އެއްވެސް ކްލާހެއް ބޭއްވުމެއް ނެތި އަފްޣާނިސްޠާނުގެ ތަޢުލީމީ އައު އަހަރުފަށައިފިއެވެ.

އަފްޣާނިސްޠާނުގެ ތަޢުލީމީ އައު އަހަރު މިއަދު ފެށުނުއިރު، ތަޢުލީމީ އައު އަހަރު މިއަދު ފަށާކަން ޢާންމުކޮށް އެނގޭނެހެން އެޤައުމުގައި އިޢްލާނުކޮށްފައެއް ނުވެއެވެ. އެކަން ޢާންމުކޮށް އިޢްލާނުކޮށްފައި ނުވުމުން މިއަދު ސްކޫލްތައް ހުޅުވިނަމަވެސް ދަރިވަރުން ސްކޫލްތަކަށް ހާޒިރުވެފައި ނުވާތީ އެއްވެސް ސްކޫލެއްގައި އެއްވެސް ކްލާހެއް ކުރިއަށް ގޮސްފައި ނުވާކަމަށް ޢަރަބް ނިއުސް ގައި ބުނެފައިވެއެވެ.

އަދި އެތައްހާސް، ފުރާވަރު އުމުރުގެ އަންހެން ކުދިންނެއް ވަނީ ސްކޫލަށް ދިއުމާއި ތަޢުލީމު އުނގެނުމުން މަހްރޫމްވެފައެވެ.

Advertisement

ޢަރަބް ނިއުސްގައި ބުނެފައިވަނީ އަފްޣާނިސްޠާނަކީ ސެކަންޑްރީ ސްކޫލަށް ދާއުމުރުގެ އަންހެންކުދިން ސްކޫލަށް ދިއުން މަނާކުރަ ހަމައެކަނި ޤައުމުކަމަށެވެ.

އޮގަސްޓު 2021 ގައި އަފްޣާނިސްޠާނުގެ ވެރިކަމާއި އަމިއްލައަށް ހަވާލުވުމަށް ފަހު ޠާލިބާނުން ދަނީ އިސްލާމީ އުސޫލުތައް ކަމަށްބުނެ ހަރުކަށި އުސޫލުތަކެއް އެކުލަވައިލާ އެއަށް ރައްޔިތުން ތަބަޢަ ކުރުވަމުންނެވެ.

އަފްޣާނިސްޠާނުގެ ތަޢުލީމީ ދާއިރާގެ ގިނަ އޮފިޝަލުންނާއި ޓީޗަރުން ބުނެފައިވަނީ އެޑިޔުކޭޝަން މިނިސްޓްރީއިން ސްކޫލްތައް އަލުން ހުޅުވާލާ ވާހަކަ ޢާންމުކޮށް އިޢްލާނުކޮށްފައި ނުވާކަމަށެވެ.

"ސިޓީ އެއް ޕްރިންސިޕަލް މެދުވެރިކޮށް އަހަރެމެންނަށް ލިބުނީ، އޭގައި އޮތީ ސްކޫލްތައް އަލުން ހުޅުވާ ވާހަކަ، އެކަމަކު ޢާންމުކޮށް އެކަން އަންގާފައެއް ނުވޭ، އެހެންވެ އެއްވެސް ކުއްޖަކު ސްކޫލަކަށް ނާދޭ" ކާބުލް ގައި ހުންނަ ފިރިހެން ކުދިންގެ ހައިސްކޫލެއްގެ މުދައްރިސެއް ކަމަށްވާ މުޙައްމަދް އުސްމާން އަޠާޔާ ބުނެފައިވެއެވެ.

އޭއެފްޕީގެ ރިޕޯޓަރުން ކާބުލްގެ 7 ސްކޫލެއްގެ ކައިރީގައި މަޑުކޮށް މަންޒަރުބަލައި ރިޕޯޓުކޮށްފައިވަނީ ސްކޫލަށް ހާޒިރުވީ މަދު މުދައްރިސަކާއި ޕްރައިމަރީ ދަރިވަރުން ކޮޅެއް އެކަނި ކަމަށެވެ. އަދި އެސްކޫލްތަކުގައި ވެސް އެއްވެސް ކްލާހެއް ނެގިފައި ނުވާކަމަށް ރިޕޯޓު ކޮށްފައިވެއެވެ.

ހީރަތް، ކުންޑުޒް، ޤަޒްނީ އަދި ބަދަކްޝާން ފަދަ ޕްރޮވިންސްތަކުގައި ވެސް ސްކޫލްތައް ހުޅުވި ނަމަވެސް އެއްވެސް ވަރަކަށް ކިޔަވައިދީފައި ނުވާ ކަމަށް ޢަރަބް ނިއުސް ގައި ބުނެފައިވެއެވެ.

އަންގާރަދުވަހު އަފްޣާނިސްޠާނުގައި ސްކޫލްތައް ހުޅުވުނުއިރު އެދުވަސް ދިމާވަނީ ޠާލިބާނުން ވެރިކަމަށް އައުމުގެ ކުރިން އަފްޣާނިސްޠާނުގެ އެކި ކަންކޮޅުތަކުގައި ކުލަ ގަދަކޮށް ފާހަގަ ކުރެވޭ ފާރިސީ އައު އަހަރު ފެށޭ ދުވަހާއިއެވެ. ނަމަވެސް މިހާރު އެދުވަސް ފާހަގަކުރުމަކީ އޮންނަ ކަމެއް ނޫނެވެ.

ސްކޫލްތައް ހުޅުވުނު ނަމަވެސް ފުރާވަރު ޢުމުރުގެ އަންހެން ކުދިންނަށް ސްކޫލްތަކަށް ދެވޭނެ ގޮތެއް އަދިވެސް ވަނީ ނުވެފައެވެ. އެތައް ހާސް އަންހެންކުދިނެއް ސްކޫލަށް ދިއުމާއި ތަޢުލީމު އުގެނުމުގެ ހައްޤުން ތިބީ މަހްރޫމްވެފައެވެ.