ހުކުރުދުވަހު ޑެންމާކުގައި ހުންނަ ތުރްކިޔޭގެ އެމްބަސީ ކުރިމަތީގައި ކީރިތި ޤުރުއާންގެ ކޮޕީއެއްގައި ރޯކޮށްލައި އަންދާލި މައްސަލަ ޢަރަބި އިސްލާމީ ޤައުމުތަކުން ކުށްވެރި ކުރަމުންއެބަދެއެވެ.

އެގޮތުން ސަޢުދީޢަރަބިއްޔާއިން ވަނީ އިސްލާމްދީނަށް ނަފްރަތު ކުރުމުގައި ހައްދުންނެއްޓިފައިވާ މީހުން ހިންގި މި ޢަމަލު ހަރުކަށި އިބާރާތުން ކުށްވެރިކޮށްފައެވެ.

ސަޢުދީޢަރަބިއްޔާގެ އިތުރުން ޖޯޑަން، ކުވައިތް އަދި ޤަޠަރުވެސް ވަނީ ޑެންމާކުގައި ހިންގި މިނުބައި ޢަމަލު ކުށްވެރިކޮށްފައެވެ. ޚާއްސަ ގޮތެއްގައި ރަމަޟާން މަހާއި ދިމާކޮށް މުސްލިމުންނާއި ދެކޮޅަށް ހައްދުފަހަނައެޅި މީހުން ކުރަމުން ދާ މިފަދަ ޢަމަލު ތަކަކީ ނަފްރަތު އުފެއްދުމުގެ ގޮތުން ކުރާ ކަމެއް ކަމަށް ބުނެފައެވެ.

މުސްލިމުންނާއި ދެކޮޅަށް މަސައްކަތް ކުރާ ޑެންމާކުގެ ގްރޫޕަކުން ވަނީ ފޭސްބުކް ލައިވްގައި މުސްލިމުންނާއި އިސްލާމް ދީނާއި ދެކޮޅު ޢިބާރާތްތައް ލިޔެފައިވާ ބެނާތައް ހިފައިގެން ޑެންމާކުގައި ހުންނަ ތުރްކިޔޭގެ އެމްބަސީގެ ބޭރުގައި އިހްތިޖާޖް ކޮށްފައެވެ. އަދި މި އިހްތިޖާޖުގެ ތެރޭގައި ކީރިތި ޤުރުއާނުގެ ކޮޕީ އަކާއި ތުރްކިޔޭގެ ދިދަވެސް ވަނީ އަންދާލައިފައެވެ.

ތުރްކިޔޭގެ ފޮރިން މިނިސްޓަރ ވަނީ ނަފްރަތު އުފައްދާ މިފަދަ ކަންކަމަކީ، ޙިޔާލުފާޅު ކުރުމުގެ މިނިވަންކަމުގެ ދަށުން ކަމަށް ބުނެ ކުރިޔަސް އެޤައުމުން ބަލައި ގަންނާނެ ކަމެއް ނޫން ކަމަށް ބުނެފައެވެ.

އަދި ޑެންމާކުގެ ސަރުކާރަށް ތުރްކިޔޭ އިން ގޮވާލައިފައިވަނީ މިކަން ކުރި މީހުންނާއި މެދު އެންމެ އެކަށީގެންވާ ފިޔަވަޅު އެޅުމަށެވެ.

މި އަަހަރުގެ ޖެނުއަރީ މަހުގެ ތެރޭގައި ވެސް ޑެންމާކުގައި އިސްލާމްދީނާއި ކީރިތި ޤުރުއާނަށް އިހާނެތިބަސްތައް ބުނެފައިވެއެވެ. އަދި އެޤައުމުގެ ސިޔާސީ މީހަކު ވަނީ ކީރިތި ޤުރުއާނުގެ ކޮޕީ އެއް އަންދާލައިފައެވެ.