ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) ގެ ޑެޕިއުޓީ މެނޭޖިން ޑިރެކްޓަރުގެ މަގާމަށް މޯލްޑިވްސް ބްރޯޑްކާސްޓިން ކޮމިޝަން (ބްރޯޑްކޮމް) ގެ ނައިބު ރައީސް ކަމުގެ މަގާމުގައި ހުންނެވުމަށް ފަހު ކޮމިޝަންގެ މެންބަރު ކަމުން އިސްތިއުފާ ދެެއްވި އަހުމަދު ގައިސް އައްޔަންކޮށްފި އެވެ.
އެޗްޑީސީގެ ޑެޕިއުޓީ މެނޭޖިން ޑިރެކްޓަރުގެ މަގާމަށް ގައިސް އައްޔަނު ކުރުން--
ބްރޯޑްކޮމްގެ މަގާމަށް ގައިސް އައްޔަންކޮށްފައިވަނީ 2019 ވަނަ އަހަރުގެ ޑިސެމްބަރުގައެވެ. ބްރޯޑްކޮމް އިން ގައިސް އިސްތިއުފާ ދެއްވީ 2023 ވަނަ އަހަރުގެ ޖެނުއަރީ މަހުގެ 8 ގައެވެ.
ބްރޯޑްކާސްޓިން ކޮމިޝަންގެ މަޤާމުން ގައިސް ވަކިވެވަޑައިގަތީ އެހެން މަސައްކަތަކަށް ވަގުތު ހުސްކުރެއްވުމަށްކަމަށް ވިދާޅުވަމުން ނެވެ.
އެހެން ނަމަވެސް، އެފަހުން ގައިސް އުޅުއްވާތަން ފެނިގެންދިޔައީ އެމްޑީޕީގެ ރިޔާސީ ޕްރައިމަރީގައި ރައީސުލްޖުމްޙޫރިއްޔާ އިބްރާހިމް މުޙައްމަދު ޞާލިހުގެ ކެމްޕޭނުގައެވެ.
އިނގިރޭސި ވިލާތުގެ ޔުނިވާސިޓީއަކުން ބިޒްނަސް އެޑްމިނިސްޓްރޭޝަން ދާއިރާއިން މާސްޓާޒް ޑިގްރީ ހާސިލްކުރައްވާފައިވާ ގައިސްއަކީ ގދ އަތޮޅު ކައުންސިލްގެ މެމްބަރުކަން ކުރައްވާފައިވާ ބޭފުޅެކެވެ.
އޭނާ އަކީ އެމްޑީޕީ އުފެދުނީއްސުރެ އެޕާޓީއަށް ޚިދުމަތްކުރަމުން އައި ބޭފުޅެކެވެ. އެމްޑީޕީ އުފެދުނީއްސުރެ އެޕާޓީގެ ހަރަކާތްތަކުގައި އުޅުއްވާ ގައިސް އަކީ 2013 ވަނަ އަހަރުގެ ރިޔާސީ އިންތިޚާބުގައި ރައީސް މުޙައްމަދު ނަޝީދުގެ ކެމްޕޭނުގައި އިސްކޮށް އުޅުއްވި ބޭފުޅެއްކަންވެސް ފާހަގަކޮށްލެވެ އެވެ.
Advertisement
This content is created and paid for by advertisers and does not involve Voice Journalists
