ސްޓޭޓް އޯންޑް އެންޓަރޕްރައިޒެސް (އެސްއޯއީ) ތަކުގެ ބޯޑުތަކަށް މީހުން އައްޔަނުކޮށް ވަކިކުރުމަށް ރައީސް އޮފީހުން އަންގާ އެންގުންތަކަކީ ގާނޫނާ ހިލާފު އެންގުންތަކެއް ކަމަށް ރައްޔިތުންގެ މަޖިލިހުގެ ވިލިމާލޭ ދާއިރާގެ މެންބަރު އަހުމަދު އުޝާމް މިއަދު ވިދާޅުވެއްޖެއެވެ.

އެސްޓީއޯގެ މެނޭޖިން ޑިރެކްޓަރުގެ މަގާމުގައި ހުންނެވި ހުސައިން އަމްރު މަގާމުން ވަކިކުރުމަށް ރައީސް އޮފީހުން ޕީސީބީ އަށް ފޮނުވުމާއިގުޅިގެން އެކަމަށް ފާޑުވިދާޅުވެ ޕްރައިވެޓައިޒޭޝަން ގާނޫނުގެ ފޮޓޯއެއް ހިއްސާ ކުރައްވައި އުޝާމް ކުރެއްވި އެ ޓުވީޓުގައި ވިދާޅުވީ، އެސްއޯއީ ތަކުގެ ބޯޑަށް މީހުން އައްޔަނުކުރުމާއި ވަކިކުރުމަކީ ރައީސުލްޖުމްހޫރިއްޔާ އަށް އޮންނަ ބާރެއްނޫން ކަމަށެވެ. 

އުޝާމް ވިދާޅުވީ ގާނޫނުން އެބާރު ލިބިދީފައިވަނީ ޕީސީބީއަށް ކަމަށެވެ. އެހެން ކަމުން އެސްއޯއީތަކުގެ ބޯޑުތަކަށް މީހުން އައްޔަންކޮށް ވަކިކުރުމަށް ރައީސް އޮފީހުން އަންގާ އެންގުންތަކަކީ ޕްރައިވެޓައިޒޭޝަން ގާނޫނާ ހިލާފަށް ސަރުކާރުން ކުރަމުންދާކަމެއް ކަމަށް ވެސް އުޝާމް ވިދާޅުވިއެވެ.

Advertisement

އަމްރު ވަކިކުރަން ޕީސީބީ އަށް ރައީސް އޮފީހުން ފޮނުވީ އިއްޔެ ހެނދުނު އެވެ. އެއާއެކު ޕީސީބީން ވަނީ އަމްރު މަގާމުން ވަކިކޮށް އެސްޓީއޯ ހިންގުން ވަގުތީ ގޮތުން އެ ކުންފުނީގެ ސީއެފްއޯގެ މަގާމުގައި ހުންނެވި މުހައްމަދު ނިޒާމްއާ ހަވާލުކޮށްފައެވެ. އޭނާ މަގާމުން ވަކިކުރަން ނިންމީ ސަރުކާރު ކުންފުނިތަކުގެ ހިންގުމަށް އަބަދުވެސް ބަދަލުތައް ގެންނަ އުސޫލުން ކަމަށް ރައީސް އޮފީހުން ބުންޏެވެ.