ރައީސް އިބްރާހިމް މުހައްމަދު ސޯލިހުގެ މޮޓޯކޭޑަށް ހުރަސް އަޅައި ހުއްޓުވި މައްސަލަ ރައްޔިތުންގެ މަޖިލީހުގެ ގައުމީ ސަލާމަތާ ބެހޭ ކޮމީޓީ (241 ކޮމިޓީން) ބަލަން ފަށައިފި އެވެ.
ހުޅުމާލޭގައި ރޭ ބޭއްވި ރެހެންދި އެވޯޑް ހަފުލާ އަށް ފަހު، ރައީސް ޞާލިހު މާލެ ވަޑައިގެން ބޮޑުތަކުރުފާނު މަގުން ވަޑައިގަންނަވަނިކޮށް، އިދިކޮޅު ޕީޕީއެމްގެ އޮފީހާ ދިމާލުގައި ތިބި ސަޕޯޓުންތަކެއް ވަނީ އެމަނިކުފާނުގެ މޮޓޯކޭޑަށް ހުރަސްއަޅާފައެވެ.
އެގޮތުން އިދިކޮޅު މުޒާހަރާގެ ބައިވެރިންވަނީ ރައީސް ޞާލިހުގެ ކާރުކޮޅު ކުރިމައްޗަށް އަރާ ރައީސް ޔާމީން މިނިވަންކުރުމަށް ގޮވާލާ އަޑުއުފުލާފަ އެވެ.
އަދި އެމަނިކުފާނުގެ މައްޗަށް ކްރިމިނަލް ކޯޓުން ހުރީ "ހަރާން" ހުކުމެއް ކަމަށާއި، އެ ހުކުމް ކުރީ ރައީސް ޞާލިހު އަޑީގައި ހުންނަވާ ނުފޫޒު ފޯރުވައިގެންކަމަށް މުޒާހަރާގެ ބައިވެރިން ވަނީ ގޮވާލާފައެވެ. ތަކުރާރުކޮށް ރައީސް ޔާމީން ދޫކޮށްލުމަށް ބައިވެރިން ގޮވާލާފައި ވެއެވެ.
މުޒާހަރާގެ ބައިވެރިން ހުރަސްއެޅުމުން، ރައީސްގެ ކާރުކޮޅު އެ ސަރަހައްދުގައި 15 ވަރަކަށް މިނެޓު ތާށިވި އެވެ. ކާރުކޮޅަށް ކުރިއަށް ދެވޭ ގޮތް ނުވުމުން އަނބުރާލެއްވުމަށްފަހު ވަޑައިގަތީ އެހެން މަގަކުންނެވެ.
ސަލާމަތީ ހިދުމަތްތަކާ ބެހޭ ކޮމިޓީގެ އިސްނެގުމަށް އެ މައްސަލަ ބަލަން ފަށައި މިއަދު ބޭއްވި ބައްދަލުވުމުގައި ކޮމިޓީގެ މުގައްރިރު މުހައްމަދު އަސްލަމް ވިދާޅުވީ އެއީ ހިނގައިގެންވާނެ ހާދިސާއެއް ނޫން ކަމަށާއި އެކަން އެގޮތަށް މެދުވެރިވާން ޖެހުނު ސަބަބުތައް ދެނެގަތުމަކީ މަޖިލީހުގެ ސަލާމަތީ ހިދުމަތްތަކާ ބެހޭ ކޮމިޓީގެ މަސްއޫލިއްޔަތެއް ކަމަށެވެ.
އެހެންކަމުން ރައީސްގެ މޮޓޯކޭޑް ހުއްޓުވާފައިވާ ފަރާތްތަކުން އަމަލުކޮށްފައިވާ ގޮތް ކަމާބެހޭ މުއައްސަސާތަކުން ތަހުގީގުކުރަމުންދާ ގޮތް ކޮމިޓީގެ ފަރާތުން ބަލައި، ރައީސްގެ ސެކިއުރިޓީ ބްރީޗްވެފައި ވޭތޯ ނުވަތަ ނޫންތޯ ދެނެގަނެ އެކަމުގައި އެޅެންހުރި ފިޔަވަޅުތައް ކަމާބެހޭ ފަރާތްތަކާ ހިއްސާކުރާނެ ކަމަށް އަސްލަމް ވިދާޅުވި އެވެ.
