ރައީސުލްޖުމްޙޫރިއްޔާ އިބްރާޙިމް މުޙައްމަދު ޞާލިހުގެ މޮޓޯކޭޑަށް އިދިކޮޅު މުޒާހަރާގެ ބައިވެރިން ހުރަސްއެޅި މައްސަލަ ފުލުހުންނާއި ސިފައިން ވެސް ބަލަމުން އަންނަ ކަމަށް ބުނެފިއެވެ. 

ޕީޕީއެމްގެ ރައީސް އިދިކޮޅުގެ ރިޔާސީ ކެންޑިޑޭޓު ރައީސް އަބްދުالله ޔާމީން އަބްދުލްގައްޔޫމު މިނިވަންކުރުމަށް ގޮވާލާ އިދިކޮޅު ކޯލިޝަނުން ސިލްސިލާކޮށް ފުރަމާލޭގައި ކުރިއަށް ގެންދާ މުޒާހަރާ ރޭވެެސް ވަނީ ކުރިއަށް ގެންގޮސްފަ އެވެ. 

ރައީސް ޞާލިހުގެ މޮޓޯކޭޑަށް އިދިކޮޅު މުޒާހަރާގެ ބައިވެރިން ހުރަސްއަޅާފައިވަނީ ބައިނަލްޢަޤްވާމީ އަންހެނުންގެ ދުވަހުގެ ރަސްމީ ޖަލްސާގައި ބައިވެރިވެވަޑައިގަތުމަށް ފަހު އަނބުރާ ވަޑައިގެންނެވި މަގުމަތީގައެވެ. 

Advertisement

އެގޮތުން އިދިކޮޅު މުޒާހަރާގެ ބައިވެރިންވަނީ ރައީސް ޞާލިހުގެ ކާރުކޮޅު ކުރިމައްޗަށް އަރާ ރައީސް ޔާމީން މިނިވަންކުރުމަށް ގޮވާލާ އަޑުއުފުލާފަ އެވެ.

އަދި އެމަނިކުފާނުގެ މައްޗަށް ކްރިމިނަލް ކޯޓުން ހުރީ "ހަރާން" ހުކުމެއް ކަމަށާއި، އެ ހުކުމް ކުރީ ރައީސް ޞާލިހު އަޑީގައި ހުންނަވާ ނުފޫޒު ފޯރުވައިގެންކަމަށް މުޒާހަރާގެ ބައިވެރިން ވަނީ ގޮވާލާފައެވެ. ތަކުރާރުކޮށް ރައީސް ޔާމީން ދޫކޮށްލުމަށް ބައިވެރިން ގޮވާލާފައި ވެއެވެ. 

އެ މައްސަލަ އާއި ގުޅިގެން މިއަދު އެމްއެންޑީއެފްއިން ބުނީ، އެ މައްސަލަ އެ އިދާރާއިން ބަލަމުން އަންނަ ކަމަށެވެ. 

އަދި އެ މައްސަލަ އާއި ގުޅިގެން ފުލުހުންގެ މީޑިއާ އޮފިޝަލް ވިދާޅުވީ، އެ މައްސަލަ އާއި ގުޅިގެން އަންހެނަކާއި 3 ފިރިހެނުން ފުލުހުންގެ ބެލުމުގެ ދަށަށް ގެނެވިފައިވާ ކަމަށާއި އެ މައްސަލަ އިތުރަށް ތަހުގީގު ކުރަމުންދާ ކަމަށެވެ.

މީގެ އިތުރުން، ރޭ އިދިކޮޅުން ކުރިއަށް ގެންދިޔަ މުޒާހަރާގެ ތެރެއިން 17 މީހަކު ހައްޔަރުކޮށްފައިވާ ކަމަށްވެސް ފުލުހުން ބުނެފައިވެއެވެ. 

އިދިކޮޅުގެ މުޒާހަރާގެ ބައިވެރިން ރައީސް ޞާލިހުގެ ކާރުކޮޅު ކުރިމައްޗަށް އަރާ އަޑުއުފުލާފައިވަނީ އެމަނިކުފާނުގެ ސެކިއުރިޓީންގެވެސް ހާޒިރުގައެވެ. އެކަމާއި ގުޅިގެން ޑިފެންސް މިނިސްޓްރީއަށްވެސް ގިނަ ބައެއްގެ ފާޑުކިޔުންތައް ވަނީ އަމާޒުވެފަ އެވެ.