މިހާރު އަޅާ މިސްކިތްތަކަކީ ތަފާތު އަދި ޚާއްސަ ޑިޒައިންތަކަކަށް އެޅޭ މިސްކިތްތަކެއް ކަމަށް އިސްލާމިކް މިނިސްޓަރ އަހްމަދު ޒާހިރު އަލީ ވިދާޅުވެއްޖެއެވެ.

ރާއްޖެ ޓީވީގެ ފަލަ ސުރުހީ ޝޯގައި ވާހަކަ ދައްކަވަމުން މިނިސްޓަރ ވިދާޅުވެފައިވަނީ ކުރީގައި އަޅަމުން އައި މިސްކިތްތަކުގެ ޑިޒައިން ހުންނަނީ ވަކި ގޮތަކަށް ކަމަށާއި މި ސަރުކާރުން މިހާރު މިސްކިތްތައް އަޅަމުން ދަނީ ހާއްސަ ޑިޒައިން ތަކެއް ކުރަހާފައި ކަމަށެވެ.

އެގޮތުން ރައީސް އިބްރާހިމް މުހައްމަދު ޞާލިހުގެ ސަރުކާރުން މިސްކިތްތަކުގެ ޑިޒައިންތަކަށް ބަދަަލު ގެނެސް އަމާޒަކަށް ވެފައިވަނީ ކޮންމެ ރަށެއްގެވެސް މިސްކިތަކީ އެރަށެއްގެ ހުންނަ އެންމެ ރީތި އަދި އެންމެ ފުރިހަމަ އިމާރާތަށް ހެދުން ކަަމަށް މިނިސްޓަރ ވިދާޅުވެފައިވެއެވެ.

"މިހާރު މިއަޅާ މިސްކިތް ވަރަށް ތަފާތު ވާނެ. ބަލައިލީމަ އިނގޭނެ މިއީ 300 މީހުންގެ ޖާގައިގެ މިސްކިތެއް ވެއްޖިއްޔާ 300 މީހުންގެ ޖާގައިގެ މިސްކިތެއްކަން. 500 ވެއްޖިއްޔާ 500 މީހުންގެ ޖާގއިގެކަން." މިނިސްޓަރ ވިދާޅުވިއެވެ.

އެގޮތުން މިނިސްޓަރ ވިދާޅުވީ މިސްކިތްތައް ތައްޔާރު ކޮށްފައިވަނީ 3 ޑިޒައިންއަކަށް ކަމަށެވެ. އެއީ 300 މީހުންގެ މިސްކިތާއި 500 މީހުންގެ މިސްކިތާއި 700 މީހުންގެ މިސްކިތްތަކެއް ކަމަށެވެ.

މިއާއިއެކު މިސްކިތްތައް އަޅާނިމޭއިރު މި ހުރިހާ މިސްކިތެއްވެސް ހުންނާނީ އެސީކޮށް ސޯލާ ޕެނަލް ހަރުކޮށްފައި ކަމަށް ވެސް މިނިސްޓަރ ވަނީ ފާހަގަކުރައްވާއެވެ.

"ސަރުކާރުން ބޭނުންވި އެއްކަމަކީ ރާއްޖެއަށް އަންނަ ތަރައްޤީއާއި އެއްވަރަށް މިސްކިތްތަކުންވެސް އެކަން ފެނިގެން ދިޔުން." މިނިސްޓަރ ވިދާޅުވިއެވެ.

މީގެ އިތުރުން މިނިސްޓަރ ވިދާޅުވީ މިސްކިތްތައް މަރާމާތު ކުރުމަށް ސިޓީތަކުގެ ތެރެއިން މާލެ ސިޓީއަށް 1 މިލިއަން ރުފިޔާ، އައްޑޫ ސިޓީއަށް 1 މިލިއަން ރުފިޔާ އަދި ފުވައްމުލަކު ސިޓީއަށާއި ކުޅުދުއްފުށި ސިޓީއަށް ވެސް ވަކި އަދަދެއް ކަނޑައެޅުމަށްފަހު އެފަރާތްތަކާއި ހަވާލު ކޮށްފައި ކަމަށެވެ.

އަދި ރަށްރަށުގެ މިސްކިތްތައް އާބާތުރަ ފިލުވުމަށްޓަކައި ކުރަމުން ދިޔަ މަސައްކަތްތަކުގެ ތެރެއިން ވެސް އެހީ ތެރިކަން ފޯރުކޮށްދެމުންދާ ކަމަށެވެ.

"އެހެންވީމަ މިސްކިތްތައް ރަމަޟާން މަހަށް ތައްޔާރު ކުރުމުގެ ގޮތުން އަޅުގަނޑުމެންނަށް ގިނަ ގުނަ މަސައްކަތްތަކެއް ކުރެވިފައިވާނެ." މިނިސްޓަރ ވިދާޅުވިއެވެ.