ޔޫރޯ ކޮލިފައިންގައި މިރޭ ލިޗެންސްޓައިން އާއި ދެކޮޅަށް ޕޯޗުގަލްގެ ފުރަތަަމަ އެގާރައިގައި ރޮނާލްޑޯ ކުޅެން ނުކުތުމާއި، ބައިނަލްއަގުވާމީ ފުޓްބޯޅައިގައި ރޮނާލްޑޯއަށް އަނެއްކާވެސް އިތުރު ރެކޯޑެއް ލިބިގެން ހިނގައްޖެ އެވެ.

އެގޮތުން މިފަހަރު ރޮނާލްޑޯއަށް ލިބިގެން ދިޔަ ރެކޯޑަކީ ބައިނަލްއަގުވާމީ ފުޓްބޯޅައިގައި ގައުމީ ޓީމަށް އެންމެ ގިނަ މެޗު ކުޅުމުގެ ރެކޯޑެވެ.

އޮގަސްޓް 20، 2003 ގައި ރޮނާލްޑޯ އެންމެ ފުރަތަމަ ޕޯޗުގަލްގެ ޖާޒީގައި ކުޅެން ނުކުތްއިރު، މިރޭ ލިޗެންސްޓައިން އާއި ދެކޮޅަށް ކުޅެން ނުކުތުމުގެ ކުރިން އޭނާ އެންމެ ފަހުން ގައުމީޓީމަށް ކުޅުނު މެޗަކީ 2022 ވަނަ އަހަރުގެ ޑިސެމްބަރު މަހުގެ 10 ވަނަ ދުވަހު ގަތަރު ވޯލްޑް ކަޕުގައި މޮރޮކޯއާއި ދެކޮޅަށް ކުޅުނު މެޗެވެ.

މިއާއެކު ރޮނާލްޑޯ ވަނީ ގައުމީ ޓީމަށް 196 ކުޅެގެން ކުވައިތުގެ ބަދަރު އަލް މުތާވާ ހަދާފައިވާ ރެކޯޑާއި އަރާހަމަކޮށްފައެވެ. ގައުމީ ޓީމަށް 196 މެޗު ކުޅެދީފައިވާ ބަދުރު އަލް މުތާވާ އެންމެ ފަހުން ކުވައިތުގެ ގައުމީ ޓީމަށް މެޗެއް ކުޅެދީފައިވަނީ 2022 ވަނަ އަހަރުގެ ޖޫން މަހުގެ 14 ވަނަ ދުވަހުއެވެ.

ޔޫރޯ ކޮލިފައިންގައި މިރޭ ލިޗެންސްޓައިން އާއި ދެކޮޅަށް ޕޯޗުގަލްގެ ފުރަތަަމަ އެގާރައިގައި ރޮނާލްޑޯ ކުޅެން ނުކުތުމާއި އެކު އޭނާ ގައުމީ ޓީމަށް ކުޅުން މެޗުގެ އަދަދު ވަނީ 197 އަށް އަރާފައެވެ.

މިއާއެކު މިވަގުތު ރޮނާލްޑޯގެ ފުރަތަަމަ ޓާގެޓަކަށް ވެގެންދާނީ ގައުމީ ޓީމަށް 200 ހާމަކުރާ ފުރަތަމަ ކުޅުންތެރިއާގެ ޝަރަފް ހޯދުމެވެ. އަދި އެއަށް ފަހު 2024 ވަނަ އަހަރުގައި ޖަރުމަންވިލާތުގައި އޮންނަ ޔޫރޯ ފުޓްބޯޅަ މުބާރާތުގައި ކުޅުމަކީ ރޮނާލްޑޯގެ ހުވަފެނެކެވެ.