ރައީސުލްޖުމްޙޫރިއްޔާ އިބްރާޙިމް މުޙައްމަދު ޞާލިހު ދަތުރުފުޅު ކުރައްވަމުން ގެންދެވި މޮޓޯކޭޑު މުޒާހަރާތެރެއަށް ވެއްދި މައްސަލައިގައި ކުރީގެ ކަމިޝަނާ އޮފް ޕޮލިސް ހުސެއިން ވަޙީދު ސިފައިންގެ ޓްރެއިނިންތަކާއި ގުޅިގެން މުހިންމު ސުވާލުތަކެއް ކުރައްވައިފި އެވެ. 

ބައިނަލްޢަޤްވާމީ އަންހެނުންގެ ދުވަހުގެ ރަސްމީ ޖަލްސާގައި ބައިވެރިވެވަޑައިގަތުމަށް ފަހު އަނބުރާ ވަޑައިގެންނެވި މަގުމަތީގައި ރައީސުލްޖުމްޙޫރިއްުޔާ ދަތުރުކުރައްވަމުން ގެންދެވި މޮޓޯކޭޑަށް އިދިކޮޅު މުޒާހަރާގެ ބައިވެރިން ވަނީ ހުރަސްއަޅާފައެވެ. 

މުޒާހަރާގެ ބައިވެރިން މޮޓޯކޭޑަށް ހުރަސްއަޅާފައިވަނީ ސިފައިންނާއި ފުލުހުންގެވެސް ހާޒިރުގައެވެ. 

އެކަމާއި ގުޅިގެން ޕީޕީއެމުން ބުނީ ޕީޕީއެމްގެ ރައީސް އަބްދުالله ޔާމީން އަބްދުލްގައްޔޫމަށް ނުހައްގުން ކުރަމުންދާ އަނިޔާތަކާއި ދެކޮޅަށް އިދިކޮޅުން ކޮންމެ ރެއަކު ކުރިއަށް ގެންދާ މުޒާހަރާގެ ތެރެއިން ރޭގެ މުޒާހަރާ ނިންމާލުމަށް ޕާޓީ އޮފީސް ސަރަހައްދުތައި ތިއްބާ، ރައީސް ޞާލިހުގެ މޮޓޯކޭޑު އެ ސަރަހައްދަށް ވަނީ ކުއްލިއަކަށް ކަމަށެވެ.

އެ ސަރަހައްދު ދޫކޮށް އާންމުން ދިއުމަށް ދުރާލާ އިންޒާރެއް ދީފައި ނުވާކަމަށް ޕީޕީއެމްގެ އިހުތިޖާޖުގެ ބައިވެރިން ވަނީ ބުނެފައެވެ. އެހެންކަމުން، ސިފައިންނާއި ފުލުހުންގެ ފެއިލިއާގެ އިލްޒާމު އިދިކޮޅު ޕާޓީން ނަގަން ނުޖެހޭނެކަމަށް އެ ފަރާތުން ވަނީ ބުނެފައެވެ. 

ރައީސުލްޖުމްޙޫރިއްޔާގެ މޮޓޯކޭޑު ހުއްޓުވުމަށް ފުރުސަތު ލިބުނުގޮތާއި ގުޅިގެން ގިނަ ސުވާލުތަކެއް އުފައްދަމުންދާ މި ދަނޑިވަޅުގައި ކުރީގެ ސީޕީ ހުސެއިން ވަހީދު ފޭސްބުކުގައި ލިޔުއްވި ޕޯސްޓެއްގައި ވަނީ މޮޓޯކޭޑުގައި ތިއްބެވި ބޭފުޅުން ހައްދަވާފައިވާ ޓްރެއިނިންއާއި ގުޅިގެން ސުވާލު ކުރައްވާފައެވެ. 

އެގޮތުން ހުސެއިން ވަހީދު ވަނީ ވީ.ވީ.އައި.ޕީ ބޭފުޅެއް ގޮވައިގެން މުޒާހަރާއެއް ތެރެއަށް ވަނުމަކީ ކޮންތާކުން ހެދި ވީ.ވީ.އައި.ޕީ ޓްރެއިނިންއެއްގައި ކިޔަވައިދެއްވި މޮޑިއުލެއްގައި އޮތް ގޮތެއްތޯ އައްސަވާފަ އެވެ.

އަދި ތަމްރީނު ޕްރޮގްރާމުތަކުގައި ހަދާ އެކްސަސައިޒެއް ފަދައިން އާންމުން އެއްވެ މުޒާހަރާކުރަމުން ދިޔަ ތަނެއްގެ ތެރެއަށް ވީ.ވީ.އައި.ޕީ ސެކިއުރިޓީ ބޭފުޅެއް ގޮވައިގެން ވަނުމުގެ ސަބަބުން ކަންކަން ބޮއްސުންލައިގެން ދިޔައިމާ، އެކަމަކުގެ ޒިންމާ ނަގަން ޖެހޭނީ އާންމު ރައްޔިތުންތޯ ވެސް ހުސެއިން ވަނީ ސުވާލު އުފައްދަވާފަ އެވެ. 

ރައީސް އިބްރާހިމް މުހައްމަދު ސޯލިހުގެ މޮޓޯކޭޑަށް އިދިކޮޅު ޕީޕީއެމް ސަޕޯޓަރުން ހުރަސް އެޅުމަކީ ސެކިއުރިޓީ ފެއިލްވުމެއް ކަމަށް ބަލައި އެމަނިކުފާނުގެ ސެކިއުރިޓީ ކަންތައްތަކުގައި އެންމެ އިސްކޮށް އުޅުއްވާ އެމްއެންޑީއެފްގެ ކޮމާންޑިން އޮފިސަރު ކާނަލް އަބްދުالله މުހައްމަދު ވަނީ ސަސްޕެންޑްކޮށްފަ އެވެ.

އޭގެ އިތުރުން ރައީސް ޞާލިހުގެ ސެކިއުރިޓީ ބްރީޗްވި ގޮތް ހޯދުމަށް މަޖިލީހުގެ 241 ކޮމެޓީއިން މައްސަލަ ދިރާސާ ކުރައްވަމުންދާއިރު، އެ މައްސަލައިގައި ސަލާމަތީ ބާރުތަކުން އަމަލުކުރި ގޮތާއިގުޅޭ ތަފްސީލީ މައުލޫމާތު ހޯދުމަށް، ސަލާމަތީ ބާރުތައް 241 ކޮމެޓީއަށް ހާޒިރުކުރަން ވަނީ ނިންމާފަ އެވެ.