ޕާކިސްޠާނުގެ ކުރީގެ ބޮޑުވަޒީރު ޢިމްރާން ޚާން ޕާކިސްޠާން ފުލުހުންގެ ޢަމަލުތަކަކީ ޚުދުމުޚްތާރް ޢަމަލުތަކެއް ކަމަށް ބުނެ ވާހަކަދެއްކިތާ ގިނައިރެއް ނުވެ އޭނާ އާއި އޭނާގެ ޕާޓީ ޕާކިސްޠާން ތަހްރީކޭ އެ-އިންސާފު ޕާޓީ ގެ އެކްޓިވިސްޓުންނާއި ދެކޮޅަށް ގިނަ މައްސަލަތަކެއް ބަލަން ފަށައިފި އެވެ.
ޢިމްރާން ޚާން ފުލުހުންގެ ޢަމަލުތަކާއި މެދު މިގޮތަށް ވާހަކަދައްކައިފައި މިވަނީ ހޮނިހިރު ދުވަހު ޢިމްރާން ޚާން އިސްލާމް އާބާދުގެ ކޯޓަށް ހާޒިރުވިވަގުތު ޕާކިސްޠާނު ޕޮލިހުން ޢިމްރާން ޚާންގެ ގެއަށް ގަދަކަމުން ވަދެ ގަނެ އަދި ޢިމްރާން ޚާންގެ ސަޕޯޓަރުންގެ ތެރެއިން ބަޔަކު ހައްޔަރުކޮށްފައިވަނީކޮށެވެ.
"ޚުދުމުޚްތާރު ކަމުގެ އެންމެ މަތީ ދަރަޖަ މިފެންނަނީ ޕޮލިހުންގެ ފަރާތުން، ވޮރެންޓް ނެތި ޕީޓީއައިގެ އެކްޓިވިސްޓުން ރަހީނުކުރުމަށް އިސްލާމްއާބާދުގެ ގެތަކަށް ދަނީ ވަންނަމުން، އެކްޓިވިސްޓުން ގޭގަ ނެތަސް ވަންނަނީ، 10 އަހަރުންދަށުގެ ކުޑަކުދިން ވެސް އެގޭގޭގައި އެބަތިބި" ޢިމްރާން ޚާން ބުނެފައިވެއެވެ.
އަދި ހައްޔަރުކޮށްގެން ގެންގޮސްފައިވާ ޕީޓީއައިގެ މެމްބަރުން ވަގުތުން ވަގުތައް ދޫކޮށްލުމަށް ޢިމްރާން ޚާން ވަނީ ގޮވައިލައިފައެވެ.
ޢިމްރާން ޚާންގެ މިފަދައިން ވާހަކަދެއްކުމާއި ވިދިގެން ޕާކިސްޠާން ޕޮލިހުން ވަނީ ޢިމްރާން ޚާން އާއި އޭނާގެ ޕާޓީގެ މެމްބަރުންނާއި ދެކޮޅަށް އިތުރު މައްސަލަތަކެއް ބަލަން ފަށައިފަ އެވެ.
އެހެން ޓްވީޓެއްގައި ޢިމްރާން ޚާން ބުނެފައިވަނީ ހޮނިހިރު ދުވަހު ކޯޓް ހުންނަ ބިލްޑިންގް ކޮމްޕްލެކްސް ގެ ތެރޭގައި އޭނާ މަރާލުމަށް ރޭވި ކަމަށާއި ވަރަށް އަވަހަށް އެކަން އެންމެންނަށް ފެންނާނެހެން ސާފުކޮށްދޭނެ ކަމަށެވެ.
ހޮނިހިރު ދުވަހު އޮތް ޝަރީޢަތުގެ މަޖިލީހަށް ޢިމްރާން ޚާން ހާޒިރުވި އިރު އިސްލާމްއާބާދުގެ މަގުތަކުގައި އޭނާގެ އެތައް ސަތޭކަ ސަޕޯޓަރުންނެއް ތިއްބެވެ. އަދި ފުލުހުންނާއި އެމީހުންނާއި ދެމެދު ކުރިމަތިލުންތައްވެސް ވަނީ ހިނގައިފައެވެ. ކުރިމަތިލުންތަކުގައި ޢާންމުން ކޮންޓްރޯލް ކުރުމަށްކަމަށްބުނެ ޕޮލިހުންވަނީ ކަރުނަގޭހާއި ލަޓިބުރިތަކުގެ ބޭނުންކޮށްފައެވެ.
މި ކުރިމަތިލުން ތަކުގައި ޕޮލިހުންނަށްވެސް އަދި ޢާންމުންނަށްވެސް ވަނީ އެކިވަރުގެ އަނިޔާތައް ލިބިފައެވެ.
Advertisement
This content is created and paid for by advertisers and does not involve Voice Journalists
