ޔޫރޯ 2024، ކޮލިފައިންގައި މިރޭ ރަށުން ބޭރުގައި އިޓަލީއާ ދެކޮޅަށް ކުޅުނު މެޗު ކާމިޔާބުކޮށް އިގިރޭސިވިލާތުން 2014 އަހަރުގެ ފަހުން ފުރަތަަމަ ފަހަރަށް އިޓަލީގެ މައްޗަށް ކުރިހޯދައިފިއެވެ.
މެޗުގެ ފުރަތަަމަ ހާފުގައި އިގިރޭސި ޓީމުން ދެލަނޑު ލީޑެއް ނެގިއިރު، އެޓީމުގެ ފުރަތަމަ ލަނޑު 13 މިނެޓުގައި ކާމިޔާބުކޮށްދިނީ ވެސްޓު ގޭމްގެ މިޑްފީލްޑަރު ޑެކްލަން ރައިސް އެވެ. އަދި ފުރަތަަމަ ހާފު ނިމުމުގެ ކުރިން އެޓީމުގެ ދެވަނަ ލަނޑު ލިބުނު ޕެނަލްޓީއަކުން ކާމިޔާބުކޮށްދިނީ ކެޕްޓަން ހެރީ ކޭން އެވެ.
މިއާއެކު ހެރީ ކޭންއަށް ވަނީ އިގިރޭސި ގައުމީ ޓީމަށް އެންމެ ގިނަ ލަނޑުޖެހި ކުޅުންތެރިޔާގެ ޝަރަފު ލިބިފައެވެ. ކުރިއަށް މި ރެކޯޑް އޮންނަނީ އިގިރޭސި ގައުމީ ޓީމަށް 120 ކުޅެގެން 53 ލަނޑު ކާމިޔާބުކޮއްފައިވާ ވޭން ރޫނީގެ އަތުގައެވެ. މިރޭގެ މެޗުގައި ކާމިޔާބުކުރި ލަނޑާއެކު އިގިރޭސި ގައުމީ ޓީމަށް ކުޅުނު 81 ކޭން ކާމިޔާބުކުރި ލަނޑުގެ އަދަދު ވަނީ 54 އަރާފައެވެ.
ދެވަަނަ ހާފްގައި އިޓަލީ އިން ވަނީ އެޓީމުގެ ކުޅުން ރަނގަޅުކޮށް 56 ވަނަ މިނެޓުގައި ލަނޑެއް ކާމިޔާބުކޮށް ނަތީޖާގެ ފަރަގު ކުޑަކޮށްފައެވެ. މިލަނޑު އެޓީމަށް ކާމިޔާބުކޮށްދިނީ ޒުވާން ފޯވާޑް މަޓީއޯ ރެޓެގުއި އެވެ. މިއީ އެޓީމުގެ ލޮރެންޒޯ ޕެލެގްރިނީ ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ.
ފަހު ހާފުގެ 80 ވަނަ މިނެޓުގައި އިގިރޭސި ޑިފެންޑަރު ލޫކް ޝޯއަށް ރެފްރީ ދެވަަނަ ރީނދޫ ކާޑާއެކު ރަތް ކާޑެއް ދައްކާ ދަނޑުން ފޮނުވާލުމުން މެޗުގެ ފަހު 10 މިނެޓު އެޓީމުން ފުރިހަމަކުރީ އެއްކުޅުތެރިއަކު މަދުކޮށެވެ.
Advertisement
This content is created and paid for by advertisers and does not involve Voice Journalists