މިކޮމިޓީގައި ރައްޔިތުންގެ މަޖިލީހުގެ ހަނިމާދޫ ދާއިރާގެ މެމްބަރު ޢަބްދުލްޣަފޫރު މޫސާ ވަނީ މިކަމުގައި ސަލާމަތީ ބާރުތަކުން އަމަލުކޮށްފައިވާ ގޮތާއި، ފުލުހުންނާއި، ސިފައިންގެ ކޯޑިނޭޝަން އޮތް މިންވަރު ބެލުމަށް ހުށަހަޅާފައެވެ. ކޮމެޓީގައި އެހެން މެމްބަރުން ހުށަހެޅި ހުށަހެޅުންތަކަށް ބަލާއިރު ހުޅުމާލޭ ދާއިރާގެ މެމްބަރު އަލީ ނިޔާޒު ވަނީ ރައީސްގެ މޮޓޯކޭޑު މަދު އަދަދެއްގެ ބަޔަކު ކުރި މުޒާހަރާއެއްގެ މެދުގައި އެހާ ގިނަ އިރު އޮންނަންޖެހި، ފަހުން ރޫޓު ބަދަލުކޮށްގެން ދާންޖެހުން ސަބަބު ބަލަންޖެހޭކަމަށެވެ.
އެ މައްސަލާގައި ވިލިމާލެ ދާއިރާ މެންބަރު އަހްމަދު އުޝާމް ވެސް ވިދާޅުވީ ޕީޕީއެމްގެ އޮފީސް ކުރިމައްޗަށް އެއްވުމަކީ އެ ޕާޓީގެ ސަޕޯޓަރުން ސިލްސިލާކޮށް ކުރަމުންދާ ކަމެއް ކަމަށެވެ. އެހެންކަމުން އެކަން އެނގިތިބެ އެ ސަރަހައްދަށް މޮޓޯކޭޑް ވެއްދީ ކީއްވެތޯ އޭނާ ސުވާލު އުފެއްދެވި އެވެ.
މިބައްދަލުވުމުގައި މެމްބަރުންގެ ހުށަހެޅުންތަކަށްފަހު ކޮމެޓީގެ މުޤައްރިރު ނިންމީ މެމްބަރުން ހުށަހެޅުއްވި މައުލޫމާތުތައް ސަލާމަތީ ބާރުތަކުން ހޯދުމަށްފަހު ކޮމެޓީގެ ބައްދަލުވުމެއް ވީހާވެސް އަވަހަށް ބޭއްވުމަށެވެ.
މިމައްސަލާގައި ސަލާމަތީ ބާރުތަކުން އަމަލުކޮށްފައިވާ ގޮތް ލިޔުމުން ހޯދުމަށްފަހު، ދެ މުއައްސަސާއާއި ވަކިން ބައްދަލު ކުރުމަށްވެސް ކޮމެޓީން ވަނީ ނިންމާފައެވެ.
ރައީސުލްޖުމްހޫރިއްޔާގެ މޮޓޯކޭޑަށް ހުރަސް އަޅައި ހިންގި ހަމަނުޖެހުމާއި ގުޅިގެން ގިނަ ބަޔަކު އަންނަނީ ފުލުހުންނާއި ސިފައިންނަށް ފާޑު ކިޔަމުންނެވެ. އަދި އެއީ ފުލުހުންނާއި ސިފައިންގެ ފެއިލްވުމެއްގެ ގޮތުގައި ގިނަ ބަޔަކު ސިފަކުރިއެވެ.
Advertisement
This content is created and paid for by advertisers and does not involve Voice Journalists
