ޕާކިސްޠާނުގެ ހުޅަނގު އުތުރަށް ބިންހެލުމެއް އައިސް 13 މީހުން މަރުވެއްޖެ

22 Mar 2023 | 16:00
ބިންހެލުމުގެ އަސަރު ކުރި ސަރަހައްދުގައި މީހުން ކޮޅުކޮޅު މައްޗަށް ދުވަނީ/ ޕާކިސްޠާން

އަވައްޓެރި ޕާކިސްޠާނުގެ ހުޅަނގުއުތުރަށް ބިންހެލުމެއްގެ އަސަރުކޮށްފިއެވެ.

6.5 މެގްނެޓިޔުޓްގެ ބާރު މިނުގައި އައި މި ބިންހެލުމުގެ އަސަރު އެންމެ ބޮޑަށް ކޮށްފައިވަނީ ޕާކިސްޠާނުގެ ޚައިބަރް ޕަކްތޫންވާ ޕްރޮވިންސަށެވެ. ބިންހެލުމާއި ގުޅިގެން މިހާތަނަށް 13 މީހަކު ވަނި މަރުވެފައެވެ. ޕާކިސްޠާނުގެ އަވައްޓެރި އަފްޣާނިސްޠާނުންވެސް 4 މީހަކު ވަނީ މަރުވެފައި ކަމަށް އެޤައުމުގެ އޮފިޝަލުން ވަނީ ބުނެފައެވެ.

ޔުނައިޓެޑް ސްޓޭޓަސް ޖިއޮލޮޖިކަލް ސާވޭ އިން ބުނެފައިވަނީ ބިންހެލުން އައިސްފައިވަނީ އަފްޣާނިސްޠާނު ގެ އިރުދެކުނުގައި އޮންނަ ޖުރުމް ޓައުން އާއި ތަޖަކިސްޠާން އަދި ޕާކިސްޠާނަށް ވެސް ބިންހެލުމުގެ އަސަރުކޮށްފައިވާކަމަށެވެ.

ބިންހެލުންއައި ވަގުތު ޕާކިސްޠާނުގެ ހާލަތު ކިޔައިދެމުން ޕާކިސްޠާނުގެ ލިޔުންތެރިއަކު އަލްޖަޒީރާއަށް ބުނެފައިވަނީ ބިންހެލުން އައި ވަގުތު އޭނާ ހުރީ ގެއަށްބޭނުންވާ ބައެއް ސާމާނު ގަތުމަށް ފިހާރައެއްގައި ކަމަށެވެ. އަދި އެތަނުގައި ހުއްޓައި ބިންގަނޑު ހެލޭ ކަމުގެ އިހްސާސު ކުރެވުނު ކަމަށެވެ.

"ފިހާރައިގެ ވެރިމީހާ އަހަރެން ފިހާރައިގައި ހުއްޓައި ހަޅޭއްލަވަން ފެށީ، ބިންހެލުމެއް! އަހަރެމެން އެންމެން ދުވެފަ މަގުމައްޗަށް ނުކުތީ" ލިޔުންތެރިޔާ މުޙައްމަދު ޒުބައިރް ޚާން ބުނިއެވެ.

ޒުބައިރް ބުނެފައިވަނީ ބިންހެލުމުގެ އިހްސާސް ކުރެވުމާއި އެކު މަގުމައްޗަށް ނުކުތްއިރު މީހުންތައް ހަރުއަޑުން ދުޢާ ކުރާ އަޑު އިވޭ ކަމަށާއި، އެހީތެރިކަމެއް ލިބޭތޯ އެންމެ ކައިރީގައި ހުރި ހޮސްޕިޓަލާއި ދިމާއަށް ދުވަމުން ދިޔަކަމަށެވެ.

2005 ވަނަ އަހަރު ވެސް ޕާކިސްޠާނަށް އައި ބިންހެލުމެއްގައި 73،000 މީހުން މަރުވެފައިވެއެވެ.

ޕާކިސްޠާނުގެ އޮފިޝަލުން ބުނެފައިވަނީ ޚައިބަރު ޕްރޮވިންސުގެ އެކި ހިސާބުތަކުން ނުވަ މީހަކާއި ދެ ކުޑަ ކުއްޖަކު މަރުވެފައިވާކަމަށެވެ. އަދި 47 މީހަކަށް ވަނީ އެކިވަރުގެ އަނިޔާތައް ލިބިފައެވެ.

Advertisement

ކޮމެންޓް