ހުޅުމާލޭ ދެވަނަ ފިޔަވަހީގައި އެސްޓީއޯގެ މުވައްޒަފުންނަށް ހާއްސަކޮށް ހަދަމުންދާ ފްލެޓް ތަކަށް މި ޑިސެމްބަރު މަހުގެ ތެރޭގައި ވަދެވޭނެ ކަމަށް އެ ކުންފުނީގެ މެނޭޖިން ޑިރެކްޓަރުގެ މަގާމުން މިއަދު ވަކިކުރި އަމްރު ރަޝާދު ވިދާޅުވެއްޖެ އެވެ.

އަމްރު މިފަދައިން ވިދާޅުވެފައި ވަނީ މިއަދު މަގާމުން ވަކި ކުރުމުގެ ކުރިން ވޮއިސް އަށް ދެއްވި ޚާއްސަ ބަސްދީގަތުމެއްގައެވެ. މިއީ މަގާމުގައި ހުންނަވައިގެން މީޑިއާ އަކަށް އަމްރު ދެއްވި އެންމެ ފަހު ބަސްދީގަތުމެވެ. 

މި ބަސްދީގަތުމުގައި، އެސްޓީއޯ ފްލެޓް ތައް ހަވާލުކުރުން ލަސްވަމުންދާ ސަބަބާއި ގުޅިގެން ވޮއިސް އިން ކުރި ސުވާލަށް ޖަވާބުދެއްވަމުން އަމްރު ވިދާޅުވީ އެފަދައިން ކަންކަން ދިމާވީ މައިގަނޑު ދެ ސަބަބަކާއި ހުރެ ކަމަށެވެ. 

Advertisement

އެގޮތުން ކުރިން އެ ޕްރޮޖެކްޓް ހަވާލު ކުރެވުނީ ޗައިނާގެ ކުންފުންޏަކާ ކަމަށާ އެ ކުންފުނިން އެކަން ކޮށްދިނުމަށް ހަމަޖެހުނީ އެ ކުންފުނިން ފައިނޭންސް ހަމަޖައްސައިގެން ކަމަށް އަމްރު ވިދާޅުވި އެވެ. އެހެންނަމަވެސް، ޕްރޮޖެކްޓް ގެ 20 އިންސައްތަ ނިމުނު ފަހުން އިތުރަށް ލޯނު ލިބެން ނެތް ކަމަށް ކޮންޓްރެކްޓަރ ބުނެފައިވާ ކަމަށާ، އެއާއެކު އެ އެއްބަސްވުން ބާތިލް ކުރެއްވި ކަމަށް އަމްރު ވިދާޅުވި އެވެ. 

މީގެ އިތުރުން ފްލެޓް ތަކުގެ ޑިޒައިން އޭރު ހުރިގޮތުން، ގިނަ ބެލްކަނީ ތަކެއް ހުރި ކަމަށާ، އޭގެ ސަބަބުން ތަނުގެ ޖާގަ ކުޑަވެގެންދާ ކަން ފާހަގަވި ކަމަށް އަމްރު ވިދާޅުވި އެވެ. އެހެން ކަމުން އެ ޑިޒައިން ބަދަލު ކުރުމަށްވެސް ވަރަށް ގިނަ ވަގުތު ހޭދަވިކަން އޭނާ ފާހަގަކުރެއްވިއެވެ. 

އެ ސަބަބުތަކާއި ހުރެ ފްލެޓްތައް ހަވާލުކުރުން ލަސްވި ނަމަވެސް, މި އަހަރުގެ ޑިސެމްބަރ މަހުގެ ތެރޭގައި ފުލެޓްތަކަށް ވަދެވޭނެ ކަމަށް ކޮންޓްރެކްޓަރުން ބުނާ ކަމަށް އަމްރު ވިދާޅުވި އެވެ. 

"ކޮންޓްރެކްޓަރ ބުނަނީ ޑިސެމްބަރު މަހާއި ހަމައަށް މަސައްކަތް ނިންމާލާނެ ކަމަށް. ވަރަށް ބާރަށް މަސައްކަތް އެބަ ކުރިއަށްދޭ. ގާތްގަނޑަކަށް އެބައަޅާ މަހަކު ތިން ޝީޓް." އަމްރު ވިދާޅުވި އެވެ. 

މިއާއެކު އަމްރު ވިދާޅުވީ މިއަދުން ފެށިގެން ސްޓާފުންނަށް ފްލެޓްތައް ދައްކާލުމުގެ ކަންކަން ކުރިއަށްދާ ކަމަށެވެ.