުލަބު އަދި އަންހެން ޗެމްޕިއަންކަން ކުލަބް ރައިވެރިއާ އިން ހޯދައިފި އެވެ.

އެތްލެޓިކްސް އެސޯސިއޭޝަން އޮފް މޯލްޑިވްސްގެ ފަރާތުން އިންތިޒާމްކޮށްގެން މިމަހުގެ 17 އިން 19 ދުވަހުގެ ނިޔަލަށް ހުޅުމާލޭ ޓްރެކް ދަނޑުގައި ކުރިއަށް ގެންދިޔަ މުބާރާތުގައި 22 ޓީމަކުން 315 އެތްލީޓުން ބައިވެރިވި އެވެ.

ހަތަރު ކެޓަގަރީއަކަށް ބަހާލައިގެން ކުރިއަށް ގެންދިޔަ މި މުބާރާތުގެ 15 އަހަރުން ދަށުގެ ފިރިހެން ޗެމްޕިއަންކަން ހޯދީ ހާފިޒް އަހުމަދު ސްކޫލް އެވެ. މި އުމުރުފުރާއިން ދެވަނަ ހުރަވީ ސްކޫލް ހޯދިއިރު ތިން ވަނަ ލިބުނީ ސާއިދު ސްޕޯޓްސް އަށެވެ.

Advertisement

15 އަހަރުން ދަށުގެ އަންހެން ކުދިންގެ ބައިން އެއްވަނަ ހޯދީ ޝަރީފް ސްޕޯޓްސް އެވެ. މި އުމުރުފުރާއިން ދެވަނަ ހާފިޒް އަހުމަދު ސްކޫލް ހޯދިއިރު ތިން ވަނަ ލިބުނީ ނަސީރު ސްޕޯޓްސް އަށެވެ.

މި މުބާރާތުގެ އޯޕަން ކެޓަގެރީގެ އަންހެން އެއްވަނަ ހޯދީ ކުލަބު ރައިވެރިއާ އެވެ. މިބައިން ދެވަަނަ ޓްރެކް އެންޑް ފީލްޑް އެސޯސިއޭޝަންގެ ހޯދިއިރު ތިން ވަނަ ލިބުނީ ކުޑަ ހުސެއިން ސްޕޯޓްސް އެސޯސިއޭޝަންއަށެވެ.

މުބާރާތުގެ އޯޕަން ކެޓަގެރީގެ ފިރިހެން ޗެމްޕިއަންކަން ހޯދީ އެންމެ ފަހުގެ ޗެމްޕިއަން ދިވެހި ސިފައިންގެ ކުލަބެވެ. ދެވަނަ ސާއިދު ސްޕޯޓްސް އެކަޑަމީ ހޯދިއިރު ތިން ވަނަ ލިބުނީ ޓްރެކް އެންޑް ފީލްޑް އެސޯސިއޭޝަންއަށެވެ. 

15 އަހަރުން ދަށުގެ ފިރިހެން އެންމެ މޮޅު އެތްލިޓަކަށް ހޮވުނީ 800 އަދި 1500 މީޓަރ ދުވުމުން އެއްވަނަ ހޯދި ކުލަބު ރައިވެރިއާގެ ސުހައިލު އަބްދުއްސަމަދުއެވެ. މި އުމުރުފުރާއިން އަންހެން އެންމެ މޮޅު އެތްލިޓަކަށް ހޮވުނީ ހައިޖަމްޕު އަދި ޖެވެލިންގ އުކުމުން އެއްވަނަ ހޯދި އައިޝަތު ޝާހީ ޝާހިދެވެމުބާރާތުގެ އޯޕަން ކެޓަގެރީގެ އެންމެ މޮޅު ފިރިހެން އެތްލިޓަކަށް ހޮވުނީ  800, 1500 އަދި 5000 މީޓަރ ދުވުމުން އެއްވަނަ ހޯދި ދިވެހި ސިފައިންގެ ކުލަބުގެ ހުސެއިން ފަޒީލްއެވެ  މިބައިން އެންމެ މޮޅު އަންހެން އެތްލިޓަކަށް ހޮވުނީ ހައިޖަމްޕު ،ލޯންގ ޖަމްޕް އަދި ޖެވެލިންގ އުކުމުން އެއްވަނަ ހޯދި އައިޝަތު ޝައިމް އަޒީޒުއެވެ.