އިޒްރާއިލުން ސީރިޔާގެ ހަލަބް އެއަރޕޯޓަށް ހަމަލާދިނުމަށް މިސައިލް ތަކެއް ލޯންޗްކޮށްފިކަމަށް ސީރިޔާގެ ޑިފެންސް މިނިސްޓްރީ އިން ބުނެފިއެވެ.
މިއީ އިޒްރާއިލުން 6 މަސްދުވަސް ތެރޭގައި ސީރިޔާގެ ހަލަބަށް ހަމަލާދޭ 3ވަނަ ފަހަރެވެ.
ސީރިޔާގެ ނިއުސްއެޖެންސީ ސަނާ އަށް މައުލޫމާތު ދިން ސިފައިންގެ މީހަކު ދިން މައުލޫމާތުގައި މި ހަމަލާގެ ސަބަބުން މީހަކު މަރުވި ކަމެއް އަދި މީހަކަށް އަނިޔާވި ކަމެއް ބުނެފައެއް ނުވެއެވެ. އޮފިޝަލް ދެއްވި މައުލޫމާތުގައި އިތުރަށް ވިދާޅުވެފައިވަނީ އިޒްރާއިލުން ލޯންޗުކުރި މިސައިލްތައް އަމާޒު ހިފައިފައި ހުރީ ހަލަބާއި ދިމާއަށްކަމަށެވެ.
ހަލަބްގެ އެއަރޕޯޓަކީ ފެބްރުއަރީ 6 ވަނަ ދުވަހު ސީރިޔާ އާއި ތުރްކިޔޭ އަށް އައި ބިންހެލުންތަކުގައި ސީރީޔާއިން ހާލުގައި ޖެހުނު ފަރާތްތަކަށް ބައިނަލްއަޤްވާމީ ފަރާތްތަކުގެ އެހީ ފޯރުކޮށްދޭ މައިދޮރާއްޓެވެ.
މިމަހުގެ ކުރީކޮޅުގައިވެސް އިޒްރާއިލުން ވަނީ ހަލަބްގެ އެއަރޕޯޓަށް ވައިގެ މަގުން ހަމަލާތަކެއް ދީފައެވެ. އެހަމަލާތަކުގެ ސަބަބުން އެއަރޕޯޓުގެ ރަންވޭއަށް ގެއްލުން ތަކެއް ލިބި ބޯޓުތައް ނުޖެއްސޭވަރުވެ އެ އެއަރޕޯޓު ބަންދު ކުރަންވެސް ޖެހުނެވެ.
އިޒްރާއިލުން ސީރިޔާ އަށް މިފަދަ އެތައްސަތޭކަ ހަމަލާތަކެއް ދީފައިވެއެވެ. އެހެންނަމަވެސް ހަމަލާތަކުގެ ޒިންމާ އިޒްރާއިލްގެ މިލިޓަރީ އިން ނަގައިފައވަނީ މަދުފަހަރަކުއެވެ.
Advertisement
This content is created and paid for by advertisers and does not involve Voice Journalists
