ދެ ޙަރަމްވެސް އޮތީ ރަމަޟާންމަހު ޒިޔާރަތްކުރާ ފަރާތްތަކަށް މަރުހަބާ ކިޔުމަށް ތައްޔާރަށް ކަމަށް ސަޢުދީޢަރަބިއްޔާއިން ހާމަކޮށްފިއެވެ.
ސަޢުދީޢަރަބިއްޔާގެ މިސްކިތްތަކާއި ބެހޭ އިދާރާގެ އެންމެ އިސްވެރިޔާ ވިދާޅުވެފައިވަނީ މައްކާގައި ހުރި މަސްޖިދުލް ޙަރާމް އާއި މަދީނާގައި ހުރި މަސްޖިދުއް ނަބަވީއޮތީ ރަމަޟާން މަހު ޒިޔާރަތްކުރާނެ މިލިއަނަކަށް ވުރެ ގިނަ މީހުނަށް މަރުޙަބާކިޔަން ތައްޔާރަށް ކަމަށެވެ.
ޝެއިޙް ޢަބްދުއްރަޙްމާން އަލް ސުދައިސް ވިދާޅުވީ ދެ ޙަރަމުގެ ވެސް ސިޑިތަކާއި ލިފްޓު ތަކާއި ސައުންޑް ސިސްޓަމާއި ގައިޑެންސް ސާވިސަސް އަދި ޓެކްނިކަލް ސާވިސަސް އޮތީ ކުރިއަށް އޮތް ރަމަޟާން މަހު އެދެ ޙަރަމަށް ޒިޔާރަތްކުރާނެ މުސްލިމުންނަށް ޚިދްމަތް ދިނުމަށް ތައްޔާރުކުރެވިފައި ކަމަށެވެ.
ދުނިޔޭގެ އެކި ކަންކޮޅުތަކުން އެތައް މުސްލިމުންނަކާއި، ސަޢޫދީގައި ދިރިއުޅޭ އެތައް މުސްލިމުންނެއް ރަމަޟާން މަހު އެދެ މިސްކިތަށް ޒިޔާރަތް ކުރެއެވެ. ޚާއްސަކޮށް ރަމަޟާން މަހުގެ ފަހުދިހައިގައި ތާރާވީޙް ނަމާދު ކުރުމަށާއި، ޢުމްރާ ވުމަށް ޒިޔާރާތް ކުރާ މީހުން ގިނަވެއެވެ.
ސަޢުދީޢަރަބިއްޔާގެ މިސްކިތްތަކާއި ބެހޭ އިދާރާގެ އިސްވެރިޔާ ވިދާޅުވީ ސަރުކާރުގެ އަމާޒަކީ ދެ ޙަރަމަށް ޒިޔާރަތްކުރާ އެންމެހާ މުސްލުމުނަށް އެންމެ ފުރިހަމަ ޚިދްމަތް ފޯރުކޮށްދިނުން ކަމަށެވެ. އަދި ޢުމްރާވުމަށް ޒިޔާރަތްކުރާ ޢުމްރާވެރިންނާއި އެހެނިހެން މުސްލިމުންނަށް ލުއި ފަސޭހަވާނެ ގޮތްތައް ހަމަޖައްސައި ދިނުން ކަމަށެވެ.
Advertisement
This content is created and paid for by advertisers and does not involve Voice Journalists
