އެސްޓީއޯގެ ކުރީގެ މެނޭޖިން ޑިރެކްޓަރު ޙުސައިން އަމްރު ކޮށްދެއްވި ޚިދުމަތްތަކަށް، ރައްޔިތުންގެ މަޖިލީހުގެ ރައީސް، ރައީސް މުޙައްމަދު ނަޝީދު ތައުރީފުކުރައްވައި ޝުކުރު އަދާކުރައްވައިފިއެވެ.

ރައީސް ނަޝީދުގެ "ފިކުރެއްގެ ދިރުން" ގޮފީގައި އިސްކޮށް ހަރަކާތްތެރިވެ ވަޑައިގަންނަވާ އަމްރު، އެސްޓީއޯ ގެ އެމްޑީ ގެ މަގާމުން ވަކިކުރުމާއި ގުޅިގެން ކުރެއްވި ޓްވީޓެއްގައި ނަޝީދު ވިދާޅުވީ، ފާއިތުވި 4 އަހަރަކީ އެސްޓީއޯއިން ރަނގަޅު ނަތީޖާ ނެރުނު ހަތަރު އަހަރުކަމަށާއި، ސަރުކާރު ހިއްސާވާ އެހެން ކުންފުނިތަކާ އެސްޓީއޯގެ ނަތީޖާ އަޅައިކިޔުމުން އެކަން ސާފުވާނެ ކަމަށެވެ.

އެގޮތުން އެ ކުންފުނީގެ ފައިދާ ބޮޑުވި ނަމަވެސް އެ ކުންފުނިން ވިއްކާ ތަކެތީގެ އަގު އުފުލުނަނުދީ ހިފަހައްޓާފައިވާ ކަމަށް ނަޝީދު ވިދާޅުވި އެވެ. އަދި ކޮވިޑް-19 އާލަމީ ވަބާގެ ތެރޭގައިވެސް ހުރިހާ ރަށަކަށް ބޭނުންވާ ކާޑު ފޯރުކޮށްދީ ކާޑަށް ޖެހިޔަނުދީ ހިފަހެއްޓި ކަންވެސް ފާހަގަކުރެއްވިއެވެ. 

Advertisement

"ކުންފުނީގެ ފައިދާ ބޮޑު. އެހެނަސް ތަކެތީގެ އަގު އުފުލުނަނުދީ ހިފެހެއްޓި. ކޮވިޑް-19 ހާލަތުގައިވެސް ހުރިހާ ރަށްރަށް ކާޑަށް ނުޖެހި ހިފެހެއްޓި. ހުސައިން އަމްރުއަށް މަރުހަބާ އާއި ޝުކުރު" ނަޝީދު ވިދާޅުވި އެވެ. 

އަމްރު މަޤާމުން ވަކިކޮށްފައި ވަނީ އޭނާ ބައިވެރިވެވަޑައިގަންނަވަން އޮތް ޕީއެސްއެމްގެ ޕްރޮގްރާމެއްވެސް ފަހު ވަގުތު ކެންސަލް ކުރުމަށްފަހުއެވެ. އެކަމާއި ގުޅިގެން ނަޝީދުގެ ފިކުރެއްގެ ދިރުމުގެ އިސް ބޭފުޅެއްކަމަށްވާ އަލީ އާޒިމް ވަނީ އެ ޕްރޮގްރާމު ހުއްޓުވީ ރައީސް އޮފީހުގެ ތަރުޖަމާނު މިއުވާން ކަމަށް ތުހުމަތުކުރައްވާފަ އެވެ. އަދި ޕްރޮގްރާމު ހުއްޓުވުމަށްޓަކައި މިއުވާން ޕީއެސްއެމަށް ވަޑައިގެންނިކަމަށްވެސް އާޒިމް ވިދާޅުވެފައި ވެއެވެ.