މެލޭޝިޔާގެ ވެރިރަށް ކުއަލަ ލަމްޕޫރުގައި މި މަހުގެ 18 އިން 19 އަށް ކުރިއަށް ގެންދިޔަ ފުޓްބޯޅަ ފިއެސްޓާގައި ބައިވެރިވި ބީޖީގެ އެކަޑަމީ ޓީމުތައް އެނބުރި ރާއްޖެ އަތުވެއްޖެއެވެ.

މެލޭޝިޔާ މުބާރާތާއި ބެހޭގޮތުން ވޮއިސް އެމްވީ އަށް މައުލޫމާތު ދެއްވަމުން ބީޖީގެ އެކަޑަމީ ހެޑް ކޯޗް އަބްދުﷲ ނަސީރު ބުނީ މިދަތުރަކީ ވަރަށް ކާމިޔާބު ދަތުރެއް ކަމަށެވެ. މީގެ ސަބަބުން މިކުދިންނަށް ވަރަށް ރަގަޅު ތަޖުރިބާތަކެއް ލިބިގެން ގޮސްފި ކަމަށެވެ.

މިދަތުރުގައި ބީޖީ އެކަޑަމީގެ ހަތަރު ޓީމެއް ބައިވެރިވެފައިވެއެވެ. އެއީ 13 އަހަރުން ދަށުގެ 'އޭ' ޓީމާއި 'ބީ' ޓީމުގެ އިތުރުން 11 އަހަރުން ދަށުގެ ޓީމަކާއި 15 އަހަރުން ދަށުގެ ޓީމެކެވެ. ޖުމްލަ 42 ކުޅުންތެރިންނާއި 7 އޮފިޝަލަކު މިދަތުރުގައި ބައިވެރިވެފައިވާއިރު، ދަތުރުގެ ހުރިހާ ހަރަދުތަކެއް ހަމަޖައްސައިދިނީ ބެލެނިވެރިންނާއި އެކަޑަމީ ގުޅިގެން ކަމަށާއި މިފަދަ ކުޅުންތެރިންގެ ކުރިއެރުމާއި ގުޅުންހުންނަ ކަންކަމުގައި ބެލެނިވެރިންގެ ފަރާތުން ލިބޭ އެއްބާރުލުން ފާހަގަކޮށް އަބޯ ކޯޗު ވަނީ އެފަރާތްތަކަށް ޝުކުރު އަދާކޮށްފައެވެ.

މީގެއިތުރުން މުބާރާތުގައި ކުޅުންތެރިންގެ ފަރާތުން ފެނުނު ޕާފޯމަންސް އާއި ބެހޭގޮތުން އަބޯ ކޯޗު ބުނީ ވަރަށް ހިތްހަމަޖެހޭ ކަމަށެވެ. ހާއްސަކޮށް 13 އަހަރުން ދަށުގެ 'އޭ' ޓީމު އެ އުމުރު ފުރައިގެ ތިންވަނަ ހޯދި އިރު 26 ޓީމު ބައިވެރިވި 13 އަހަރުންދަށުގެ ބައިގައި 'ބީ' ޓީމު ވަނީ ހަތަރު ވަނަ ހޯދާފައެވެ.

ޖުމްލަކޮށް ހަތަރު ޓީމުގެ ކުޅުމާއި މެދުވެސް ހިތްހަމަޖެހޭ. މި މުބާރާތުގައި އެންމެ ބޮޑަށް އުދަގޫވީ ބޮޑު ދަނޑުގައި ކުޅެންޖެހުމުން މާލޭގައި އެކަޑަމީގެ ޕްރެކްޓިސް ކުރަން މިލިބެނީ ކުޑަތަންކޮޅެއް އޭގެ ސަބަބުން ބޮޑު ދަނޑެއްގައި ކުޅެންޖެހުމުން ކުޅުންތެރިންނަ އުދަގޫތަކެއް ކުރިމަތިވިކަމަށް އަބޯ ކޯޗު ބުންޏެވެ.

ފުޓްބޯޅަ އެކަޑަމީތަކުން ފުޓްބޯޅައިގެ އާޖީލެއް ބިނާކުރުމަށް ކުރަމުން އަންނަ މަސައްކަތްތަކާއި ބެހޭގޮތުން ވާހަކަދައްކަމުން އަބޯ ކޯޗު ބުނީ މި ފަދަ ފުރުސަތުތަކެއް ކުޅުންތެރިންނަށް ހޯދައިދިނުމަކީ ވަރަށް މުހިއްމުކަމެއް ކަމަށެވެ. މިހާރު ވެސް ބައެއް އެކަޑަމީތަކުން މިފަދަ މުބާރާތްތަކުގައި ބައިވެރިވަމުން އަންނަނީ، އަބޯ ކޯޗު ބުންޏެވެ.