ފެބްރުއަރީ 6 ވަނަ ދުވަހު ތުރްކިޔޭ އާއި ސީރިޔާ އަށް އައި ބިންހެލުންތަކުގައި ތުރްކިޔޭގެ ކަހްރަމްނަމަރާސް ޕްރޮވިންސްގައި ވެއްޓުނު ޢިމާރާތްތަކުގެ ބަދަލުގައި އައު އިމާރާތްތައް އެޅުމުގެ މަސައްކަތް ފެށުމަށް "ގްރައުންޑްބްރޭކިންގް" ހަފްލާ ބާއްވައިފިއެވެ.

ރަމަޟާން މަހުގެ ފުރަތަމަ ދުވަހު ބޭއްވުނު މިހަފްލާގައި ތުރްކިޔޭގެ ރައީސް ރަޖަބް ޠައްޔިބް އުރްދުޣާން އާއި ތުރްކިޔޭގެ ސަރުކާރުގެ ބައެއް އިސް ބޭފުޅުންވަނީ ބައިވެރިވެވަޑައިގެންފައެވެ.

ހަފްލާގައި ބައިވެރިވި ބިންހެލުމުގައި ހާލުގައި ޖެހި ކޮންޓެއިނާ ގެތަކުގައި ދިރިއުޅެމުންދާ މީހުންނާއި މުޚާތަބުކޮށް އުރްދުޣާން ވަނީ ވާހަކަފުޅުދައްކަވައިފައެވެ.

އުރްދުޣާން ވިދާޅުވީ ބިންހެލުން ތަކުގައި ހަލާކުވި ޢިމާރާތްތަކުގެ ބަދަލުގައި އައު ޢިމާރާތްތައް ނާޅާއި މަސައްކަތް ހުއްޓާލައިގެން ހުސްކޮށް ނުތިބޭނެ ކަމަށެވެ. އަދި ކެނޑި ނޭޅި ޢިމާރަތްތައް އަލުން އެޅުމުގެ މަސައްކަތް ކުރަމުންދާނެ ކަމަށެވެ.

އުރްދުޣާން ގޮވާލެއްވީ ކުރެވެމުންދާ ހިތްދަތި އިހްސާސްތައް އެކަނި ތަހައްމަލް ނުކޮށް އެއިން ސަލާމަތްވެ އަރައިގަތުމަށް އެހެން މީހުންނާއި ހިއްސާކުރުމަށެވެ. ރަމަޟާން މަހަކީ އެއްބައިވަންތަވެ އެކުވެރިވެ އުޅޭ މަހަކަށް ހެދުމަށެވެ.

މީގެ އިތުރުން ތުރްކިޔޭގެ އެކި ހިސާބުތަކުގެ މުނިސިޕަލް ތަކުން އިންތިޒާމް ކުރާ ރަމަޟާން މަހާއި ގުޅޭ ހަރަކާތްތައް ބިންހެލުން ތަކާއި ގުޅިގެން ގެއްލުންވި މީހުން ދިރިއުޅެމުންދާ ވަގުތީ ހިޔާތައް ހިމެނޭ ސަރަހައްދު ތަކުގައި ބާއްވަން ނިންމާފައިވާ ކަމަށެވެ.

"އަހަރެމެން އަތުކުރި އޮޅާލައިފައި މިވަނީ 77،057 ޑިސާސްޓަރ ހައުސް އަދި 30،310 ވިލެޖް ހައުސް، ކަހްރަމަންމަރާސް ގައި ބިނާ ކުރުމަށް. އިމަރާތްތައް ބިނާ ކުރެވޭނީ ގެއްލުންލިބިފައިވާ މިންވަރު ދެނެގަތުމަށް ފަހު" އުރްދުޣާން ވިދާޅުވިއެވެ.

50،000 ހާ މީހުން ބިންހެލުން ތަކުގައި މަރުވެފައިވާއިރު ކަހްރަމަންމަރާސްއިން 12،307 މީހުން މަރުވެފައިވެއެވެ.

ގްރައުންޑްބްރޭކިން ރަސްމިއްޔާތާއި އެކު އުރްދުޣާން އާއި ސަރުކާރުގެ އިސް އޮފިޝަލުން ވަނީ ކަހްރަމަންމަރާސްގެ ވަގުތީ ހިޔާތަކުގައި ދިރިއުޅެމުންދާ މީހުންނާއި އެކު ރޯދަވީއްލުމުގައި ބައިވެރިވެ ވަޑައިގެންފައެވެ.