ކުރިއަށް އޮތް ރިޔާސީ އިންތިޚާބުގައި އިލެކްޝަން އެއްވެސް ފަރާތަކަށް ނުޖެހޭނެ ކަމަށާއި، ކޮމިޝަނަށް އެއްވެސް ދިމާލަކުން ނުފޫޒު ފޯރުވާނެ ޖާގައެއްވެސް ނުދެއްވާނެކަމަށް އީސީގެ ރައީސް ފުއާދު ތައުފީގު ވިދާޅުވެއްޖެ އެވެ. 

ފުއާދު މިފަދައިން ވިދާޅުވެފައިވަނީ އަންނަ ރިޔާސީ އިންތިޚާބާއި ގުޅިގެން އެކުލަވާލާފައިވާ ލަފާދޭ ކޮމެޓީގެ ފުރަތަމަ ބައްދަލުވުމުގައި ވާހަކަދައްކަވަމުން ނެވެ. 

އިންތިޚާބުގައި ކޮމިޝަންގެ މައްޗަށް ނުފޫޒު ފޯރުވޭނެ ފަރާތެއް ނުހުންނާނެކަމަށް ފުއާދު ވިދާޅުވިއެވެ. އަދި އިންތިޚާބުގައި ރައްޔިތުން ލާ ވޯޓުގެ ނަތީޖާ ހާމަކަން ބޮޑުކޮށް ކޮމިޝަނުން ހާމަކުރަމުންދާނެކަމުގެ ޔަޤީންކަން ފުއާދުވަނީ ދެއްވާފައެވެ.

Advertisement

މިބައްދަލުވުމުގައި ކޮމިޝަނުން ވަނީ ޤައުމީ ލަފާދޭ ކޮމެޓީގެ ބައްދަލުވުން ކުރިއަށް ގެންދާނެ ގޮތަކާއި، އުޞޫލު އެކުލަވާލުމަށް މެމްބަރުންގެ މެދުގައި މަޝްވަރާ ކުރައްވާފައެވެ.

މިބައްދަލުވުމުގައި ބައެއް ޕާޓީތަކުން ވަނީ ރިޔާސީ އިންތިޚާބު މިހާ ގާތްވެފައި އޮއްވާ އިންތިޚާބުތަކާއި ގުޅުންހުރި ޤާނޫނުތަކަށް އިސްލާހު ގެނައުމަށް ކުރަމުންދާ މަސައްކަތާއިމެދު ކަންބޮޑުވުން ފާޅުކޮށްފައެވެ.

ވަކިން ޚާއްސަކޮށް ނޫސްވެރިންނަށް އޮތް ފުރުޞަތު ހަނިވާނެހެން ޤާނޫނަށް ހުށަހަޅާފައިވާ އިސްލާހާއިމެދުވެސް މީޑިއާ ކައުންސިލާއި، ބްރޮޑްކާސްޓިންގ ކޮމިޝަނުން ކަންބޮޑުވުން ފާޅުކޮށްފައިވާއިރު އެއީ ސިޔާސީ ޕާޓީތަކުގެވެސް ކަންބޮޑުވުމެއްގެ ގޮތުގައި މެމްބަރުން ފާހަގަކުރެއްވި އެވެ. 

ނޫސްވެރިންނަށް އިންތިޚާބު ކަވަރުކުރުމަށް ހުރަސްއެޅޭނެ އިންތިޚާބުގެ ސައްހަކަމާމެދު ސުވާލު އުފެއްދުމުގެ ފުރުސަތު އޮންނާނެކަމަށް ބައެއް މެމްބަރުން ވިދާޅުވިއެވެ. 

އެކަމާއި ގުޅިގެން ފުއާދު ވިދާޅުވީ، އިންތިޚާބަށް އެއްވެސް ސިފައެއްގައި ނުފޫޒު ފޯރުވާނެ ޖާގަ ނުދެއްވާނެކަމަށެވެ. އަދި އިންތިޚާބުގެ ނަތީޖާތައް ގެނެސްދޭނީ އޭގެ އެންމެ ޞައްހަ ގޮތުގައި އޮޅުވާލުމެއް ނެތި ކަމަށެވެ.