ފިޠުރު ޢީދާއި ގުޅުވައިގެން ބާއްވާ ޢީދު ބައިބަލަ ޗެލެންޖް 1444 ގެ ޓައިޓަލް ސްޕޮންސަރަކަށް އެމްޓީސީސީ ހަމަޖައްސައި އެއްބަސްވުމުގައި ސޮއިކޮށްފިއެވެ.

ބައިބަލާ އެސޯސިއޭޝަން އޮފް މޯލްޑިވްސް އިން އިންތިޒާމު ކޮށްގެން ބާއްވާ މުބާރާތުގެ ޓައިޓަލް ސްޕޮންސަރެއްގެ ގޮތުގައި އެމްޓީސީސީ އާއި އެ އެސޯސިއޭޝަނާއި ދެމެދު، މިދިޔަ ހަފުތާ ތެރޭގައި އެއްބަސްވުމުގައި ސޮއިކޮށްފައިވާ އިރު، އެމްޓީސީސީގެ ފަރާތުން އެއްބަސްވުމުގައި ސޮއިކުރެއްވީ އެ ކުންފުނީގެ ސީއީއޯ އާދަމް އާޒިމެވެ. ބައިބަލާ އެސޯސިއޭޝަންގެ ފަރާތުން އެއްބަސްވުމުގައި ސޮއިކުރެއްވީ އެސޯސިއޭޝަންގެ ޖެނެރަލް ސެކްރެޓަރީ ސައީދު އަލީއެވެ.

ބައިބަލާ އެސޯސިއޭޝަނުން ބުނެފައިވަނީ މިފަހަރު މުބާރާތުގައި ބައިވެރިވުމަށްވެސް ރޯދަމަހުގެ ފަހުކޮޅުގައި ފުރުސަތު ހުޅުވާލެވޭނެ ކަމަށެވެ. މުބާރާތަށް ބޮޑު ތަރުހީބެއް ލިބޭނެ ކަމަށް ބެލެވޭއިރު، ބައިބަލާ އެސޯސިއޭޝަނުން މުބާރާތް ބާއްވަން މަސައްކަތް ކުރަމުންދަނީ ހުޅުމާލޭގައެވެ. މިފަހަރުގެ މުބާރާތްވެސް އީދާ ދިމާކޮށް ފެށުމަށް ތައްޔާރުވަމުންދާ އިރު، އެސޯސިއޭޝަންގެ ފަރާތުން ބުނީ މި މުބާރާތް ކާމިޔާބު މުބާރާތަކަށް ހެދުމަށް ބުރަކޮށް މަސައްކަތް ކުރަމުންދާ ކަމަށެވެ.

Advertisement

ބައިބަލާއަކީ ރާއްޖޭގައި ޒަމާނުއްސުރެ ކުޅެވެމުންދާ ފޯރިގަދަ ކުޅިވަރެކެވެ.

މިދިޔަ އަހަރުގެ ބައިބަލާ މުބާރާތް ބާއްވާފައިވަނީވެސް ކޮވިޑްގެ ސަބަބުން އޭގެ ކުރިން ދެ އަހަރު މުބާރާތް ނުބޭއްވި އޮތުމަށްފަހުއެވެ.