އއ އުކުޅަހުގައި ހިންގާ އުކުޅަސް ހޯޕް ޖަމިއްޔާގެ ފަރާތުން، ރަމަޟާން މަހާއި ދިމާކޮށް އެރަށުގެ ރައްޔިތުންނަށް ހިލޭ ހަނޑޫ، ހަކުރު އަދި ފުށް ބަހަމުންދާ ކަމަށް އެ ޖަމިއްޔާ އިން ބުނެފި އެވެ.

އުކުޅަހު ހޯޕްގެ ފަރާތުން "ވޮއިސް" އަށް މައުލޫމާތު ދެމުން އަހްމަދު ފަޔާޒް ބުނީ ރަމަޟާން މަހާއި ގުޅުވައިގެން ރަށުގެ ރައްޔިތުންނަށް މިގޮތަށް އެހީތެރިކަން ފޯރުކޮށްދޭތާ 5 ވަރަކަށް އަހަރުވެދާނެ ކަމަށެވެ. އަދި މިވާހަކަ ކުރިން ނުދެކެވި ދިޔައީ މިކަމަކީ ފަޔާޒް އާއި އޭނާގެ ބައެއް ރަޙްމަތްތެރިން ފަރުދީ ގޮތުން ކުރިކަމެއް ކަމަށެވެ. ނަމަވެސް އުކުޅަސް ހޯޕް ގެ ނަމުގައި ޖަމިއްޔާ ރަޖިސްޓްރީ ކޮށް މިހާރު އެކަން ކުރާތާ ދެ އަހަރުވެއްޖެ ކަމަށެވެ.

ފަޔާޒް ބުނީ މިކަމަކީ ރަމަޟާން މަހު އުކުޅަހު ރައްޔިތުންނަށް އެކި ދިމަދިމާއިން ލުއި ކޮށްދިނުމުގެ ގޮތުން ކުރާ ކަމެއް ކަމަށެވެ.

ފަޔާޒް ބުނީ ފުރަތަމަ މި ކަންފަށައިގަތް އިރު ބާޒާރުގައި އަގު ބޮޑު ކޮށް ހުންނަ ތަކެތި ގަނޑުކޮށް ނަގައި ރައްޔިތުންނަށް އަގުހެޔޮކޮށް ވިއްކި ކަމަށެވެ. އެގޮތުން ބާޒާރުގައި 10ރުފިޔާ އަށް ފިޔާ ހުރިއްޔާ 5 ރުފިޔާ އަށް ފިޔާ ކިލޯ ވިއްކި ކަމަށާއި، އެގޮތަށް މަސައްކަތް ކުރަމުން ގޮސް މިހާރު ހަނޑޫ، ހަކުރު އަދި ފުށް ހިލޭ ދޫކުރަމުން ދާކަމަށެވެ.

މިއަހަރު ހިލޭ ކާޑުގެ ބާވަތްތައް ދޫކުރާއިރު ކޮންމެ ބޮލަކަށް 8 ކިލޯގެ މަގުން ދޫކުރަމުން ދާކަމަށް ފަޔާޒް ބުންޏެވެ. އެގޮތުން 3 ބާވަތް ހިމެނޭހެން މިވަގުތު އުކުޅަހުގައި ހުރި ކޮންމެ ރަށެއްގެ ކޮންމެ މީހަކަށްވެސް 8 ކިލޯ ކާޑު ދޫކުރާނެ ކަމަށެވެ. ފަޔާޒް ބުނީ އެ ގޭބިސީއަކުން ބޭނުންވާ ބާވަތެއް އެގޭބިސީގައި ހިމެނޭ މީހުންގެ މިންވަރުން ދޫކުރާނެ ކަމަށެވެ.

ފަޔާޒް ބުނީ މި ކަމުގެ އިތުރުން ރަމަޟާން މަހާއި ގުޅިގެން ކުޑަކުދިންގެ ހިތްތަކުގައި ޞަދަޤާތް ދިނުމަށް ލޯބި ޖެއްސުމުގެ މަޤްސަދުގައި ގޭތެރޭގައި ހިފައި ގެންގުޅޭ ތަކެތި އެކުލެވޭހެން ހަދިޔާ ބަންދުކޮށް ރަށުން ފާހަގަ ކުރެވިފައިވާ ވަކިވަކި ޢާއިލާތަކަށް އެކުދިން މެދުވެރިކޮށް އެހަދިޔާ ތައް ހަވާލުކުރެވޭނެ ކަމަށެވެ.

ފަޔާޒް ބުނީ މިފާއިތުވި އަހަރުތަކުގެ ތެރޭގައި މިކަން ކަމަށް ލައްކައިން ޚަރަދު ކުރެވިފައިވާކަށެވެ. އަދި މިފަދަ ކަންކަން އިންތިޒާމް ކޮށް އެކަންކަން ކުރެވެމުންދާ ކަމަށްޓަކައި އުފާ ކުރާކަމަށެވެ.

އޭނާ އިތުރަށް ބުނީ ރަމަޟާން މަހަށް ޚާއްސަ ކޮށްގެން މިހިންގޭ ޕްރޮގްރާމް ތަކާއި ރަށުގައި ބޭއްވޭ ދީނީ ހޭލުންތެރިކަން އިތުރު ކުރުމުގެ ޕްރޮގްރާމް ތަކަކޯ ރަށުގެ ރައްޔިތުންނަށް ހެޔޮ އެދޭ އެރައްޔިތުން ދެކެ ހަޤީޤީ ލޯބި ވާ ފަރާތްތަކުގެ ހެޔޮ އެދުންތަކާއި އެކު ހިންގޭ ޕްރޮގްރާމް ތަކެއް ކަމަށާއި، އަބަދުވެސް އެބޭފުޅުންގެ އެހީތެރި ކަމަށްޓަކައި ޝުކުރުވެރި ވާކަމަށެވެ.