ފޭރާމާއި ހިފާ ގެންގުޅޭ ތަކެތި ހިސާބަށްވުރެ ގިނަކުރުމަކީ ވެސް އިސްރާފު ކުރުން ކަމަށް މިއަދުގެ ޚުތުބާގައި ބުނެފިއެވެ.

އިސްރާފު ކުރުމަކީ ނިޢުމަތް ތަކަށް ކުފުރުވުން މައުޟޫއަށް މިއަދު އިއްވާފައިވާ ޚުތުބާގައިވަނީ އިސްރާފު ކުރުމުގެ ނުބައި ކަމުގެ މައްޗަށް އަލިއަޅުވާލާފައެވެ. 

އެގޮތުން، ރަމަޟާން މަހަކީ ސަވާބާއި ދަރުމައިގެ މަގުތައް ހުޅުވިފައިވާ މަތިވެރި މައްސަރެއް ނަމަވެސް ބައެއް މުސްލިމުންގެ ތެރޭގައި އެމަސް ވެފައިވަނީ ކާބޯތަކެތީން އިސްރާފުކުރުން ގިނަ މަހަކަށް ކަމަށް ޚުތުބާގައި ބުނެފައިވެއެވެ. 

Advertisement

އަދި އެއްވެސް މަހެއްގައި އިސްރާފު ކުރުމަކީ މާތްالله ރުހިވޮޑިގެންވާ އަމަލެއް ނޫން ކަމުގައި ވިޔަސް މިއަދު އިންސާނުންނާއި ކުރިމަތިވެފައިވާ އިޖްތިމާއީ ބަލިތަކުގެ ތެރޭގައި އިސްރާފުކުރުން ހިމެނޭ ކަމަށް ޚުތުބާގައި ބުނެފައިވެއެވެ. 

މިއާއެކު ތަނަވަސްތަކާމާއި އިސްރާފުކުރުމަކީ ގުޅިފައިވާކަމެއްކަން ފާހަގަކޮށް ޚުތުބާގައި ބުނީ ބައެއްގެ މައްޗަށް ތަނަވަސްކަން އަތުވެއްޖެނަމަ އިސްރާފުކުރުމުގެ ދޮރުތައް ހުޅުވިގެން ހިނގައިދާނެ ކަމަށް ޚުތުބާގައި ފާހަގަކޮށްފައިވެ އެވެ. 

ޚުތުބާގައި ބުނީ ކާބޯތަކެތީގެ ބޭނުން ހެޔޮގޮތުގައި ނުކޮށް، އޭގެ ހައްގު އަދާނުކޮށް އެ ތަކެތި ގުދަންކޮށްފައި ބެހެއްޓުމަކީ ވެސް އިސްރާފު ކުރުން ކަމަށެވެ. އަދި ފޭރާމާއި ހިފާ ގެންގުޅޭ ތަކެތި ހިސާބަށްވުރެ ގިނަކުރުމަކީ ވެސް އިސްރާފު ކުރުން ކަމަށެވެ.

މިއާއެކު ޚުތުބާގައި ވަނީ ދެވަނަ ފަހަރަށް ބޭނުން ކުރެވިދާނެ މުދަލާއި ކާއެއްޗެހި އުކާނުލައި އެތަކެތި ބޭނުންކުރުމަށް އިސްލާމް ދީން ބާރުއަޅާ ކަން ފާހަގަކޮށ އެތަކެއްޗަކީ މާތް الله ގެ ނިއުމަތްތައް ކަމަށާއި މިތަކެތި އުކާލުމަކީ ނިއުމަތުގެ ވެރި ފަރާތަށް ޝުކުރު ނުކުރުން ކަމަށް ބުނެފައެވެ. 

އަދި ހަމައެހެންމެ، މިއަދު ފަސޭހައިން ލިބެން ހުންނަ ފެނާއި ކަރަންޓަކީ ވެސް އިސްރާފުކުރާ ދެ ނިއުމަތްކަމަށާ ފެނާއި ކަރަންޓާއި ކަރަންޓުން ހިންގާ އެހެނިހެން ތެކެތިން އިސްރާފުވައިރު، އޭގެ ސަބަބުން ފެނުގެ ބިލުތަކަށް އިތުރުވި ފައިސާއަކީ އިސްރާފެއް ކަމަށެވެ. އެއީ ބޭނުންތެރި އެހެން ކަމަކަށް ހަރަދު ކުރަން ހުރި ފައިސާ ކަމަށެވެ.

މީގެ އިތުރުން ބޭކާރު ކަންކަމުގައި ހޭދަކުރުމަކީ އިސްރާފު ކުރުން ކަން ފާގަކޮށް ޚުތުބާގައި ބުނީ އެކަންކަމަކީ އިސްލާމް ދީނުގައި ހިމެނޭ ކަމެއް ނޫން ކަމަށެވެ. އަދި މުސްލިމުންގެ ގޮތަކީ ޙައްޤު ގޮތުގައި މުދާ އެއްކޮށް ބޭނުންތެރި ކަންކަމަށް ހޭދަ ކުރުން، ކަމަށާ މިއަދު އިސްރާފު ކުރަނީ ހަމަ އެކަނި މުއްސަދިންނެއް ނޫން ކަމަށްވެސް ބުނެފައިވެއެވެ. އެހެނީ އަތްމަތި ދަތި މީހުންވެސް، ކޮންމެހެން ކުރަން ނުޖެހޭ ޚަރަދުތައް ކުރުމަށްޓަކައި ދަރަނި ނަގަމުންދާތަން މިހާރު ފެންނަކަން ފާހަގަކޮށް ޚުތުބާގައި ބުނީ، މުސްލިމުންނަކީ ލިބޭ އެއްޗަކުން ފުއްދާލައިގެން ދިރިއުޅޭ ބައެއް ކަމަށެވެ. 

"އިސްރާފު ނުކުރުމަށް އަމުރުކުރައްވައި މާތް الله ވަޙީކުރައްވާފައިވެއެވެ. މާނައީ: އަދި ތިޔަބައިމީހުން ކައިބޮއި އުޅޭށެވެ! އަދި އިސްރާފު ނުކުރާށެވެ! ހަމަކަށަވަރުން އިސްރާފު ކުރަ މީހުން ދެކެ އެކަލާނގެ ލޯބިވެވޮޑިގަނެ ނުވެތެވެ." ޚުތުބާގައި ބުނެފައިވެއެވެ.