ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުން، އީގަލް ހިލްސްއާ ހަވާލުކޮށްގެން ކުރިއަށްގެންދާ ރަސްމާލެ މަޝްރޫޢުގެ ދަށުން ބޭރުގެ އިންވެސްޓަރުންނަށް ވިސާ ދޫކުރުމުގެ ކަންކަން ކުރިއަށްދާނީ ރާއްޖޭގެ އިމިގްރޭޝަން ޤާނޫނާއި ގަވާއިދުތަކާ އެއްގޮތްވާ ގޮތުގެ މަތިން ކޯޕަރޭޓް ރެސިޑެންސް ވިސާގެ އުސޫލުން ކަމަށް ބަންޑާރަ ނާއިބު އަހުމަދު އުޝާމް ވިދާޅުވެއްޖެއެވެ. 

ރޭ ކުރިއަށްދިޔަ އަހާ ފޯރަމްގައި ވާހަކަދައްކަވަމުން، ރާއްޖޭގައި ކޯޕަރޭޓް ރެސިޑެންސް ވިސާ ދިނުމަކީ މިހާރުވެސް ޤާނޫނީ ގޮތުން ހުއްދަކުރާ ކަމެއްކަން ފާހަގަކުރައްވައި، އުޝާމް ވިދާޅުވި ގޮތުގައި، ވޭތުވެދިޔަ ދެ ސަރުކާރުގައިވެސް މި ނިޒާމު ކުރިއަށް ގެންދިއުމަށް މުހިންމު މަސައްކަތްތަކެއް ވަނީ ކޮށްފައެވެ.

އެގޮތުން، އުޝާމް ވިދާޅުވީ އެންމެ ފުރަތަމަ އިމިގްރޭޝަން ޤާނޫނަށް އިސްލާޙު ގެނެސް، ކޯޕަރޭޓް ރެސިޑެންސް ވިސާ ތަޢާރަފުކުރީ 2015 ވަނަ އަހަރު ރައީސް ޔާމީންގެ ވެރިކަމުގައި، މިހާރުގެ އިކޮނޮމިކް މިނިސްޓަރ މުޙައްމަދު ސަޢީދު އެ މިނިސްޓްރީގައި ހުންނެވި ދުވަސްވަރުގައި ކަމަށެވެ. އެއީ ރާއްޖޭގެ ފަތުރުވެރިކަމުގެ ދާއިރާ އިތުރަށް ފުޅާކޮށް، ރިއަލް އެސްޓޭޓް މާކެޓެއް ޤާއިމުކުރުމުގެ މަޤްޞަދުގައިކަންވެސް ފާހަގަކުރެއްވިއެވެ.

އޭގެ ފަހުން، 2020 ވަނަ އަހަރު ރައްޔިތުންގެ މަޖިލީހުގެ ފޮރިން ރިލޭޝަންސް ކޮމިޓީން ދިރާސާކޮށް މި ޤާނޫނަށް އިތުރު އިސްލާޙުތަކެއް ގެނެވުނު ކަމަށާ، މި އިސްލާޙުގެ ދަށުން އިންވެސްޓްމަންޓްގެ އަދަދު 250،000 (ދެލައްކަ ފަންސާސް ހާސް) ޑޮލަރަށް ކުޑަކޮށް، ކޮންމެ 5 އަހަރަކުން އާކުރެވޭ ގޮތަށް (ރިނިއުވަބަލް) ވިސާ ދޫކުރުމުގެ ފުރުޞަތު ފަހިކޮށްދިން ކަމަށް އުޝާމް ވިދާޅުވިއެވެ. 

ރަސްމާލެ މަޝްރޫޢާ ގުޅޭގޮތުން ވާހަކަދައްކަވަމުން އުޝާމް ވިދާޅުވީ، މިހާރު މަޝްވަރާކުރެވެމުންދާ މި މަޝްރޫޢުގައިވެސް ވިސާ ދިނުމުގެ މަރުޙަލާތައް ކުރިއަށްދާނީ ހަމަ މި އުސޫލުން، ކޯޕަރޭޓް ރެސިޑެންސް ވިސާގެ ދަށުން ކަމަށެވެ. އަދި ރާއްޖޭގެ އެއްވެސް ޤާނޫނަކާއި ގަވާއިދަކާ ޚިލާފަށް މި މަޝްރޫޢުގެ ތެރެއިން އެއްވެސް ކަމެއް ނުހިނގާނެ ކަމުގެ ފުރިހަމަ ޔަޤީންކަން އޭނާ ވަނީ ދެއްވާފައެވެ.