އިންޑިޔާގެ ބެންގަލޫރުގައި އަންނަ ޖޫން މަހު 20 ގައި ފެށުމަށް ހަމަޖެހިފައިވާ ސަރަހައްދީ އެންމެ ބޮޑު ފުޓުބޯޅަ މުބާރާތް، ސާފް ޗެމްޕިއަންޝިޕްގައި ވާދަކުރަން ސަރަހައްދުން ބޭރުގެ ދެ ޓީމެއް ނޫނީ އެއް ޓީމަކަށް ދައުވަތު ދޭން ގަސްދު ކޮށްފައިވާ ކަމަށް އިންޑިއާގެ އެފްއޭއިން ބުނެފިއެވެ.

އިންޑިއާގައި ސާފް ޗެމްޕިއަންޝިޕް ބާއްވަން ނިންމާފައިވާކަން ސާފްގެ އެކްސްކޯ ބައްދަލުވުމުގައި ނިންމީ މިދިޔަ މަހުގެ ތެރޭގައެވެ. މިފަހަރުގެ ސާފް ޗެމްޕިއަންޝިޕް އޮންނާނީ އަންނަ ޖޫން މަހުގެ 20 އިން ޖުލައި މަހުގެ ތިނަކަށެވެ.

އިންޑިއާގެ ފުޓުބޯޅަ ފެޑަރޭޝަން އޭއައިއެފްއެފްގެ ރައީސް ކަލްޔަން ޗައުބޭ، ސާފް ޗެމްޕިއަންޝިޕާ ގުޅިގެން ވާހަކަ ދައްކަވަމުން ވިދާޅުވީ ސަރަހައްދުން ބޭރުގެ ބައެއް ޓީމުތަކަށް ދައުވަތު ދޭން ވިސްނާ ކަމަށާއި އެކަން ކުރަން ގަސްދުކޮށްފައި ވަނީ މުބާރާތުގެ ފެންވަރު ރަނގަޅުކުރުމުގެ ގޮތުން ކަމަށެވެ.

"މިއަހަރު އަހަރެމެން ބޭނުންވޭ ސަރަހައްދުން ބޭރުގެ އެއް ޓީމު ނޫނީ ދެޓީމު މުބާރާތުގައި ވާދަކުރަން. އެއާއެކު މުބާރާތުގެ ވާދަވެރިކަން ބޮޑުވެ، އިންޑިއާ ޓީމަށްވެސް އެކަން ޗެލެންޖަކަށް ވާނެ. އަދި ހާއްސަކޮށް ރޭންކިން މަތި ޓީމުތައް މުބާރާތުގައި ވާދަކުރާނަމަ އިންޑިއާގެ ފުޓުބޯޅައިގެ ފެންވަރުވެސް ދާނީ ކުރިއަރަމުން. އިތުރު ޓީމުތައް ބައިވެރިކުރުމަށް ސްޓޭކް ހޯލްޑަރުންނާއެކު މަޝްވަރާތައް މިހާރުވެސް އެބަކުރެވޭ،" ޗައުބޭ ވިދާޅުވިއެވެ.

އެންމެފަހުން ބޭއްވި ސާފް ޗެމްޕިއަންޝިޕްގެ 13 މުބާރާތުގެ ތެރެއިން އަށް މުބާރާތް ކާމިޔާބުކުރީ އިންޑިއާއެވެ. ރާއްޖެއިން އެންމެފަހުން ސާފް ޗެމްޕިއަންޝިޕް ކާމިޔާބުކުރީ 2018 ވަނަ އަހަރުއެވެ. އެއީ ރާއްޖޭގެ ދެވަނަ ތަށްޓެވެ. 2018 ވަނަ އަހަރު ރާއްޖެއިން ކުރިން ތަށި ހޯދާފައިވާ އިރު، މިފަހަރުގެ މުބާރާތުގައި ސާފް ސަރަހައްދުން ރާއްޖޭގެ އިތުރުން އިންޑިއާއާއެކު ދެން ވާދަކުރާނެ ކަމަށް ބެލެވެނީ ބޫޓާނާއި ބަންގްލަދޭޝް އަދި ޕާކިސްތާނެވެ. ސްރީ ލަންކާ މިވަގުތު ފީފާ ސަސްޕެންޝަނެއްގައި އޮތުމުން މުބާރާތުން ނުފެނުން ގާތެވެ.